លោកពូទីនដាស់តឿនណាតូកុំឱ្យឆ្លង «ខ្សែបន្ទាត់ក្រហម» នៅអ៊ុយក្រែន ខណៈពេលលោកបង្ហាញមីស៊ីលល្បឿនលឿនរុស្ស៊ី
កាលពីថ្ងៃអង្គារ ទី៣០ វិច្ឆិកានេះ ប្រធានាធិបតីរុស្សីលោកវ៉្លាឌិមៀរ ពូទីនបានព្រមានអង្គការណាតូកុំឱ្យឆ្លង«ខ្សែបន្ទាត់ក្រហម» នៅអ៊ុយក្រែន ដោយសង្កត់ធ្ងន់ថាប្រទេសរបស់លោកនឹងគ្មានជម្រើសក្រៅពីការធ្វើឆ្លើយតប ខណៈពេលដែលធ្វើការបង្ហាញប្រព័ន្ធមីស៊ីលល្បឿនលឿនជំនាន់ថ្មី។
លោកពូទីននិយាយថាទាហាន ឬប្រព័ន្ធមីស៊ីលទំនើបរបស់ណាតូ ដាក់ពង្រាយនៅដែនដីអ៊ុយក្រែនអាចវាយប្រហារក្រុងមូស្គូក្នុងរយៈពេលប៉ុន្មាននាទីប៉ុណ្ណោះ ហើយរុស្សីចាត់ទុកការធ្វើបែបនេះជាអំពើហួសហេតុ។ អង្គការណាតូមិនទាន់ធ្វើការដាក់ពង្រាយបែបនេះនៅឡើយទេ។
«ប្រសិនបើប្រព័ន្ធវាយប្រហារមួយចំនួនលេចឡើងនៅលើទឹកដីនៃប្រទេសអ៊ុយក្រែននោះ ពេលវេលាហោះហើរទៅកាន់ទីក្រុងមូស្គូនឹងមានពី ៧ ទៅ ១០ នាទី និង ៥ នាទីក្នុងករណីអាវុធដែលមានល្បឿនលឿនជាងសំឡេងត្រូវបានដាក់ពង្រាយ។ សាកស្រមៃមើល» លោកពូទីននិយាយបែបហើយបន្តទៀតថា៖ «តើយើងត្រូវធ្វើអ្វីក្នុងស្ថានភាពបែបនេះ? យើងនឹងត្រូវបង្កើតអ្វីមួយដែលស្រដៀងគ្នានឹងអ្វីគេប្រើប្រាស់គំរាមកំហែងយើង។ ហើយយើងអាចធ្វើវាបានឥឡូវនេះ»។
លោកពូទីនបាននិយាយបែបនេះក្នុងការបង្ហាញប្រព័ន្ធមីស៊ីលលឿនជាងសំឡេង Zicron ដែលអាចហោះលឿនជាងល្បឿនសំឡេងរហូតទៅដល់ប្រាំបួនដង ហើយនឹងត្រូវបានប្រើប្រាស់ដោយកងទ័ពជើងទឹករុស្សីចាប់ឆ្នាំ ២០២២តទៅ។
មីស៊ីលលឿនជាងសំឡេងគឺរចនាឡើងដើម្បីមិនអាចបញ្ឈប់បានដោយប្រព័ន្ធការពារដែនអាកាសបច្ចុប្បន្ន។ ប្រទេសចិន រុស្សី និងអាមេរិកគឺកំពុងជាប់ក្នុងការប្រកួតប្រណាំងសព្វាវុធ ដើម្បីអភិវឌ្ឍ និងផលិតមីស៊ីលប្រភេទនេះ៕
ប្រភព៖ Business Insider