រូបិយប័ណ្ណតួកគី Lira ធ្លាក់ចុះធ្វើឱ្យមានការងឿងឆ្ងល់ និងកំហឹងពីបក្សប្រឆាំង
ការធ្លាក់ចុះនៃតម្លៃរូបិយប័ណ្ណលីរ៉ា(Lira) រហូតដល់ ១៥ ភាគរយធៀបនឹងប្រាក់ដុល្លារកាលពីថ្ងៃអង្គារ បង្ករឱ្យមានការងឿងឆ្ងល់ក្នុងចំណោមប្រជាជនតួកគី និងកំហឹងពីគណបក្សប្រឆាំងរបស់ប្រទេសដែលនិយាយថាតួកគីកំពុងជួបប្រទះមហន្តរាយដ៏ខ្មៅងងឹតរបស់ខ្លួន។
លោក Kemal Kilicdaroglu មេដឹកនាំគណបក្សប្រឆាំងសាធារណៈរដ្ឋ ដែលស្តីបន្ទោសការធ្លាក់ថ្លៃរូបិយប័ណ្ណលើលោកប្រធានាធិបតី Tayyip Erdogan លើកឡើងថា៖ «មិនមានគ្រោះមហន្តរាយបែបនេះនៅក្នុងប្រវត្តិសាស្ត្រនៃសាធារណរដ្ឋនោះទេ។ នៅចំណុចនេះ អ្នក[Erdogan]ជាបញ្ហាសន្តិសុខជាតិជាមូលដ្ឋានសម្រាប់សាធារណរដ្ឋតួកគី»។
លោក Erdogan ដាក់សម្ពាធដល់ធនាគារកណ្តាលឱ្យកាត់បន្ថយអត្រាការប្រាក់ ក្នុងសកម្មភាពដែលលោកនិយាយថានឹងជំរុញការនាំចេញ ការវិនិយោគ និងការងារ។ ប៉ុន្តែអ្នករិះគន់និយាយថាវានឹងជំរុញឱ្យមានកំណើនអតិផរណាកាន់តែខ្លាំង និងធ្វើឱ្យប្រាក់ Lira ធ្លាក់ចុះយ៉ាងជ្រៅធ្វើឱ្យប៉ះពាល់ដល់ប្រាក់ចំណូលរបស់ប្រជាជនតួកគី។
អ្នកទិញទំនិញនៅផ្សារទំនើបកណ្តាលទីក្រុងអង់ការ៉ានិយាយថា ពួកគេមិនអាចដកភ្នែកចេញពីអត្រាប្រាក់លីរ៉ា ដែលធ្លាក់ចុះ ១៣,៤៥ ក្នុងមួយដុល្លារកាលពីថ្ងៃអង្គារបានទេ។ អត្រាប្រាក់លីរ៉ាឡើងដល់ ៨ ក្នុងមួយដុល្លារកាលឆ្នាំមុន, ៩ ក្នុងមួយដុល្លារកាលខែមុន និង ១០ ក្នុងមួយដុល្លារកាលខែមុន។
បុគ្គលិកទីភ្នាក់ងារផ្សាយពាណិជ្ជកម្មវ័យ ២៨ ឆ្នាំម្នាក់ ឈ្មោះ Selin និយាយថា៖ «ខ្ញុំមិនអាចធ្វើការដោយមិនតាមដានប្រាក់ដុល្លារទេ។ ខ្ញុំមើលលុយក្នុងកាបូបខ្ញុំរាល់ថ្ងៃ ហើយធ្វើការគណនាពីតម្លៃប្ដូរប្រាក់យ៉ាងហោចណាស់ ១០០ ដងទម្រាំបើកប្រាក់ខែ។ សូម្បីតែទិញក្រដាសអនាម័យដាក់បន្ទប់ ក៏ខ្ញុំត្រូវតែគិតឱ្យមានបានហ្មតចត់ដែរ»។
អតីតនាយករដ្ឋមន្ត្រីតួកគីលោក Ahmet Davutoglu ដែលជាសមាជិកស្ថាបនិកនៃគណបក្ស AK កាន់អំណាចរបស់លោក Erdogan ហើយបន្ទាប់មកបែកចេញបង្កើតគណបក្សផ្ទាល់ខ្លួនហៅវិធានការសេដ្ឋកិច្ចរបស់ប្រធានាធិបតីថាជា «ការក្បត់ជាតិ និងមិនមែនជាភាពល្ងង់ខ្លៅទេ»។
លោក Kilicdaroglu និងលោក Davutoglu និងមេដឹកនាំបក្សប្រឆាំងមួយចំនួនផ្សេងទៀត ប្រកាសកិច្ចប្រជុំបន្ទាន់ដើម្បីពិភាក្សាអំពីរូបិយប័ណ្ណបន្ទាប់ពីការធ្លាក់ចុះកាលពីថ្ងៃអង្គារ ដែលជាការធ្លាក់ចុះដ៏ធំបំផុតទីពីររបស់រូបិយប័ណ្ណលីរ៉ាមិនធ្លាប់មាន។
លោក Erdogan ការពារគោលនយោបាយរបស់លោកកាលពីល្ងាចថ្ងៃចន្ទ ហើយលើកឡើងថា អត្រាខ្ពស់នឹងមិនធ្វើឱ្យអតិផរណាធ្លាក់ចុះនោះទេ ដែលជាទស្សនៈខុសប្រក្រតីដែលលោកធ្វើម្តងទៀតអស់ជាច្រើនឆ្នាំ។
លោកពោលបែបនេះថា៖ «ខ្ញុំច្រានចោលគោលនយោបាយណាដែលបំបែកប្រទេសរបស់យើង និធ្វើឱ្យចុះខ្សោយ ថ្កោលទោសប្រជាជនចំពោះភាពអត់ការងារធ្វើ ភាពអត់ឃ្លាន និងភាពក្រីក្រជាដើម»។