នាយករដ្ឋមន្ត្រីអ៊ុយក្រែនថា រុស្ស៊ីពិតជានៅពីក្រោយការប៉ុនប៉ងធ្វើរដ្ឋប្រហារដែលគេសង្ស័យ
នាយករដ្ឋមន្ត្រីអ៊ុយក្រែនលោក Denys Shmygal ចោទប្រកាន់រុស្ស៊ីកាលពីថ្ងៃអង្គារថា ពិតជានៅពីក្រោយអ្វីដែលលោកហៅថាជាការប៉ុនប៉ងរៀបចំរដ្ឋប្រហារផ្តួលរំលំរដ្ឋាភិបាលនៅរដ្ឋធានីកៀវ ដោយលើកឡើងពីស៊ើបការណ៍សម្ងាត់។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។
លោក Shmygal និយាយថា៖ «យើងមានទិន្នន័យសម្ងាត់ដែលបង្ហាញពីចេតនាពិសេស[ដើម្បីធ្វើរដ្ឋប្រហារ]។ ពេលសួរថាតើរដ្ឋរុស្ស៊ីនៅពីក្រោយឬអត់ លោកឆ្លើយថាពិតណាស់។ លោកក៏និយាយផងដែរថា ការដាក់យោធារុស្ស៊ីនៅតាមព្រំដែនអ៊ុយក្រែន គឺជាផ្នែកនៃកិច្ចខិតខំប្រឹងប្រែងរបស់រុស្ស៊ីកាន់តែធំដើម្បីបំបែកសន្ទុះរបស់អ៊ុយក្រែនឆ្ពោះទៅរកការចូលរួមជាមួយសហភាពអឺរ៉ុប។
លោកនិយាយថា សេចក្តីប្រាថ្នារបស់អ៊ុយក្រែនក្នុងការចូលរួមជាមួយសហភាពអឺរ៉ុបគឺជាហេតុផលចម្បងទប់ទល់នឹងអ្វីដែលលោកនិយាយថាគឺការឈ្លានពានរបស់រុស្ស៊ី ការវាយប្រហារកូនកាត់ ការកសាងយោធានៅតាមព្រំដែនរបស់ខ្លួន និងការបញ្ចូលឧបទ្វីបគ្រីមៀថាជាដែនដីរបស់ក្រុងម៉ូស្គូក្នុងឆ្នាំ ២០១៤ ជាដើម។
កាលពីថ្ងៃសុក្រសប្ដាហ៍មុន លោកប្រធានាធិបតី Volodymyr Zelenskiy និយាយថា អ៊ុយក្រែនរកឃើញផែនការដើម្បីផ្តួលរំលំរដ្ឋាភិបាលរបស់លោក ដោយពាក់ព័ន្ធនឹងបុគ្គលមកពីប្រទេសរុស្ស៊ី ប៉ុន្តែលោកមិនបញ្ជាក់ថាតើក្រុងកៀវជឿថាវិមានក្រឹមឡាំងនៅពីក្រោយផែនការឬអត់នោះទេ។
វិមានក្រឹមឡាំងបដិសេធពីការពាក់ព័ន្ធក្នុងផែនការធ្វើរដ្ឋប្រហារណាមួយ ហើយច្រានចោលការចោទប្រកាន់ផ្សេងទៀតដែលគ្មានមូលដ្ឋានថាខ្លួនចង់ឱ្យអ៊ុយក្រែន ដែលជាអតីតសាធារណរដ្ឋសហភាពសូវៀត ធ្លាក់ក្នុងអស្ថិរភាព។ អ្នកនាំពាក្យវិមានលោក Dmitry Peskov និយាយថា៖ «រុស្ស៊ីមិនមានផែនការចូលរួមណាទេ។ រុស្ស៊ីមិនដែលធ្វើរឿងបែបនេះទាល់តែសោះ»។
ប្រភព៖ Reuters
