ខណៈពេលកំណើនប្រជាជនឥណ្ឌាមានការថយចុះ វិធានការទប់ស្កាត់ការមានកូនច្រើនដូចនៅចិនរងការចោទជាសំណួរ
ជាលើកដំបូងក្នុងរយៈពេលជាច្រើនទសវត្សរ៍មកនេះ កំណើនប្រជាពលរដ្ឋឥណ្ឌាហាក់មានភាពយឺតយ៉ាវ ដែលជាសមិទ្ធិផលមួយដែលអ្នកតស៊ូមតិអំពីវិធីសាស្រ្តស្ម័គ្រចិត្តក្នុងការធ្វើផែនការគ្រួសារនិយាយថា វិធីសាស្រ្តបង្ខិតបង្ខំដូចមានប្រើនៅប្រទេសចិនមិនចាំបាច់នោះទេ។
ទិន្នន័យពីការស្ទង់មតិសុខភាពគ្រួសារថ្នាក់ជាតិចុងក្រោយបំផុតរបស់ក្រសួងសុខាភិបាល ចេញផ្សាយកាលពីសប្តាហ៍មុនបង្ហាញថា អត្រានៃការមានកូនសរុបរបស់ឥណ្ឌាបានធ្លាក់ចុះដល់ ២,០ ក្រោមអត្រាជំនួស ២,១ ដែលត្រូវការដើម្បីរក្សាចំនួនប្រជាជនឱ្យមានស្ថេរភាព។ នៅតាមទីក្រុង កម្រិតកាន់តែទាបដោយស្រ្តីម្នាក់អាចមានកូនជាមធ្យមត្រឹមតែ ១,៦ នាក់ប៉ុណ្ណេះ។
ក្រាបប្រជាសាស្រ្តបង្ហាញថា ប្រជាជនចំនួន ១,៣ ប៊ីលាននាក់របស់ប្រទេសឥណ្ឌាជិតដល់កម្រិតកំពូលហើយ ហើយមានភាពផ្ទុយស្រឡះពីទសវត្សរ៍ឆ្នាំ ១៩៥០ នៅពេលដែលស្ត្រីម្នាក់អាចមានកូនជាមធ្យមរហូតដល់៦នាក់។ អត្រានៃការមានកូនសរុបរបស់ឥណ្ឌាក្នុងឆ្នាំ ២០១៥-១៦ ឈរនៅត្រឹម ២,២ នាក់ជាមធ្យម។ ការថយចុះអត្រានៃការមានកូន មិនមានន័យថាចំនួនប្រជាជនរបស់ឥណ្ឌាកំពុងថយចុះនោះទេ ប៉ុន្តែអត្រាកំណើនរបស់វាកំពុងថយចុះ។
អ្នកស្រី Poonam Muttreja នាយកប្រតិបត្តិនៃមូលនិធិប្រជាជននៃប្រទេសឥណ្ឌាអបអរលទ្ធផលនៃការស្ទង់មតិនេះដោយលើកឡើងពីភាពមិនចាំបាច់នៃការប្រើប្រាស់គោលនយោបាយកូនមួយដូចចិន ហើយនិយាយថា៖ «វាបង្ហាញថាអ្នកមិនចាំបាច់ប្រើកម្លាំង ឬវិធានការតឹងរ៉ឹងទេ។ អ្នកអាចធ្វើវាដោយស្ម័គ្រចិត្ត។ មនុស្សនឹងស្ម័គ្រចិត្តធ្វើអ្វីដែលសមហេតុផលសម្រាប់ពួកគេ ប៉ុន្តែអ្នកត្រូវតែគោរពពួកគេ»។
អ្នកស្រី Muttreja ថាចំណុចប្រសព្វនៃកត្តាពីរដ្ឋាភិបាលដល់ថ្នាក់ភូមិបានរួមគ្នាដើម្បីនាំមកនូវការផ្លាស់ប្តូរ ប៉ុន្តែសំខាន់បំផុតមួយគឺការកែលម្អការអប់រំ។ អ្នកស្រីនិយាយថា៖ «ការអប់រំកុមារី គឺជាវិធីពន្យារកំណើតដ៏មានប្រសិទ្ធភាពបំផុត»។ អ្នកស្រីអះអាងបែបនេះ ដោយចង្អុលទៅទិន្នន័យដែលបង្ហាញថា ស្ត្រីឥណ្ឌាដែលមានការសិក្សារយៈពេល ១២ ឆ្នាំ មានកូនមិនលើសពី ២ នាក់ ខណៈដែលអ្នកមិនទទួលបានការអប់រំមានកូនជាមធ្យម ៣ នាក់។
ថ្នាំពន្យារកំណើតក៏ជួយបានផងដែរ ដោយមាន ៦៧ ភាគរយនៃអ្នកឆ្លើយតបការស្ទង់មតិនិយាយថា ឥឡូវនេះពួកគេប្រើវាបើប្រៀបធៀបទៅនឹង ៥៤ ភាគរយក្នុងឆ្នាំ ២០១៥-១៦ ។ ការស្ទង់មតិថ្មីបង្ហាញថា ទន្ទឹមនឹងនោះ សមាមាត្រនៃមនុស្សដែលធ្វើផែនការគ្រួសារមិនបានសម្រេច ធ្លាក់ចុះពី ១៣ ភាគរយទៅ ៩ ភាគរយក្នុងរយៈពេលដូចគ្នានេះ។ ជាមួយគ្នានោះ អត្រាមានកូនមិនស្មើគ្នានៅទូទាំងប្រទេសឥណ្ឌាដោយការស្ទង់មតិបង្ហាញថា ស្ត្រីម្នាក់នៅរដ្ឋ Bihar ភាគខាងកើត អាចមានកូនជាមធ្យមរហូតដល់បីនាក់។
បន្ថែមពីលើការអប់រំ និងការប្រើប្រាស់ថ្នាំពន្យារកំណើត ការថែទាំមុនពេលសំរាលកូន និងសុខភាពមាតាកាន់តែប្រសើរឡើង ការសម្រាលកូននៅមន្ទីរពេទ្យកាន់តែច្រើន និងអត្រាការចាក់វ៉ាក់សាំងខ្ពស់ប្រឆាំងនឹងជំងឺកុមារទូទៅ ត្រូវបានចាត់ទុកថាជួយកាត់បន្ថយអត្រាមានកូនសរុបរបស់ឥណ្ឌា។
យោងតាមលោកសាស្រ្តាចារ្យ K. Srinath Reddy ដែលជាប្រធានមូលនិធិសុខភាពសាធារណៈ ឥណ្ឌានៅតែស្ថិតនៅលើផ្លូវដើម្បីវ៉ាដាច់ប្រទេសចិនដែលមានប្រជាជនច្រើនជាងគេលើពិភពលោក ដែលរំពឹងថានឹងកើតឡើងចន្លោះឆ្នាំ ២០២៤-២០២៨ ប៉ុន្តែគ្រាន់តែឥឡូវនេះត្រូវបានពន្យារពេលវិញ។
ផ្ទុយទៅនឹងសង្គមចំណាស់របស់ចិន ប្រជាជនឥណ្ឌាមានវ័យកាន់តែក្មេង ដោយប្រហែល ៣០ ភាគរយនៃប្រជាជនប្រទេសនេះមានអាយុពី ១០ ទៅ ២៤ ឆ្នាំ។ គួរកត់សំគាល់ផងដែរថា ការស្ទង់មតិសុខភាពគ្រួសារគឺផ្អែកលើគំរូតំណាងនៃ ៦៥០ ០០០ គ្រួសារ ដែលធ្វើឱ្យវាពិបាកក្នុងការបញ្ចោញលទ្ធផលឆ្លុះបញ្ចាំងពីសង្គមទាំងមូល។
យ៉ាងណាមិញ អ្នកស្រី Muttreja និយាយថា៖ «វានឹងជាភាគលាភតែប៉ុណ្ណោះ ប្រសិនបើយើងផ្តល់ការថែទាំសុខភាព ការអប់រំ និងជំនាញឱ្យបានល្អដល់យុវជនឥណ្ឌារាប់លាននាក់ បើមិនដូច្នេះទេ ពួកគេនឹងមិនមានផលិតភាព និងសមត្ថភាពនោះទេ»។ អ្នកស្រីបន្តថា៖ «នៅពេលដែលចំនួនមនុស្សចាស់កើនឡើង ដើម្បីគាំទ្រអ្នកដែលមានវ័យចំណាស់ យើងត្រូវវិនិយោគលើមនុស្សវ័យក្មេងឱ្យច្រើន»។
ចំណែកឯលោក Reddy វិញនិយាយថា អាហាររូបត្ថម្ភក៏មានសារៈសំខាន់ផងដែរ។ លោកលើកឡើងពីអត្រាបញ្ហានៃភាពស្លេកស្លាំងក្នុងចំណោមមនុស្សវ័យក្មេងដែលមានបង្ហាញពីលទ្ធផលនៃការស្ទង់មតិ ដែលជាសូចនាករនៃអាហាររូបត្ថម្ភមិនល្អ និងសុខភាពមិនល្អ។ លោកនិយាយថា៖ «ការស្ទង់មតិបង្ហាញថា ៦៧ ភាគរយនៃកុមារអាយុក្រោម ៥ ឆ្នាំ និង ៥៩ ភាគរយនៃក្មេងស្រីដែលមានអាយុពី ១៥ ដល់ ១៩ ឆ្នាំមានសភាពស្លេកស្លាំង។ បញ្ហានេះត្រូវតែដោះស្រាយ»។
ទន្ទឹមនឹងនេះ អ្នករិះគន់នៃគណបក្ស Bharatiya Janata (BJP)ដែលជាគណបក្សជាតិនិយមហិណ្ឌូកំពុងកាន់អំណាចរបស់លោកនាយករដ្ឋមន្ត្រី ណារិនដ្រា មូឌី (Narendra Modi) និយាយថា ការរកឃើញនៃការស្ទង់មតិនេះទម្លាយពីការផ្សព្វផ្សាយបំផុសបំផុលយូរឆ្នាំរបស់បក្សដែលថា ពួកម៉ូស្លីមមានគ្រួសារធំជាងពួកហិណ្ឌូ។ ផ្ទុយទៅវិញ ការស្ទង់មតិបង្ហាញថា អត្រានៃការមានកូនធ្លាក់ចុះនៅគ្រប់ផ្នែកទាំងអស់នៃសង្គម។
មេដឹកនាំឥណ្ឌាបានព្យាយាមទប់ស្កាត់អត្រាកំណើតខ្ពស់ ដែលជារឿយៗមានទំនាក់ទំនងផ្ទុយគ្នាជាមួយនឹងមាត្រដ្ឋានសុខុមាលភាពរបស់ស្ត្រី និងវឌ្ឍនភាពសេដ្ឋកិច្ច។ ចំនួនប្រជាជនដែលកំពុងកើនឡើង ត្រូវបានគេមើលឃើញថាជាឧបសគ្គដល់ការអភិវឌ្ឍន៍ និងជាកត្តាជំរុញនៃការរិចរិលបរិស្ថាន និងការបំភាយឧស្ម័នផ្ទះកញ្ចក់។
កាលពីខែកក្កដា រដ្ឋ Uttar Pradesh ដែលមានប្រជាជនច្រើនបំផុតរបស់ឥណ្ឌា ក្រោមការដឹកនាំដ៏រឹងមាំរបស់សម្ព័ន្ធមិត្តរបស់លោក Modi គឺលោក Yogi Adityanath សម្រេចថា គូស្វាមីភរិយាដែលមានកូនទីបីនឹងមិនអនុញ្ញាតឱ្យដាក់ពាក្យសុំការងាររដ្ឋាភិបាលទៀតទេ។ វិធានការនេះត្រូវបានអ្នករិះគន់និយាយថា ចង់ដាក់គោលដៅលើប្រជាជនម៉ូស្លីម ដែលធ្វើឱ្យរដ្ឋដែលគ្រប់គ្រងដោយបក្ស BJP ផ្សេងទៀត កំពុងគិតធ្វើត្រាប់តាម។
ប្រភព៖ SCMP