រដ្ឋមន្ត្រីសន្តិសុខមាតុភូមិអាមេរិកធ្វើតេស្តិ៍រកឃើញវិជ្ជមានជំងឺកូវីដ-១៩
វ៉ាស៊ីនតោន៖ រដ្ឋមន្ត្រីសន្តិសុខមាតុភូមិអាមេរិកលោក អាឡិចាន់ដ្រូ មេយ៉ូកាស បានធ្វើតេស្តិ៍រកឃើញវិជ្ជមានជំងឺកូវីដ១៩ នៅថ្ងៃអង្គារសប្តាហ៍នេះ ហើយកំពុងធ្វើចត្តាឡីស័កនៅគេហដ្ឋាន។
ការធ្វើតេស្តិ៍វិជ្ជមាននេះតម្រូវឱ្យលោកលុបចោលការធ្វើដំណើរដែលបានគ្រោងទុកនៅសប្តាហ៍នេះទៅកាន់ប្រទេសកូឡុំប៊ី ជាទីដែលលោកនឹងចូលរួមជាមួយរដ្ឋមន្ត្រីក្រសួងការបរទេសលោក អាន់តូនី ប្លីងខិន សម្រាប់ការពិភាក្សាមួយផ្នែកដែលផ្តោតលើកិច្ចខិតខំប្រឹងប្រែងដើម្បីដោះស្រាយនូវអ្វីដែលក្រុមមន្ត្រីកំពុងហៅថា លំហូរនៃជនចំណាកស្រុកមិនធ្លាប់មានពីមុនមក ជាពិសេសមកពីវ៉េណេស៊ុយអេឡានិងហៃទី។ ក្រសួងសន្តិសុខមាតុភូមិនិយាយនៅក្នុងសេចក្តីថ្លែងការណ៍មួយថា លោករដ្ឋមន្រ្តីត្រូវបានធ្វើតេស្តរកឃើញវិជ្ជមានជំងឺកូវីដ១៩នៅព្រឹកថ្ងៃអង្គារសប្តាហ៍នេះ (ម៉ោងក្នុងតំបន់) បើទោះបីជាលោកបានចាក់វ៉ាក់សាំងពេញលេញ បន្ទាប់ពីការធ្វើតេស្តដែលជាផ្នែកមួយនៃពិធីការ មុនពេលធ្វើដំណើរ។
លោក មេយ៉ូកាស នឹងធ្វើការពីផ្ទះក្រោមពិធីការដែលបានណែនាំដោយមជ្ឈមណ្ឌលបង្ការ និងគ្រប់គ្រងជំងឺអាមេរិក (CDC) ខណៈការតាមដានទំនាក់ទំនងកំពុងត្រូវបានធ្វើឡើង ដើម្បីពិនិត្យមើលការប៉ះពាល់ដែលអាចកើតមានក្នុងចំណោមអ្នកផ្សេងទៀត៕ ប្រភព៖ CGTN