គណបក្សកុម្មុយនិស្តចិនគ្រោងនឹងចេញសេចក្ដីសម្រេចចិត្តឆ្លុះបញ្ចាំងពីប្រវត្តិសាស្ត្ររបស់ខ្លួន
គណបក្សកុម្មុយនិស្តចិនគ្រោងនឹងចេញសេចក្ដីសម្រេចចិត្តឆ្លុះបញ្ចាំងពីប្រវត្តិសាស្ត្ររបស់ខ្លួន នៅ ខែវិច្ឆិកាខាងមុខនេះ។ នេះបើតាមការចុះផ្សាយរបស់សារព័ត៌មានរដ្ឋចិន ស៊ីនហួរ។
ប្រភពខាងលើបានឱ្យដឹងថា កិច្ចប្រជុំការិយាល័យនយោបាយនៃគណៈកម្មាធិការមជ្ឈិមគណបក្សកុម្មុយនិស្តបានប្រព្រឹត្តិទៅកាលពីថ្ងៃច័ន្ទកន្លងទៅ ដោយមានលោក ស៊ី ជីនភីង ដែលជាប្រធានាធិបតីចិន និងជាអគ្គលេខាធិការបក្សជាអធិបតី។
អង្គប្រជុំខាងលើនេះបានសម្រេចថា បក្សកុម្មុយនិស្តចិននឹងបើកសម័យប្រជុំពេញអង្គនៅថ្ងៃទី៨ ដល់ថ្ងៃទី១១ ខែវិច្ឆិកា ដែលនឹងពិភាក្សាលើបញ្ហាទូទៅផ្សេងៗ ដែលរួមមានទាំងត្រួតពិនិត្យ និងតាក់តែងនូវសេចក្ដីសម្រេចគន្លឹះស្ដីពី «សមិទ្ធផលធំៗ និងបទពិសោធន៍ប្រវត្តិសាស្ត្រនៃការខិតខំរយៈពេល ១០០ឆ្នាំ របស់គណបក្ស»។
បើយោងតាមការចុះផ្សាយរបស់សារព័ត៌មាន ស៊ីនហួរ អង្គប្រជុំនៃឥស្សរជននយោបាយជាន់ខ្ពស់ចំនួន ២៥រូបខាងលើនេះ ក៏បានលើកឡើងអំពីវិធីដែលគណបក្សកុម្មុយនិស្តចិនប្រែក្លាយទស្សនៈសង្គមនិយមដែលមានអាយុកាល ៥០០ឆ្នាំ ទៅជាការអនុវត្តជាក់ស្ដែង ហើយដឹកនាំអរិយធម៌ចិនចំណាស់ ៥ពាន់ឆ្នាំឱ្យមានភាពទំនើប។
នៅក្នុងប្រវត្តិសាស្ត្រ ១០០ឆ្នាំនៃគណបក្សកុម្មុយនិស្តចិន គណបក្សនេះចេញសេចក្ដីសម្រេចបង្ហាញពីទិដ្ឋភាពប្រវត្តិសាស្ត្ររបស់ខ្លួនតែ ២ដងប៉ុណ្ណោះ ដោយលើកទី១ នៅឆ្នាំ១៩៤៥ ពោលគឺនៅជំនាន់លោក ម៉ៅ សេទុង ចំណែកឯលើកទី២ គឺធ្វើឡើងនៅជំនាន់លោក តេង ស៊ាវភីង នៅឆ្នាំ១៩៨១។
សេចក្ដីសម្រេចទី១ បានធ្វើការសង្ខេបអំពីមេរៀនពីប្រវត្តិនៃការតស៊ូផ្នែកនយោបាយ និងផ្នែកយោធា របស់បក្សក្រោមការដឹកនាំដោយលោក ម៉ៅ។ លុះសេចក្ដីសម្រេចទី២ វិញ ដាក់ចេញនូវកំណែទម្រង់សេដ្ឋកិច្ច និងនយោបាយមួយចំនួន ហើយក៏បានប្រកាសថា «បដិវត្តន៍វប្បធម៌» ដែលត្រូវបានដាក់ចេញដោយលោក ម៉ៅ ជាកំហុសមួយដ៏ធ្ងន់ធ្ងរ។
ដូច្នេះនេះជាលើកទី៣ ហើយ ដែលគណបក្សកុម្មុយនិស្តចិនចេញសេចក្ដីសម្រេចឆ្លុះបញ្ចាំងពីប្រវត្តិសាស្ត្រ។
«ឆ្នាំនេះជាខួប ១០០ឆ្នាំចាប់តាំងពីគណបក្សកុម្មុយនិស្តត្រូវបានបង្កើត ហើយ ៤០ឆ្នាំចាប់តាំងពីសេចក្ដីសម្រេចលើកទី២ ត្រូវបានចេញ។ សេចក្ដីសម្រេចលើកទី៣ នឹងចាត់ទុកជាការចាប់ផ្ដើមនៃជំនាន់ថ្មីរបស់លោក ស៊ី»។ នេះបើតាមយោងប្រភពនៅក្នុងបក្សកុម្មុយនិស្តចិន ដែលចុះផ្សាយដោយសារព័ត៌មាន Nikkei។
យោងតាមប្រភពខាងលើ សេចក្ដីសម្រេចថ្មីនេះទំនងជាលើកពីគុណសម្បត្តិរបស់លោក ស៊ី ជីនភីង ក្នុងការប្រយុទ្ធប្រឆាំងនឹងអំពើពុករលួយ និងភាពក្រីក្រ ដែលជាភាពជោគជ័យមួយរបស់គណបក្សកុម្មុយនិស្តចិន។
លោក Fan Peng អ្នកស្រាវជ្រាវនៃបណ្ឌិត្យសភាវិទ្យាសាស្ត្រសង្គមចិន លើកឡើងប្រាប់ Global Times ថា សេចក្ដីសម្រេចថ្មីនេះមានភាពខុសប្លែកពីសេចក្ដីសម្រេចលើកទី១ និងលើកទី២ ដោយលើកទី១ និយាយអំពី «បញ្ហា» ចំណែកឯលើកទី២ ចោទជា «សំណួរ»។ រីឯលើកទី៣ នេះ អាចនឹងបង្កប់ដោយចក្ខុវិស័យប្រកបដោយមហិច្ឆតាច្រើនជាងលើកៗមុន។
យ៉ាងណាមិញ បើយោងតាមសាស្ត្រាចារ្យនយោបាយដែលចូលនិវត្តន៍មួយរូប ដែលនិយាយក្នុងលក្ខខណ្ឌអនាមិក បានយល់ឃើញថា គោលដៅនៃសេចក្ដីសម្រេចនេះគឺគ្រាន់តែ «ពង្រឹងមុខមាត់របស់គណបក្ស ក៏ដូចជាលើកមុខរបស់មេដឹកនាំបច្ចុប្បន្ន (សំដៅលើលោក ស៊ី)»។
លោក ស៊ី ជីនភីង ឡើងកាន់តំណែងជាមេដឹកនាំកំពូលចិនចាប់តាំងពីឆ្នាំ២០១២មក។ ចាប់តាំងពីលោកកាន់អំណាច ទិដ្ឋភាពនយោបាយរបស់ចិនបានផ្លាស់ប្ដូរទាំងនៅក្នុងស្រុក និងក្រៅស្រុក។
នៅក្នុងស្រុក លោក ស៊ី បានចាត់វិធានការក្ដៅក្នុងការបង្ក្រាបអំពើពុករលួយក្នុងជួរមន្ត្រីគ្រាក់ៗជាច្រើន។ អ្វីដែលគួរឱ្យកត់សម្គាល់ លោកក៏បានផ្លាស់ប្ដូរប្រពៃណីជាច្រើនក្នុងនយោបាយចិនផងដែរ ដោយលោកបានលុបការកំណត់អាណត្តិដឹកនាំរបស់ប្រធានាធិបតី ក៏ដូចជាអគ្គលេខាធិការបក្ស នៅក្នុងរដ្ឋធម្មនុញ្ញចិនកាលពីឆ្នាំ២០១៨។
រីឯនៅក្រៅស្រុកចិនវិញ ចិនព្យាយាមលើកមុខមាត់របស់ខ្លួននៅលើឆាកអន្តរជាតិតាមរយៈការវិនិយោគផ្នែកសេដ្ឋកិច្ចក្រោមក្របខ័ណ្ឌខ្សែក្រវាត់ និងផ្លូវ (BRI) ហើយក៏ព្យាយាមបង្កើនសំឡេងនៅតាមវេទិកាអន្តរជាតិនានាផងដែរ៕
ប្រភព៖ Global Times
