មន្រ្តីជាន់ខ្ពស់អាកាសចរណ៍ស៊ីវិលព្យាករថា ការងើបឡើងវិញនៃវិស័យអាកាសចរណ៍នៅកម្ពុជា នឹងមានទំនោរលឿនជាងការរំពឹងទុក
ភ្នំពេញ៖ ស្របពេលដែលរាជរដ្ឋាភិបាលកំពុងតែជំរុញការសម្រួលការធ្វើដំណើរឆ្លងប្រទេសតាម «គន្លងថ្មី» ជាមួយនឹងវត្តមាននៃជំងឺកូវីដ-១៩នោះ អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលឯកឧត្តម ស៊ិន ចាន់សិរីវត្ថា បានថ្លែងថា កត្តានេះគួបផ្សំនឹងលក្ខខណ្ឌវេជ្ជសាស្រ្តជាច្រើនទៀត នឹងនាំឱ្យវិស័យហោះហើររបស់ប្រទេសអាចងើបឡើងវិញ ជាងអ្វីដែលត្រូវបានរំពឹងទុកកាលពីមុន។
ឯកឧត្តមបន្តថា ការបន្ធូរបន្ថយការរឹតត្បិតការធ្វើដំណើរចូលប្រទេសរបស់រដ្ឋាភិបាល ជាពិសេសការលើកលែងការធ្វើចត្តាឡីស័កសម្រាប់អ្នកដំណើរដែលចាក់វ៉ាក់សាំងរួច នឹងទាក់ទាញទេសចរណ៍បរទេសចូលមកកម្ពុជា ប៉ុន្តែសម្រាប់វិស័យអាកាសចរណ៍ វិធានការនេះមិនទាន់មានផលវិជ្ជមានភ្លាមៗនោះទេ។ អ្នកនាំពាក្យរូបនេះក៏បានព្យាករណ៍ដែរថា ការងើបឡើងវិញនៃវិស័យអាកាសចរណ៍នៅកម្ពុជា នឹងមានទំនោរលឿនជាងការរំពឹងទុកកាលពីមុន ពោលគឺវិលត្រលប់ទៅរកស្ថានភាពមុនឆ្នាំ ២០១៩ វិញ។ ឯកឧត្តមបន្ថែមថា កាលពីមុន ខ្ញុំយល់ថា វាអាចរហូតដល់ឆ្នាំ ២០២៤ ឬ ២០២៥ ដើម្បីវិស័យអាកាសចរណ៍ងើបឡើងវិញ ក៏ប៉ុន្តែរបកគំហើញនានាដូចជាវ៉ាក់សាំង និងថ្នាំព្យាបាលនានា វាមានល្បឿនលឿន ហើយការចាក់វ៉ាក់សាំងមានការគ្រប់ដណ្តប់ខ្ពស់ ដូច្នេះរយៈពេលនេះអាចធ្លាក់ចុះមកត្រឹម ២០២៣ ឬដើមឆ្នាំ ២០២៤ វិញ។ ទោះជាយ៉ាងណា វាមិនអាចដូចឆ្នាំ ២០១៩ ទាំងស្រុងនោះទេ ព្រោះវាជារបៀបរស់នៅថ្មី វាអាចបានត្រឹម ៧០ភាគរយប៉ុណ្ណោះ»។
គួរកត់សម្គាល់ថា ក្រុមហ៊ុនអាកាសយានដ្ឋានកម្ពុជា ដែលប្រតិបត្តិការអាកាសយានដ្ឋានអន្តរជាតិភ្នំពេញ សៀមរាប និងក្រុងព្រះសីហនុ បានបន្តផ្តល់សេវាពាណិជ្ជកម្ម ទំនិញ ពាណិជ្ជកម្ម និងជើងហោះហើរមនុស្សធម៌ ក្នុងអំឡុងពេលជំងឺរាតត្បាតកូវីដ-១៩ ទោះបីតម្រូវការធ្លាក់ចុះក៏ដោយ។ ទិនុ្នន័យបានបង្ហាញថា ការហោះហើរអ្នកដំណើរចាប់ពីខែមករា ដល់ខែកញ្ញា នៅអាកាសយានដ្ឋានទាំងបី គឺទាបជាងរយៈពេលដូចគ្នាក្នុងឆ្នាំ ២០២០ ប្រមាណ ៩១,២ ភាគរយ និង ៩៧,៩ភាគរយ ទាបជាងខែមករា ដល់ខែកញ្ញា ឆ្នាំ ២០១៩។ ចលនាហោះហើរក្នុងរយៈពេលប្រាំបួនខែដំបូង ឆ្នាំ ២០២១ បានធ្លាក់ចុះ ៧០,១ភាគរយ បើធៀបនឹងឆ្នាំមុន។ បរិមាណទំនិញកើនឡើង ៣០,៩ភាគរយ ដែលភាគច្រើនឆ្លងកាត់អាកាសយានដ្ឋានអន្តរជាតិភ្នំពេញ៕
