អាមេរិកក្លាយជាមជ្ឈមណ្ឌលទាញយកប៊ីតខញធំជាងគេ ក្រោយចិនហាមឃាត់អាជីវកម្មរូបិយប័ណ្ណប្រភេទនេះ
ហុងកុង៖ ទិន្នន័យចេញផ្សាយកាលពីថ្ងៃពុធរបស់មជ្ឈមណ្ឌលខេមប្រ៊ីដសម្រាប់ហិរញ្ញវត្ថុជំនួស (CCAF) របស់ចក្រភពអង់គ្លេសបង្ហាញថា សហរដ្ឋអាមេរិកវ៉ាដាច់ប្រទេសចិនក្លាយជាមជ្ឈមណ្ឌលទាញយកប៊ីតខញធំជាងគេនៅលើពិភពលោក ក្រោយចិនបង្រ្កាប និងហាមឃាត់អាជីវកម្មប្រភេទនេះ។
តួលេខនេះក៏បង្ហាញពីផលប៉ះពាល់នៃការបង្ក្រាបការជួញដូរ និងទាញយក របស់ប្រឹក្សារដ្ឋឬខុទ្ទកាល័យចិននៅចុងខែឧសភាដោយផ្តោតលើហានិភ័យហិរញ្ញវត្ថុ និងបំផ្លាញឧស្សាហកម្ម ដែលធ្វើឱ្យឈ្នួញ និងក្រុមហ៊ុនទាញយកបិទហាង ឬប្ដូរទីតាំងអាជីវកម្មរបស់ខ្លួនទៅក្រៅប្រទេស។
តាមទិន្នន័យ ចំណែកនៃថាមពលកុំព្យូទ័ររបស់ចិនដែលភ្ជាប់ទៅបណ្តាញប៊ីតខញសកលដែលគេស្គាល់ថាជា «អត្រាហាស» បានធ្លាក់ចុះដល់សូន្យត្រឹមខែកក្កដាពី ៤៤% ក្នុងខែឧសភា និងពី ៧៥% ក្នុងឆ្នាំ ២០១៩។
អ្នកទាញយកនៅកន្លែងផ្សេងទៀត ទទួលយកភាពយឺតយ៉ាវដោយក្រុមហ៊ុនទាញយកប្តូរគោលដៅរបស់ខ្លួនទៅអាមេរិកខាងជើង និងអាស៊ីកណ្តាល ហើយអ្នកទាញយកចិនធំៗ កំពុងធ្វើចលនាផងដែរ ទោះបីជាដំណើរការនេះពោរពេញទៅដោយការលំបាកផ្នែកភ័ស្តុភារក៏ដោយ។
ជាលទ្ធផល សហរដ្ឋអាមេរិកបច្ចុប្បន្នមានចំណែកធំបំផុតនៃការទាញយក ប្រហែល ៣៥,៤% នៃអត្រាហាសពិភពលោកគិតត្រឹមចុងខែសីហា បន្ទាប់មកគឺកាហ្សាក់ស្ថាន និងរុស្ស៊ី។ នេះបើយោងតាមទិន្នន័យដដែល។
ប៊ីតខញត្រូវបានបង្កើតឬ ទាញយកដោយកុំព្យូទ័រដែលមានថាមពលខ្ពស់ដែលជាធម្មតានៅមជ្ឈមណ្ឌលទិន្នន័យក្នុងផ្នែកផ្សេងៗនៃពិភពលោក ចេញពីការដោះស្រាយរូបមន្តគណិតវិទ្យាដ៏ស្មុគស្មាញនៅក្នុងដំណើរការមួយដែលធ្វើឱ្យការប្រតិបត្តិការទាញយកវាត្រូវប្រើប្រាស់អគ្គិសនីយ៉ាងមហាសាល។
តំណាងរបស់ក្រុមហ៊ុន Ebang International Holdings ប្រាប់ទីភ្នាក់ងាររ៉យទ័របន្ទាប់ពីការបង្ក្រាបចុងក្រោយរបស់រដ្ឋាភិបាលចិនថា៖ «គោលដៅបច្ចុប្បន្នរបស់យើង គឺការពន្លឿនការសាងសង់មូលដ្ឋានទាញយកនៅអាមេរិកខាងជើង និងនៅទ្វីបអឺរ៉ុប»។
យ៉ាងណាមិញ អ្នកប្រឡូកក្នុងវិស័យនេះពីមុនមកនៅតែរងគ្រោះក្រោមឥទ្ធិពលការបង្រ្កាបនេះ។ លោក Mao Shihang ស្ថាបនិក F2Pool ដែលធ្លាប់ជាទីដ៏ធំបំផុតរបស់ពិភពលោកដើម្បីទាញយកប៊ីតខញ និងជាសហស្ថាបនិកក្រុមហ៊ុន Cobo និងជាអ្នកគ្រប់គ្រងទ្រព្យសម្បត្តិគ្រីបតូមានទីស្នាក់ការនៅសិង្ហបុរីរៀបរាប់ថា៖ «ក្នុងនាមជាអតីតយុទ្ធជន[នៃអ្នកទាញយក]ម្នាក់ដែលបានឃើញកំណើតនៃឧស្សាហកម្មនេះនៅក្នុងប្រទេសចិន ខ្ញុំមានអារម្មណ៍ថាស្ថានភាពសព្វថ្ងៃនេះគឺគួរឱ្យសោកស្តាយណាស់»។
លោកនិយាយបែបនេះមុនពេលស្ថាប័នស្រាវជ្រាវ Cambridge ចេញផ្សាយរបាយការណ៍ថ្មីរបស់ខ្លួនដោយបន្តថា៖ «ប្រទេសចិនកំពុងបាត់បង់ចំណែកនៃថាមពលកុំព្យូទ័រ ហើយមជ្ឈមណ្ឌលទំនាញរបស់ឧស្សាហកម្មកំពុងផ្លាស់ប្តូរទៅសហរដ្ឋអាមេរិក»។
យោងតាមការវិភាគរបស់ South China Morning Post យ៉ាងហោចណាស់មានក្រុមហ៊ុនទាញយកលុយគ្រីបតូចំនួន ២១ បានចាកចេញពីទីផ្សាររូបិយប័ណ្ណឌីជីថលរបស់ចិន ដោយប្ដូរទីដៅរបស់ខ្លួនទៅកាន់ទីផ្សារក្រៅប្រទេសដែលរូបិយប័ណ្ណប្រភេទនេះកាន់តែទទួលបានការទទួលស្គាល់ជាទ្រព្យសម្បត្តិហិរញ្ញវត្ថុ។
តាមការចុះផ្សាយរបស់សារព័ត៌មាន BBC កាលពីដើមខែកញ្ញា ក្រុមហ៊ុនប៊ីតខញចិនជាច្រើនបានសម្លឹងមើលរដ្ឋតិចសាស់របស់សហរដ្ឋអាមេរិកសម្រាប់ស្ថិរភាពអាជីវកម្មរបស់ខ្លួន និងឱកាស។
លោក Alejandro De La Torres អនុប្រធានក្រុមហ៊ុនប៊ីតខញ Poolin និយាយនាពេលនោះថា៖ «អ្វីដែលបានកើតឡើងចំពោះយើងនៅប្រទេសចិន នឹងមិនកើតឡើងនៅអាមេរិកទេ»។
រដ្ឋតិចសាស់មានតម្លៃថាមពលថោកជាងគេបំផុតនៅលើពិភពលោក ដោយសារតែបណ្តាញថាមពលគ្មានច្បាប់កំណត់។អ្នកប្រើប្រាស់រីករាយជាមួយនឹងជម្រើសជាច្រើននៃអ្នកផ្តល់អគ្គិសនី ដែលលើកទឹកចិត្តអ្នកផ្តល់សេវាឱ្យបញ្ចុះតម្លៃដើម្បីបន្តការប្រកួតប្រជែង។ក្នុងកំឡុងពេលដែលមានតម្រូវការអគ្គិសនីច្រើន កន្លែងទាញយកប៊ីតខញថែមទាំងអាចលក់ថាមពលដែលមិនប្រើត្រឡប់ទៅបណ្តាញអគ្គិសនីវិញ។
លោក De La Torre និយាយថា បើទោះបីជាប្រទេសអែលសាល់វ៉ាឌ័រគឺជាប្រទេសដំបូងគេដែលប្រើប៊ីតខញជារូបិយប័ណ្ណជាតិក៏ដោយ ក៏អ្នកទាញយកចូលចិត្តអាមេរិកជាងដោយសារតែហេដ្ឋារចនាសម្ព័ន្ធអគ្គិសនីមានការអភិវឌ្ឍន៍ល្អ។
ប៉ុន្តែអ្នកវិភាគខ្លះព្រមានថា ការប្ដូរទីតាំងទាញយកទៅសហរដ្ឋអាមេរិកអាចនាំឱ្យមានផលប៉ះពាល់ធ្ងន់ធ្ងរ ដោយសារទីក្រុង និងទីប្រជុំជនប្រឈមមុខនឹងតម្រូវការថាមពលដ៏ធំ។ កាលពីខែកុម្ភៈ ការដាច់ចរន្តអគ្គិសនីបន្ទាប់ពីព្យុះព្រឹលវាយប្រហារ បានបណ្តាលឱ្យផ្ទះ និងអាជីវកម្មរាប់លាននៅរដ្ឋតិចសាស់គ្មានថាមពលអស់រយៈពេលជាច្រើនថ្ងៃ និងមនុស្សប្រមាណជាង ២០០ នាក់ស្លាប់ដោយសារតែការប្រែប្រួលអាកាសធាតុហួសហេតុកន្លងមក។