កម្មវិធីរបស់ UN ធ្វើការផ្តល់ជំនួយជាសាច់ប្រាក់ដល់គ្រួសារអាហ្វហ្គានីស្ថានកំពុងជួបការលំបាក
កាប៊ុល៖ កម្មវិធីស្បៀងអាហារពិភពលោករបស់អង្គការសហប្រជាជាតិកាលពីថ្ងៃចន្ទនេះ ធ្វើការចែកចាយសាច់ប្រាក់នៅក្នុងរដ្ឋធានីកាប៊ុលដល់ជនជាតិអាហ្វហ្គានីស្ថានប្រហែល ៣ ០០០ គ្រួសារដែលរងផលប៉ះពាល់យ៉ាងធ្ងន់ធ្ងរដោយសារវិបត្តិមនុស្សធម៌ដែលបន្តកើនឡើងចាប់តាំងពីពួកតាលីបង់ដណ្តើមអំណាចគ្រប់គ្រង។
ទីភ្នាក់ងារជំនួយសកលមួយនេះព្រមានថា ជាងពាក់កណ្តាលនៃចំនួនប្រជាជន ៣៨ លាននាក់របស់អាហ្វហ្គានីស្ថាននឹងប្រឈមមុខនឹងភាពអត់ឃ្លានក្នុងរដូវរងានេះ។
នាង Bassana វ័យ ២០ ឆ្នាំ និងរស់នៅជាមួយគ្រួសារមួយមានសមាជិក ១០ នាក់និយាយថា៖ «ខ្ញុំមិននឹកស្មានថាថ្ងៃណាមួយ ខ្ញុំនឹងអង្គុយជាជួរស្វែងរកជំនួយដូចនេះសោះ»។ ដោយទទួលបាន ៧៤ ដុល្លារពីទីភ្នាក់ងារដូចអ្នកដទៃទៀតដែរ នាងបន្តថា៖ «យើងនឹងទិញអាហារជាមុនសិន ដើម្បីកុំឲ្យឃ្លានរហូតដល់ស្លាប់»។
លោក Azimullah Fazlyar ដែលជួយចែកចាយប្រាក់នោះនិយាយថា ប្រហែល ៥០ ០០០ ទៅ ៦០ ០០០ គ្រួសារកំពុងត្រូវការជំនួយក្នុងទីក្រុងកាប៊ុល ហើយកម្មវិធីរបស់ UN បានកំណត់អត្តសញ្ញាណគ្រួសារដែលរងគ្រោះខ្លាំងបំផុតចំនួន ៣ ០០០។ លោកបន្តថា៖ «ពួកគេអាចប្រើលុយក្នុងរដូវរងាដើម្បីទិញឈើ ឬអ្វីផ្សេងទៀតដែលពួកគេត្រូវការ»។
អ្នកដែលទទួលបានជំនួយភាគច្រើន មកពីគ្រួសារដែលមានអ្នករកស៊ីចិញ្ចឹមបាត់បង់ការងារចាប់តាំងពីពួកតាលីបង់ឡើងកាន់ដំណែង។ អតិផរណា និងភាពអត់ការងារធ្វើ កើនឡើងក្នុងប្រទេសអាហ្វហ្គានីស្ថាន ហើយជំនួយអន្តរជាតិដែលមានប្រមាណជាង ៧៥ ភាគរយនៃថវិការបស់រដ្ឋាភិបាលដែលគាំទ្រដោយសហរដ្ឋអាមេរិកពីមុនក៏ត្រូវអស់។
សហរដ្ឋអាមេរិក និងក្រុមតាលីបង់ គ្រោងនឹងជួបពិភាក្សាគ្នានៅសប្តាហ៍នេះក្នុងប្រទេសកាតាស្តីពីជំនួយមនុស្សធម៌ដល់អាហ្វហ្គានីស្ថាន និងបញ្ហាផ្សេងៗទៀត ខណៈដែលអង្គការជំនួយអន្តរជាតិ និងអ្នកជំនាញនិយាយថា ការដាក់ទណ្ឌកម្មរបស់សហរដ្ឋអាមេរិកលើរដ្ឋាភិបាលតាលីបង់ កំពុងធ្វើឱ្យប៉ះពាល់ដល់ប្រជាជនអាហ្វហ្គានីស្ថាន។
ប្រភព៖ CNA
