នាយករដ្ឋមន្ត្រីថៃជួបជាមួយនាយករងភ្នាក់ងារចារកម្មអាមេរិក CIA ដោយសម្ងាត់
លោកនាយករដ្ឋមន្ត្រីថៃ ប្រាយុទ្ធ ចាន់អូឆា បានជួបជាមួយនាយករងនៃភ្នាក់ងារចារកម្មមជ្ឈិមរបស់សហរដ្ឋអាមេរិក ឬ ហៅកាត់ថា CIA លោក ដេវីដ ខូហេន (David Cohen) កាលពីថ្ងៃសុក្រសប្ដាហ៍មុន។ នេះបើតាមការចុះផ្សាយរបស់សារព័ត៌មានបាងកកប៉ុស្តិ៍។
ប្រភពខាងលើបានឱ្យដឹងថា ជំនួបរវាងលោក ប្រាយុទ្ធ និងលោក ខូហេន បានប្រព្រឹត្តិទៅដោយសម្ងាត់អស់រយៈពេលប្រមាណ ៤៥នាទី ដោយក្រុមអ្នកសារព័ត៌មានត្រូវបានក្រុមសន្តិសុខហាមឃាត់មិនឱ្យទៅយកព័ត៌មានឡើយ។
តែទោះជាយ៉ាងណា រហូតមកទល់ពេលនេះ មិនទាន់មានសេចក្ដីថ្លែងការណ៍ណាមួយចេញពីរដ្ឋាភិបាលថៃ ឬ ក៏ស្ថាប័ន CIA ផ្ទាល់នោះទេ។
យ៉ាងណាមិញ បើយោងតាមប្រភពរបស់រដ្ឋាភិបាលថៃ ដែលចុះផ្សាយដោយសារព័ត៌មានបាងកកប៉ុស្តិ៍ លោក ប្រាយុទ្ធ និងលោក ខូហេនបានពិភាក្សាគ្នាពីប្រធានបទពាក់ព័ន្ធនឹងសន្តិសុខនៅក្នុងតំបន់ និងក្នុងប្រទេសថៃ ដោយក្នុងនោះបញ្ហាមីយ៉ាន់ម៉ាក៏បានលើកយកពិភាក្សាផងដែរ។
ទាក់ទិននឹងស្ថានភាពនៅមីយ៉ាន់ម៉ា ប្រភពពីវិមានរដ្ឋាភិបាលថៃបានឱ្យដឹងថា ភាគីទាំងពីរបាននិយាយអំពីលទ្ធភាពក្នុងការផ្ដល់ជំនួយមនុស្សធម៌ទៅកាន់ប្រទេសអាស៊ីអាគ្នេយ៍មួយនេះ។
ជំនួបនេះធ្វើឡើងគាប់ជួនក្រោយពេលដែល លោក ដន ប្រាមុដវិណៃ (Don Pramudwinai) បានទៅធ្វើទស្សនកិច្ចទៅកាន់មីយ៉ាន់ម៉ា ហើយក៏ទៅចូលជួបជាមួយលោក មីន អ៊ុងឡាំង ប្រមុខយោធាមីយ៉ាន់ម៉ាទៀតផង។
ក្នុងអំឡុងដំណើរទស្សនកិច្ចរបស់រដ្ឋមន្ត្រីថៃទៅមីយ៉ាន់ម៉ា ខាងថៃបានបរិច្ចាគវ៉ាក់សាំងកូវីដ-១៩ ទៅកាន់ប្រទេសនេះទៀតផង។ ស្របពេលដែលមានព្រឹត្តិការណ៍លាក់លៀមដូច្នេះ បណ្ដាលឱ្យភាគីពាក់ព័ន្ធមួយចំនួននៅថៃបានអំពាវនាវឱ្យខាងរដ្ឋាភិបាលមានតម្លាភាពជាងនេះ។
ក្រៅពីបញ្ហានៅមីយ៉ាន់ម៉ា ភាគីទាំងពីរបានពិភាក្សាគ្នាអំពីទំនាក់ទំនងទ្វេភាគីនានា ហើយជាពិសេស ខាងអាមេរិកបានបង្ហាញពីការគាំទ្រចំពោះថៃ ក្នុងការទទួលបានសិទ្ធិជាម្ចាស់នៃកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) នៅឆ្នាំ២០២២។
បន្ថែមពីនេះទៀត បញ្ហានៅក្នុងស្រុកថៃក៏លើកមកនិយាយបន្តិចផងដែរ។ នេះបើតាមប្រភពពីវិមានរដ្ឋាភិបាលថៃ។
នៅមួយរយៈចុងក្រោយ រាជធានីបាងកកមានការតវ៉ា និងបាតុកម្មនានា ដែលទាមទារឱ្យមានកំណែទម្រង់ស្ថាប័នព្រះមហាក្សត្រថៃ ក៏ដូចជាទាមទារឱ្យលោកប្រាយុទ្ធចុះចេញពីតំណែង។
ទោះជាយ៉ាងណាក៏ដោយ ខាងថៃបានស្នើទៅកាន់ខាងអាមេរិក ឱ្យយោគយល់ពីបរិបទក្នុងស្រុករបស់ខ្លួន។
បន្ទាប់ពីមកដល់ស្រុកថៃហើយ លោក ខូហេន គ្រោងនឹងធ្វើដំណើរទស្សនកិច្ចទៅកាន់ប្រទេសចំនួន ២ផ្សេងទៀតនៅតំបន់អាស៊ីអាគ្នេយ៍។ នេះបើតាមប្រភពពីខាងថៃ ប៉ុន្តែមិនបានបង្ហើបប្រទេសទាំង ២ទៀតនោះ ជាប្រទេសណាទេ។
ក្រោយមកលោក ស៊ូប៉ូត ម៉ាឡានីយ៉ូម (Supoj Malaniyom) អគ្គលេខាធិការនៃក្រុមប្រឹក្សាសន្តិសុខជាតិថៃចេញមុខមកបញ្ជាក់ប្រាប់អ្នកសារព័ត៌មានថា នាយករដ្ឋមន្ត្រីថៃ ពិតជាមានជំនួបជាមួយនាយករង CIA ពិតមែន។ លោកបានលើកឡើងថា កិច្ចពិភាក្សានេះធ្វើឡើង ដើម្បីពង្រឹងចំណងសន្តិសុខរវាងថៃ និងប្រទេសសមាជិកអាស៊ានផ្សេងទៀត។
លោក ស៊ូប៉ូត គូសបញ្ជាក់ថា ជំនួបនេះជារឿងធម្មតាទេសម្រាប់អាមេរិក និងថៃ ដោយភាគីទាំងពីរត្រូវចែករំលែកព័ត៌មានគ្នាទៅវិញក្នុងមួយឆ្នាំម្ដង ហើយក៏ដើម្បីជាការរឹតចំណងរវាងស្ថាប័នរបស់អាមេរិក និងស្ថាប័នរបស់ថៃផងដែរ។
សារព័ត៌មានបាងកកប៉ុស្តិ៍បានចុះផ្សាយថា លោក ខូហេន ក្រៅពីជួបលោក ប្រាយុទ្ធ លោកក៏បានជួបជាមួយ លោក ស៊ូប៉ូត ផ្ទាល់តែម្ដង និងឧបនាយករដ្ឋមន្ត្រីថៃទទួលបន្ទុកកិច្ចការសន្តិសុខ លោក ប្រាវីត វង្សស៊ូវ៉ុន (Prawit Wongsuwon)។
បន្តមកទៀត លោក ប្រាវីត បានអះអាងថា ជំនួបរបស់លោក និងនាយករង CIA ជាជំនួបឯកជនតែប៉ុណ្ណោះ ដោយលោកធ្លាប់ស្គាល់មន្ត្រីអាមេរិករូបនេះ។ ឧបនាយករដ្ឋមន្ត្រីថៃរូបនេះមិនបានពិភាក្សារឿងសន្តិសុខជាមួយ CIA អាមេរិកឡើយ ខណៈកិច្ចការរដ្ឋទាំងអស់ត្រូវបានពិភាក្សាជាមួយលោកនាយករដ្ឋមន្ត្រី ប្រាយុទ្ធ រួចស្រេចទៅហើយ៕