អតីតទីប្រឹក្សាលោកត្រាំ បង្ហាញខ្លួននៅតុលាការសហព័ន្ធពាក់ព័ន្ធនឹងព្រឹត្តិការណ៍កុប្បកម្ម ៦មករា
លោក Steve Bannon អតីតទីប្រឹក្សារបស់អតីតប្រធានាធិបតីសហរដ្ឋអាមេរិក ដូណាល់ ត្រាំ បានបង្ហាញខ្លួននៅតុលាការសហព័ន្ធ កាលពីថ្ងៃច័ន្ទកន្លងទៅ ក្រោយពីលោករងការជាប់ចោទកាលពីសប្ដាហ៍មុន។
បុរសវ័យ ៦៧ឆ្នាំរូបនេះបានរងការជាប់ចោទចំនួន ២ករណី ដោយមួយករណីគឺ ចោទប្រកាន់ថា លោកមិនបានបង្ហាញខ្លួនក្នុងការស្បថធ្វើសាក្សី ហើយមួយករណីទៀតគឺ លោកត្រូវបានរងការជាប់ចោទថា បដិសេធមិនបានដាក់ឯកសារទៅកាន់គណៈកម្មការស៊ើបអង្កេតការវាយប្រហារនៅអគារសភាអាមេរិក កាពីតូល របស់សភាអាមេរិក។
បទល្មើសនីមួយៗអាចប្រឈមមុខនឹងជាប់ពន្ធនាគារយ៉ាងតិច ៣០ថ្ងៃ និងយ៉ាងច្រើនបំផុត ១ឆ្នាំ ហើយអាចពិន័យ ១០ម៉ឺនដុល្លារ។
កាលពីថ្ងៃច័ន្ទកន្លងទៅ អយ្យការមិនបានបង្គាប់ឱ្យចាប់ខ្លួន លោក Bannon នោះទេ តែលោកត្រូវផ្ដល់លិខិតឆ្លងដែនទៅឱ្យតុលាការ ហើយព្រមព្រៀងឱ្យតុលាការត្រួតពិនិត្យពីស្ថានភាពរបស់លោករៀងរាល់សប្ដាហ៍។ បន្ថែមពីនេះទៅទៀត លោកត្រូវតែផ្ដល់ព័ត៌មានអំពីការធ្វើដំណើររបស់លោកទៅកាន់តុលាការផងដែរ។
លោកនឹងការពារខ្លួននៅក្នុងតុលាការម្ដងទៀត នៅថ្ងៃព្រហស្បតិ៍ខាងមុខ។
មុនពេលនឹងចូលក្នុងតុលាការ លោកបានចូលខ្លួនទៅកាន់ការិយាល័យស៊ើបអង្កេតសហព័ន្ធ FBI។ ក្រោយមក លោកក៏បានប្រកាសក្ដែងៗប្រាប់អ្នកកាសែតថា៖ «យើងផ្ដួលរលំរបបលោក បៃដិន»។
កាលពីថ្ងៃទី៦ ខែមករា មានព្រឹត្តិការណ៍កុប្បកម្មចូលទៅក្នុងវិមានសភាអាមេរិក ឬ គេហៅថា អគារកាពីតូល។ កុប្បកម្មបង្កឡើងដោយអ្នកដែលមិនពេញចិត្តនឹងលទ្ធផលនៃការបោះឆ្នោតខែវិច្ឆិកា ឆ្នាំ២០២០ ដោយកាលនោះលោក ចូ បៃដិន បានយកឈ្នះលើលោក ដូណាល់ ត្រាំ៕
ប្រភព៖ CNN
