ក្រុមហ៊ុនផលិតវ៉ាក់សាំង ចាប់ផ្ដើមផ្ដោតលើការផលិតវ៉ាក់សាំងទប់ទល់នឹងវ៉ារ្យ៉ង់អូមីក្រុង
ក្រុមហ៊ុនផលិតវ៉ាក់សាំងនានារួមមាន BioNTech Moderna និង Johnson & Johnson លើកឡើងកាលពីថ្ងៃចន្ទថា ខ្លួនកំពុងធ្វើការលើវ៉ាក់សាំងកូវីដ-១៩ ដែលផ្តោតជាពិសេសទៅលើវ៉ារ្យ៉ង់អូមីក្រុង (Omicron) ដើម្បីត្រៀមដោយសារវ៉ាក់សាំងដែលខ្លួនមានស្រាប់មិនមានប្រសិទ្ធភាពលើខ្សែស្រឡាយវីរុសកូរ៉ូណាថ្មីនោះទេ។
វត្តមានវ៉ារ្យង់អូមីក្រុង បង្កឱ្យមានការឆ្លើយតបជាសកលយ៉ាងខ្លាំងនៅពេលដែលបណ្តាប្រទេសជាច្រើនព្រួយបារម្ភថា វ៉ារ្យ៉ង់នេះអាចរីករាលដាលយ៉ាងឆាប់រហ័ស សូម្បីតែប្រទេសដែលមានប្រជាជនភាគច្រើនទទួលវ៉ាក់សាំងមួយចំនួន ក៏ចេញវិធានការទប់ស្កាត់ការធ្វើដំណើរ និងចេញនូវវិធានការណ៍រឹតបន្តឹងផ្សេងទៀត។
ក្រុមហ៊ុន BioNTech ថាខ្លួនចាប់ផ្តើមធ្វើការលើវ៉ាក់សាំងដែលតម្រូវតាមវ៉ារ្យ៉ង់អូមីក្រុងរួមជាមួយនឹងក្រុមហ៊ុនដៃគូ Pfizer ។ ទន្ទឹមនឹងនេះដែរ នាយកប្រតិបត្តិក្រុមហ៊ុន Moderna លោក Stéphane Bancel និយាយថា ក្រុមហ៊ុនអាចចំណាយពេលច្រើនខែដើម្បីចាប់ផ្តើមចែកចាយវ៉ាក់សាំងបែបនេះ ដោយថាប្រសិទ្ធភាពនៃវ៉ាក់សាំងកូវីដ-១៩ដែលមានស្រាប់ស្ថិតក្នុងស្ថានភាពស្រពិចស្រពិល។
ក្រុមហ៊ុន Johnson & Johnson ឯណោះវិញ ក៏កំពុងវាយតម្លៃប្រសិទ្ធភាពនៃវ៉ាក់សាំងរបស់ខ្លួនប្រឆាំងអូមីក្រុង។ លោក Mathai Mammen ប្រធានផ្នែកស្រាវជ្រាវសកលសម្រាប់អង្គភាពឱសថរបស់ក្រុមហ៊ុននិយាយថា៖ «យើងចាប់ផ្តើមការងារដើម្បីរចនា និងបង្កើតវ៉ាក់សាំងថ្មីប្រឆាំងនឹងអូមីក្រុង ហើយនឹងរីកចម្រើនលឿនទៅក្នុងការសិក្សាគ្លីនិកប្រសិនបើចាំបាច់»។
អ្នកជំនាញខាងផ្នែកជំងឺឆ្លងនៅអាហ្វ្រិកខាងត្បូងនិយាយថា វ៉ារ្យ៉ង់អូមីក្រុងហាក់ដូចជាអាចមានលទ្ធភាពចម្លងខ្លាំងជាងវ៉ារ្យ៉ង់មុនៗ រួមទាំងចំពោះអ្នកដែលមានភាពស៊ាំពីការចាក់វ៉ាក់សាំង ឬធ្លាប់ឆ្លងពីមុនផង។
រុស្ស៊ីនិយាយកាលពីថ្ងៃចន្ទថា វ៉ាក់សាំងរបស់ខ្លួនដែលត្រូវបានបង្កើតឡើងដោយវិទ្យាស្ថាន Gamaleya ទំនងជាមានប្រសិទ្ធភាពប្រឆាំងនឹងវ៉ារ្យ៉ង់អូមីក្រុង ហើយថាខ្លួននឹងត្រៀមខ្លួនជាស្រេចក្នុងការផលិតវ៉ាក់សាំងដូសជំរុញរាប់រយលានប្រសិនបើគ្មាន។
ប្រភព៖ CNA