ជប៉ុនដាក់លក់ម៉ូតូហោះផលិតក្នុងស្រុកលើកដំបូង ក្នុងតម្លៃ ៦៨ម៉ឺនដុល្លារ
តូក្យូ៖ ក្រុមហ៊ុន A.L.I Technologies មានមូលដ្ឋានក្នុងទីក្រុងតូក្យូ បាននិងកំពុងសង្ឃឹមខ្ពស់ថា នឹងអាចទាក់ទាញអ្នកបើកបររថយន្តទំនើបអោយផ្លាស់ប្តូរយានយន្តរបស់ពួកគេមកជិះម៉ូតូហោះលើអាកាសវិញ បន្ទាប់ពីទើបដាក់អោយដំណើរការ និងលក់ក្នុងតម្លៃរហូតដល់៦៨ម៉ឺនដុល្លារជាផ្លូវការនៅក្នុងសប្តាហ៍នេះ។
បើតាមកាសែតរ៉យទ័រ ម៉ូតូហោះម៉ាក XTurismo Limited Edition របស់ក្រុមហ៊ុន A.L.I បានចេញលក់ជាផ្លូវការនៅប្រទេសជប៉ុន ក្នុងតម្លៃ ៧៧.៧លានយ៉េន ឬស្មើនឹង៦៨ម៉ឺនដុល្លារក្នុងមួយគ្រឿង។ នាយកប្រតិបត្តិក្រុមហ៊ុន A.L.I លោក ដៃស៊ុកេ កាតាណុ (Daisuke Katano) បញ្ជាក់ថា រហូតមកដល់ពេលនេះ យើងមានជម្រើសអាចផ្លាស់ទីនៅលើដី ឬនៅលើមេឃ… យើងសង្ឃឹមថា ផលិតផលនេះនឹងផ្តល់នូវវិធីសាស្រ្តថ្មីនៃការផ្លាស់ទីជាមួយម៉ូតូហោះម៉ាក XTurismo។
ក្រុមហ៊ុន ALI Technologies បានបញ្ជាក់ថា ម៉ូតូរបស់ខ្លួនអាចហោះហើរបានរយៈពេល ៤០នាទីក្នុងល្បឿនរហូតដល់ ១០០គីឡូម៉ែត្រក្នុងមួយម៉ោង ដោយសាកថ្មតែម្តងប៉ុណ្ណោះ។ ក្រុមហ៊ុនបច្ចេកវិទ្យារបស់ជប៉ុនមួយនេះ គ្រោងនឹងផលិតយានយន្តនេះចំនួន ២០០គ្រឿង ដែលមានទម្ងន់ ៣០០គីឡូក្រាមនៅពាក់កណ្តាលឆ្នាំ ២០២២ខាងមុខ ហើយម៉ូតូនីមួយៗត្រូវបានបំពាក់ដោយម៉ាស៊ីនធម្មតា និងម៉ូទ័រដែលប្រើអាគុយចំនួនបួន៕ ប្រភព៖ Reuters