សហភាពអឺរ៉ុបព្រមដាក់ទណ្ឌកម្មថ្មីលើបេឡារូស ខណៈដែលវិបត្តិព្រំដែនកាន់តែស្មុគស្មាញ
កាលពីថ្ងៃចន្ទ ទី១៥ វិច្ឆិកាសហភាពអឺរ៉ុបបានយល់ព្រមដាក់ទណ្ឌកម្មថ្មីលើគោលដៅក្នុងប្រទេសបេឡារូស ជុំវិញវិបត្តិនៅព្រំដែនប្រទេសប៉ូឡូញ លីទុយអានី និងឡាតវី។
ជនអន្តោប្រវេសន៍រាប់ពាន់នាក់ ដែលចង់ធ្វើអន្តោប្រវេសន៍ទៅរស់នៅក្នុងសហភាពអឺរ៉ុប គឺកំពុងជាប់ក្នុងស្ថានភាពដ៏លំបាកនៅតំបន់សនៃព្រំដែនរវាងប្រទេសទាំងបីខាងលើជាមួយនឹងប្រទេសបេឡារូស ខណៈជម្លោះរវាងសហភាពអឺរ៉ុប និងប្រទេសបេឡារូសកើនកម្ដៅ។
សហភាពអឺរ៉ុបបានចោទប្រកាន់ប្រទេសបេឡារូសថាបានរៀបចំវិបត្តិព្រំដែននេះ ដើម្បីសងសឹកការដាក់ទណ្ឌកម្មរបស់លោកខាងលិច។ ប្រធានគោលនយោបាយការបរទេសសហភាពអឺរ៉ុបលោកចូសេប បូរេលបាននិយាយថាទណ្ឌកម្មថ្មីនេះនឹងត្រូវដាក់ទៅលើបុគ្គល និងនីតិបុគ្គលបេឡារូសមួយចំនួនដែលបាន «ជួយសម្របសម្រួលការឆ្លងដែនខុសច្បាប់ចូលសហភាពអឺរ៉ុប»។
ប្រទេសបេឡារូសបានច្រានចោលការចោទប្រកាន់នេះ ហើយបានគំរាមធ្វើការឆ្លើយតបទៅនឹងវិធានការថ្មីណាមួយ ដូចជាការបិទការផ្គត់ផ្គង់ឧស្ម័នធម្មជាតិរុស្សីទៅសហភាពអឺរ៉ុប តាមរយៈបំពង់បង្ហូរឆ្លងកាត់ដែនដីរបស់ខ្លួន។
យ៉ាងណាមិញសហរដ្ឋអាមេរិកក៏បានប្រកាសថាខ្លួនស្របជាមួយសហភាពអឺរ៉ុបក៏កំពុងរៀបចំទណ្ឌកម្មថ្មីទៅលើប្រទេសបេឡារូសផងដើរ ជុំវិញអ្វីដែលពួកអ្វីដែលពួកគេនិយាយថាជាវិបត្តិ «អមនុស្សធម៌»៕
ប្រភព៖ Aljazeera
