FBI ឆែកឆេរគេហដ្ឋានមហាសេដ្ឋីរុស្សីនៅក្រុងវ៉ាស៊ីនតោន និងញូវយ៉ក
កាលពីថ្ងៃអង្គារ ទី១៩ តុលាភ្នាក់ងារនៃការិយាល័យស៊ើបអង្កេតរបស់អាមេរិក (FBI) បានចុះឆែកឆេរគេហដ្ឋានចំនួនពីរនៅទីក្រុងវ៉ាស៊ីនតោន និងញូវយ៉ក មានទំនាក់ទំនងជាមួយមហាសេដ្ឋីរុស្សីលោកអូឡេក ឌឺរីប៉ាស្កា ដែលស្ថិតក្រោមការដាក់ទណ្ឌកម្មរបស់អាមេរិក និងអតីតនិយោជករបស់លោកផល ម៉ាណាហ្វត ប្រធានយុទ្ធនាការបោះឆ្នោត ២០១៦ របស់លោកដូណាល់ ត្រាំ។
អ្នកនាំពាក្យ FBI បាននិយាយថាការឆែកឆេរនេះគឺធ្វើតាមដេកាតុលាការ ប៉ុន្តែបដិសេធបញ្ជាក់ពីហេតុផល។
ប្រភពដែលដឹងអំពីការស៊ើបអង្កេតនេះបាននិយាយថា ការិយាល័យរដ្ឋអាជ្ញាអាមេរិកប្រចាំភាគខាងត្បូងរដ្ឋញូវយ៉កគឺកំពុងតែដឹកនាំការស៊ើបអង្កេតទៅលើលោកឌឺរីប៉ាស្កា ដែលជាមហាសេដ្ឋីក្នុងវិស័យផលិតលោហធាតុ ហើយមានទំនាក់ទំនងយ៉ាងជិតស្និតជាមួយរដ្ឋាភិបាលរុស្សី។ មានការរាយការណ៍ថាលោកបានស្ថិតក្រោមការស៊ើបអង្កេតជុំវិញការចោទប្រកាន់ជាច្រើនដូចជាការលាងលុយកខ្វក់ ការគំរាមកំហែងគូប្រជែង ការលួចស្ដាំទូរស័ព្ទដោយខុសច្បាប់ ការជំរិតទារប្រាក់ និងការធ្វើអាជីវកម្មខុសច្បាប់។
អ្នកតំណាងលោកឌឺរីប៉ាស្កាមួយរូប បាននិយាយគេហដ្ឋានដែលត្រូវបានឆែកឆេរទាំងនេះ គឺជាកម្មសិទ្ធិរបស់សាច់ញាតិលោកឌឺរីប៉ាស្កា មិនមែនជាកម្មសិទ្ធិរបស់លោកផ្ទាល់ទេ។ គេមិនដឹងថាលោកឌឺរីប៉ាស្កាឥឡូវមានទីតាំងនៅឯណាទេ។
កាលពីឆ្នាំ ២០១៨ អាមេរិកសម្រេចដាក់ទណ្ឌកម្មលើលោកឌឺរីប៉ាស្កា ជាមួយនឹងមហាសេដ្ឋីរុស្សីមួយចំនួនផ្សេងទៀត ដោយសារទំនាក់ទំនងពួកគេជាមួយរដ្ឋាភិបាលរុស្សី បន្ទាប់ពីមានការចោទប្រកាន់អំពីការជ្រៀតជ្រែកចូលការបោះឆ្នោតឆ្នាំ ២០១៦ របស់អាមេរិក។ រុស្សីបានច្រានចោលការចោទប្រកាន់នេះ៕
ប្រភព៖ Reuters