ការតវ៉ាធ្វើឱ្យរំខានដល់ពិធីដុតចន្លុះល្បែងអូឡាំពិកក្រុងប៉េកាំង២០២២
សកម្មជនសិទ្ធិមនុស្ស លើកបដាដែលសរសេរថា «គ្មានល្បែងប្រល័យពូជសាសន៍» គ្រវីទង់ជាតិទីបេ និងអំពាវនាវឱ្យធ្វើពហិការមិនចូលរួមព្រឹត្តិការណ៍អូឡាំពិករដូវរងាទីក្រុងប៉េកាំងឆ្នាំ ២០២២ ក្នុងអំឡុងពេលប្រារព្ធពិធីដុតចន្លុះកាលពីថ្ងៃចន្ទ។
ស្ត្រីពីរនាក់ និងបុរសម្នាក់លួចរត់ឆ្លងកាត់របាំងប៉ូលីសដ៏តឹង ហើយសម្រុកចូលទៅក្នុងតំបន់បុរាណវិទ្យានៃពហុកីឡដ្ឋាន និងវិមានក្រិចបុរាណ ដែលជាកន្លែងអណ្តាតភ្លើងអូឡាំពិកត្រូវដុតតាមប្រពៃណី ហើយត្រូវបានគេហាមមិនឱ្យចូលជាច្រើនថ្ងៃ។ អ្នកទាំងបីលើកទង់ជាតិទីបេពីរបីវិនាទី បន្ទាប់ពីចន្លុះត្រូវបានដុត។
ក្រុមបាតុករទាំងបីនាក់ស្រែកទាមទារឱ្យធ្វើពហិការមិនចូលរួមការប្រកួតកីឡាអូឡាំពិកនៅទីក្រុងប៉េកាំង ខណៈមន្ត្រីដែលត្រូវបានអញ្ជើញរួមទាំងប្រធានាធិបតីក្រិកលោកស្រី Katerina Sakellaropoulou និងប្រធានគណៈកម្មាធិការអូឡាំពិកអន្តរជាតិលោក Thomas Bach សម្លឹងមើល។
ពិធីនេះមិនត្រូវបានរំខានដូចករណីសម្រាប់ការប្រកួតកីឡារដូវក្តៅប៉េកាំងឆ្នាំ ២០០៨ ទេ ហើយសកម្មជនដែលមិនបានទៅដល់ពហុកីឡាដ្ឋាន ត្រូវបានប៉ូលីសឃាត់ខ្លួនភ្លាមៗ ប៉ុន្តែមិនរងការចោទប្រកាន់អ្វីនោះទេ។
គណៈកម្មាធិការអូឡាំពិកក្រិក (HOC) ទទួលបន្ទុករៀបចំព្រឹត្តិការណ៍នេះនិយាយថា ខ្លួនខកចិត្តដែលពិធីនេះត្រូវបានប្រើប្រាស់ក្នុងគោលបំណងនយោបាយ។
HOC និយាយក្នុងសេចក្ដីថ្លែងការណ៍ថា៖ «អណ្តាតភ្លើងអូឡាំពិកតំណាងឱ្យប្រវត្តិសាស្ត្រក្រិក ៣០០០ ឆ្នាំ និងការប្តេជ្ញាចិត្តដើម្បីសន្តិភាព និងការសន្ទនា។ ខណៈដែល HOC គោរពសិទ្ធិបុគ្គលចំពោះសេរីភាពក្នុងការបញ្ចេញមតិ វាគឺជាការខកចិត្តដែលព្រឹត្តិការណ៍វប្បធម៌ប្រពៃណីនេះត្រូវបានប្រើប្រាស់ដោយបុគ្គលមួយចំនួនដើម្បីគោលបំណងផ្សេងទៀត»។
អាជ្ញាធរចិនរងការចោទប្រកាន់ពីបទជួយសម្រួលការងារដោយបង្ខំដោយឃុំខ្លួនជនជាតិអ៊ុយហ្គួរប្រហែលមួយលាននាក់ និងជនជាតិភាគតិចមូស្លីមដទៃទៀតនៅក្នុងជំរំតាំងពីឆ្នាំ ២០១៦ ។ ក្រុមសិទ្ធិមនុស្សអំពាវនាវឱ្យគណៈកម្មាធិការអូឡាំពិកអន្តរជាតិ (IOC) ពន្យារពេលការប្រកួតដែលនឹងប្រារព្ធដើមខែកុម្ភៈឆ្នាំក្រោយ និងផ្លាស់ប្តូរទីតាំងព្រឹត្តិការណ៍នេះលុះត្រាតែប្រទេសចិនបញ្ចប់នូវអ្វីដែលខ្លួនចាត់ទុកថាជាអំពើប្រល័យពូជសាសន៍ដែលកំពុងកើតមានលើជនជាតិអ៊ុយហ្គួរ និងក្រុមជនជាតិភាគតិចមូស្លីមដទៃទៀត។
យ៉ាងណាមិញ រដ្ឋាភិបាលចិនបដិសេធការធ្វើខុសដោយនិយាយថា ខ្លួនបង្កើតមជ្ឈមណ្ឌលបណ្តុះបណ្តាលវិជ្ជាជីវៈដើម្បីប្រយុទ្ធប្រឆាំងនឹងអំពើជ្រុលនិយម។
ប្រភព៖ Reuters
