សម្តេចពិជ័យសេនា ទៀ បាញ់ ណែនាំឱ្យគណ:កម្មាធិការជាតិសន្តិសុខលម្ហសមុទ្រទប់ស្កាត់បទល្មើសលើផ្ទៃសមុទ្រ
ភ្នំពេញៈសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិនិងជាប្រធានគណៈកម្មាធិការជាតិ សន្តិសុខលម្ហសមុទ្រ បានជំរុញឱ្យបន្តពង្រឹងទីបញ្ជាការជួរមុខនៃគណ:កម្មាធិការជាតិសន្តិសុខលម្ហ សមុទ្រឱ្យបានរឹងមាំ និងចូលរួមទប់ ស្កាត់បទល្មើសលើផ្ទៃសមុទ្រ។ សម្តេចក៏បានសំណូមពរដល់ក្រុមការងារបច្ចេកទេសគណ:កម្មាធិការជាតិ សន្តិសុខលម្ហសមុទ្រត្រូវចងក្រងទុកជាឯកសារប្រវត្តិសាស្ត្រនូវបណ្តាឈ្មោះកោះទាំងឡាយដែលបានផ្ទៀងផ្ទាត់និងបានរាប់ ចំនួនកោះរួចហើយដោយត្រូវថតរូបទុកនិងដាក់ឈ្មោះជាភាសាខ្មែរនិងបរទេសដែលយើងបានធ្លាប់ហៅតាំងពីពេលមុនៗរហូត មកដល់បច្ចុប្បន្ន។
ការណែនាំរបស់ប្រមុខក្រសួងការពារជាតិ បានធ្វើឡើងនៅក្នុងកិច្ចប្រជុំគណៈកម្មាធិការជាតិសន្តិសុខលម្ហសមុទ្រ អំពីសមិទ្ធផលការងារប្រចាំឆ្នាំ ២០២០- ២០២១ តាមប្រព័ន្ធវីដេអូនៅថ្ងៃទី ១៦ ខែ វិច្ឆិកា ឆ្នាំ២០២១។
សម្តេចពិជ័យសេនា ទៀ បាញ់ បានមានប្រសាសន៍ថា កិច្ចប្រជុំរបស់គណៈកម្មាធិការជាតិសន្តិសុខលម្ហសមុទ្រត្រូវបានអាក់ ខានចាប់តាំងពីចុងឆ្នាំ២០១៩ ដោយសារការឆ្លងរីករាលដាលនៃជំងឺកូវីដ-១៩ ជាសាកលប៉ុន្តែជំងឺកូវីដ-១៩មិនអាចបញ្ឈប់ នូវសកម្មភាពរបស់គណៈកម្មាធិការជាតិសន្តិសុខលម្ហសមុទ្របានទេរ ។ ជាក់ស្តែងបណ្តា ក្រសួង ស្ថាប័នរបស់រាជរដ្ឋា ភិបាល និង អគ្គលេខាធិការដ្ឋាន នៃគណៈកម្មាធិការជាតិសន្តិសុខលម្ហសមុទ្រ នៅតែដំណើរទៅមុខជាបន្តបន្ទាប់ ទៅតាមការប្រគល់ភារកិច្ច ។
ក្នុងឱកាសនេះដែរសម្តេចពិជ័យសេនា បានកោតសរសើរនិងវាយតម្លៃខ្ពស់ចំពោះ អគ្គលេខាធិការដ្ឋាននៃគណៈកម្មាធិការ ជាតិសន្តិសុខលម្ហសមុទ្រ រួមទាំង ឯកឧត្តម លោកជំទាវ ជាសមាជិក សមាជិកា និង អភិបាល ខេត្តទាំងបួនដែលបាន ចូលរួមយ៉ាងសកម្មខិតខំអនុវត្តការងារសម្រេចបានលទ្ធផលជាបន្តបន្ទាប់ក្នុងពេលកន្លងមក។
ឯកឧត្តមនាយឧត្តមនាវី ទៀ វិញ អគ្គមេបញ្ជាការរងមេបញ្ជាការកងទ័ពជើងទឹកនិងជាអគ្គលេខាធិការនៃគណៈកម្មាធិការ ជាតិសន្តិសុខលម្ហសមុទ្របានគូសបញ្ជាក់ថា ក្នុងរយៈពេលពីរឆ្នាំ នេះអគ្គលេខាធិការដ្ឋានជាសេនាធិការនៃគណ:កម្មាធិការ ជាតិសន្តិសុខលម្ហសមុទ្រ រួមជាមួយនឹងទីបញ្ជាការជួរមុខ ដែលជាប្រតិបត្តិករ បានបំពេញនូវភារកិច្ចស្នូលក្នុងកិច្ចការ សម្របសម្រួលកិច្ចប្រតិបត្តិការ នៃកម្លាំងចម្រុះរបស់បណ្តាស្ថាប័នជំនាញពាក់ព័ន្ឋទៅតាមផែនការសកម្មភាពក៏ ដូចជាផែនការយថាភាពយ៉ាងសកម្ម ខ្ជាប់ខ្ជួន និងមានប្រសិទ្ឋភាព។
ឯកឧត្តម ទៀ វិញ បានបញ្ជាក់ថា ពិនិត្យជារួមឆ្នាំ២០២០ និងឆ្នាំ២០២១ នេះយើងរក្សាបាននូវសុខសុវត្ថិភាព សន្តិសុខលើ ផ្ទៃសមុទ្របង្កលក្ខណៈអំណោយផល ដល់ជីវភាពរស់នៅ ការប្រកបអាជីវកម្មនេសាទរបស់ប្រជាពល រដ្ឋនិងធានាបាន សុវត្ថិភាពដល់ការងារដឹកជញ្ជូនតាមផ្លូវសមុទ្របណ្តាសកម្មភាពល្មើសច្បាប់នានាបានថយចុះមកនៅកម្រិតទាបបំផុត។ ទោះបីជាប្រឈមនឹងកង្វះខាតទាំងឡាយជាពិសេស គឺធនធានសម្ភារបច្ចេកទេស គ្រឿងបំពាក់ ក៏ដូចជាសមត្ថភាព នៃធនធានមនុស្ស នៅមានកំរិត ប៉ុន្តែអាស្រ័យដោយមានសាមគ្គីភាពរឹងមាំ និងការសហការគ្នាបានល្អ លើសពីនេះទៀត ដោយបាន ការដឹកនាំចង្អុលបង្ហាញផ្តល់ការគាំទ្រ និងលើកទឹកចិត្ត ជាប់ជានិច្ចដល់អគ្គលេខាធិការដ្ឋាន ពីសំណាក់ សម្តេចពិជ័យសេនា ស្ថាប័នជំនាញទាំងឡាយបានសហការបំពេញភារកិច្ចរបស់ខ្លួនទទួលបានលទ្ធផលល្អប្រសើរ។
រីឯឯកឧត្តមឧត្តមសេនីយ៍ឯក សួន សំណាង សមាជិកប្រចាំការគណ:កម្មាធិការជាតិសន្តិសុខលម្ហសមុទ្រអគ្គលេខាធិការ រងនិងជាប្រធានក្រុមការងារបច្ចេកទេសគណ:កម្មាធិការជាតិសន្តិសុខលម្ហសមុទ្របានបង្ហាញជូនកិច្ចប្រជុំស្ដីពីសមិទ្ធផលការងារ ឆ្នាំ២០២០- ២០២១ របស់ គណ:កម្មាធិការជាតិសន្តិសុខលម្ហសមុទ្រ ដែលក្នុងនោះរួមមាន ការផ្ទៀងផ្ទាត់និង រាប់ចំនួនកោះដែលបានបញ្ចប់ទាំងស្រុងដោយមានការឯកភាពនិងចុះហត្ថលេខាដោយអភិបាលនៃគណៈអភិបាលខេត្តទាំង៤ ជាមួយ នឹង ប្រធានក្រុមការងារបច្ចេកទេស គណ:កម្មាធិការជាតិសន្តិសុខលម្ហសមុទ្រ ការងារជំនាញផ្នែកមុជទឹក ការហ្វឹកហ្វឺន ការជួយសង្គ្រោះ ការរួមចំណែកក្នុងការស្រាវជ្រាវ និងគាំពារបរិស្ថាន និងការពង្រីកកិច្ចសហប្រតិបត្តិការ ជាមួយដៃគូជាតិនិងអន្តរជាតិ។ របាយការណ៍ក៏បានបង្ហាញពីលទ្ធផល នៃការសាងសង់ស្នាក់ការ និង ផែនៅកោះពោធិ៍ក្នុង ខេត្តកែប ដែលបានបញ្ចប់ជាស្ថាពរ សំណង់អគារទីបញ្ជាការជួរមុខថ្មី(កោះព្រាប)ដែលសាងសង់សម្រេចបាន៨០ភាគរយ និង ការចូលរួមបង្ក្រាបបទល្មើសនេសាទ បទល្មើសគ្រឿងញៀន ការតាមស្វែងរកនាវាលួចដឹកប្រេងឆៅ អិម ធី ស្តូវ៉ូឡូ (MT Stovolos ) និង ការពារសុវត្ថិភាពនៅកន្លែងបូមប្រេងនិងនាវាផលិតកម្ម៕
ដោយៈពលជ័យ
