ការប៉ះទង្គិចគ្នាដោយហិង្សាផ្ទុះឡើងក្នុងបាតុកម្មប្រឆាំងនឹងការបិទប្រទេសនៅអឺរ៉ុប
ការប៉ះទង្គិចគ្នាដោយហិង្សាផ្ទុះឡើង ក្នុងអំឡុងបាតុកម្មប្រឆាំងនឹងការបិទប្រទេសនៅអឺរ៉ុបរបស់កាលពីចុងសប្ដាហ៍ ខណៈរដ្ឋាភិបាលនានាចេញវិធានការទប់ស្កាត់ការរាតត្បាតនៃជំងឺកូវីដ១៩ដែលកំពុងបន្តកើនឡើងក្នុងទ្វីប។
វីដេអូជាច្រើនពីកន្លែងដែលកុបកម្មផ្ទុះឡើងនាទីក្រុងឡាអេកាលពីថ្ងៃសៅរ៍ បង្ហាញពីប៉ូលិសដាក់ពង្រាយកាណុងបាញ់ទឹក និងចាប់ខ្លួនក្រុមបាតុករ។ ហូឡង់ចេញវិធានការបិទផ្នែកខ្លះនៃប្រទេសរយៈពេលបីសប្ដាហ៍ ហើយគ្រោងនឹងហាមឃាត់អ្នកដែលមិនបានចាក់វ៉ាក់សាំង មិនឱ្យចូលទៅក្នុងកន្លែងកម្មវិធីមួយចំនួន។
យោងតាមសេចក្ដីថ្លែងការណ៍របស់ប៉ូលីស មន្ត្រីប៉ូលិស៥នាក់រងរបួសក្នុងអំឡុងពេលប៉ះទង្គិចគ្នានៅទីក្រុងឡាអេ ដោយម្នាក់ត្រូវបានបញ្ជូនទៅមន្ទីរពេទ្យ និងពីរនាក់រងរបួសដោយសារសម្លេងបាញ់កាំជ្រួចខ្លាំងៗ។ ដោយនិយាយថាមនុស្ស ១៩ នាក់ត្រូវបានចាប់ខ្លួន ប៉ូលីសបន្តថា៖ «ក្រុមនេះ[បាតុករ]ចាប់ផ្តើមបាញ់បំផ្លិចបំផ្លាញ វាយអ្នកបើកបរ និងគប់ដុំថ្ម និងកាំជ្រួចយ៉ាងខ្លាំងដាក់ប៉ូលិស»។
ការតវ៉ាដូចគ្នាផ្ទុះឡើងក្នុងប្រទេសជាច្រើនទៀតនៅអឺរ៉ុបដូចជាស្វីស អូទ្រីស អ៊ីតាលី រួមទាំងក្រូអាស៊ី ក្រោយរដ្ឋាភិបាលដាក់វិធានការបិទខ្ទប់ តម្រូវប័ណ្ណវ៉ាក់សាំងមុនចូលទីសាធារណៈ និងកាតព្វកិច្ចចាក់វ៉ាក់សាំង ដោយលើកឡើងថាវារំលោភអំណាចសម្រេចផ្ទាល់ខ្លួនរបស់ប្រជាពលរដ្ឋ និងមានលក្ខណៈបែបផ្ដាច់ការជាដើម។
អូទ្រីសចាប់ផ្ដើមបិទប្រទេសនៅថ្ងៃចន្ទ ហើយកាតព្វកិច្ចចាក់វ៉ាក់សាំងនឹងចាប់ផ្ដើមអនុវត្តនៅដើមខែកុម្ភៈឆ្នាំក្រោយ។ នៅរដ្ឋធានីវីយែន មនុស្សប្រមាណជាង ៤០ ០០០ នាក់ប្រមូលផ្តុំគ្នានៅតាមដងផ្លូវដែលជាការតវ៉ាដ៏ធំបំផុតរបស់ប្រទេសតាំងពីវីរុសរាលដាលនៅអឺរ៉ុប ដើម្បីប្រឆាំងនឹងវិធានការទាំងនេះ។ អំពើហិង្សាក៏ផ្ទុះឡើងនៅពេលដែលប៉ូលីសព្យាយាមបំបែបហ្វូងបាតុករ។
នៅរដ្ឋធានីហ្សាហ្គ្រេបឯណោះវិញ អ្នកតវ៉ាជាង ១៥ ០០០ នាក់ប្រមូលផ្ដុំគ្នាកាលពីថ្ងៃសៅរ៍ក្នុងគោលបំណងស្រដៀងគ្នា គឺប្រឆាំងនឹងវិធានការរបស់រដ្ឋាភិបាលក្រូអាស៊ីដែលតម្រូវឱ្យមានប័ណ្ណវ៉ាក់សាំងមុនចូលអាគារសាធារណៈផ្សេងៗ ដោយអះអាងថាធ្វើឱ្យមានការរឹតត្បិតសេរីភាពរបស់ប្រជាជន។
