កូរ៉េខាងជើងអះអាងពីជោគជ័យក្នុងការធ្វើតេស្តមីស៊ីលផ្លោងបាញ់ចេញពីនាវាមុជទឹក
ព្យុងយ៉ាង៖ ទីភ្នាក់ងារសារព័ត៌មានរដ្ឋកូរ៉េខាងជើង KCNA នៅថ្ងៃពុធនេះចេញផ្សាយថា កូរ៉េខាងជើងបានទទួលជោគជ័យ ក្នុងការធ្វើតេស្តមីស៊ីលទើបអភិវឌ្ឍថ្មីមួយដែលរចនាឡើងដើម្បីបាញ់ចេញពីនាវាមុជទឹក (SLBM) ក្នុងគោលបំណងពង្រឹងសមត្ថភាពប្រតិបត្តិការក្រោមទឹករបស់យោធាខ្លួន។
បើតាមសារព័ត៌មាន KCNA ការបាញ់សាកល្បងចុងក្រោយនេះ នឹងរួមចំណែកយ៉ាងធំធេងក្នុងការដាក់បច្ចេកវិទ្យាការពារជាតិនៅកម្រិតខ្ពស់ និងដើម្បីពង្រឹងសមត្ថភាពប្រតិបត្តិការក្រោមទឹករបស់កងទ័ពជើងទឹកយើង។ សារព័ត៌មាន KCNA បន្ថែមថា មីស៊ីលថ្មីនេះបានបង្ហាញពីបច្ចេកវិទ្យាត្រួតពិនិត្យ និងការបញ្ជាទិសកម្រិតខ្ពស់ រួមមានទាំងការបំលាស់ទីពីចំហៀង និងបំលាស់ទីបែបសម្រូតចុះក្រោមនៃមីស៊ីល។
គួរបញ្ជាក់ផងដែរថា ការធ្វើតេស្តមីស៊ីលនៅថ្ងៃអង្គារសប្តាហ៍នេះ គឺជាការបាញ់មីស៊ីលលើកទីប្រាំហើយចាប់តាំងពីខែកញ្ញា ហើយបានកើតឡើងស្របពេលកូរ៉េខាងជើងបង្កើនសម្ពាធលើទីក្រុងវ៉ាស៊ីនតោន និងទីក្រុងសេអ៊ូល ដើម្បីបោះបង់ចោលនូវអ្វីដែលទីក្រុងព្យុងយ៉ាងចាត់ទុកថា ជាគោលនយោបាយអរិភាពដូចជាសមយុទ្ធយោធារួមរវាងអាមេរិក-កូរ៉េខាងត្បូង និងទណ្ឌកម្មអន្តរជាតិលើកូរ៉េខាងជើង៕ ប្រភព៖ CGTN