ព្រះសពសម្តេចក្រុមព្រះនរោត្តម រណឫទ្ធិ នឹងយាងដង្ហែមកដល់កម្ពុជានៅថ្ងៃទី៥ ខែធ្នូ
ភ្នំពេញៈ តាមគម្រោងព្រះសពសម្តេចក្រុមព្រះ នរោត្តម រណឫទ្ធិ ព្រះប្រធានគណបក្សហ្វ៊ុនស៊ិនប៉ិចនិងជាប្រធានក្រុមឧត្តម ប្រឹក្សាផ្ទាល់នៃព្រះមហាក្សត្រ នឹងយាងដង្ហែមកដល់ព្រះរាជាណាចក្រកម្ពុជានៅថ្ងៃអាទិត្យ ទី០៥ ខែធ្នូ ឆ្នាំ២០២១ វេលាម៉ោង ១១ ថ្ងៃតាមយន្តហោះពិសេសពីប្រទេសបារាំង។ នេះ បើតាមការបញ្ជាក់របស់លោកញឿន រ៉ាដែន អ្នកនាំពាក្យ គណបក្សហ្វ៊ុនស៊ិនប៉ិចថ្លែង ប្រាប់AMSនារសៀលថ្ងៃទី២ ខែធ្នូឆ្នាំ២០២១។
អ្នកនាំពាក្យគណបក្សហ្វ៊ុនស៊ិនប៉ិចបានបញ្ជាក់ថា ព្រះបុត្រា ព្រះបុត្រី របស់សម្តេចក្រុមព្រះ បានគិតពីមធ្យោបាយ និងការបំពេញបែបបទច្បាប់ពីប្រទេសបារាំង ជាពិសេសការប្រារព្ធព្រះពិធីតម្កល់សព និង ព្រះពិធីបូជាព្រះភ្លើងជាដើម ឱ្យបានសមទៅនឹងព្រះឋានៈ និងព្រះកិត្តិយសរបស់ ព្រះអង្គ ជាឥស្សរជនជាន់ខ្ពស់ សម្រាប់ប្រទេសជាតិ និងជាទីស្រឡាញ់ប្រជារាស្ត្រខ្មែរ។
ក្នុងពិធីដ៏ក្ដុកក្ដួលនេះព្រះករុណា ព្រះមហាក្សត្រ និងសម្តេចព្រះមហាក្សត្រី ព្រះវររាជមាតាជាតិខ្មែរជាទីគោរពសក្ការៈដ៏ខ្ពង់ខ្ពស់ បំផុតស្តេចសព្វព្រះរាជហឫទ័យប្រោសព្រះរាជទានព្រះរាជទ្រព្យផ្ទាល់ព្រះអង្គចំនួន ១២ម៉ឺនដុល្លារ (ព្រះករុណាជាម្ចាស់ជីវិត ចំនួន ២ម៉ឺនដុល្លារ សម្តេចម៉ែ ចំនួន ១០ម៉ឺនដុល្លារ) ជូនព្រះបុត្រាបុត្រី សម្តេចក្រុមព្រះ នរោត្តម រណឫទ្ធិ សម្រាប់រៀបចំកម្មពិធីបុណ្យព្រះសពរបស់ព្រះអង្គ ។
សម្តេចក្រុមព្រះនរោត្តម រណឫទ្ធិ ទ្រង់សោយព្រះទិវង្គតនៅប្រទេសបារាំង នៅថ្ងៃអាទិត្យ ទី២៨ ខែវិច្ឆិកា ឆ្នាំ២០២១ ក្នុងព្រះជន្មាយុ ៧៧ ព្រះវស្សា ដោយព្រះរោគាពាធ ។ សម្តេចក្រុមព្រះ នរោត្តម រណឫទ្ធិ ទ្រង់ប្រសូតនៅថ្ងៃទី២ ខែមករា ឆ្នាំ១៩៤៤ នៅក្រុងភ្នំពេញ។ ទ្រង់ជាបុត្រាច្បងរបស់ព្រះបាទ នរោត្តម សីហនុ និងអ្នកម្នាង ផាត់ កាញ៉ុល។
សម្តេចក្រុមព្រះ នរោត្តម រណប្ញទ្ធិ មានព្រះជន្ម ៧៧ព្រះវស្សា ។ព្រះអង្គមានព្រះរាជសុខភាពទ្រុឌទ្រោមបន្ទាប់ពីជួបគ្រោះថ្នាក់ចរាចរណ៍កាលពីប៉ុន្មានឆ្នាំមុននេះនៅផ្លូវជាតិលេខ៤ ភ្នំពេញ-ព្រះសីហនុ ខណៈដែលក្នុងឧបទ្ទវហេតុនេះ អ្នកម្នាងរបស់ព្រះអង្គគឺអ្នកម្នាង អ៊ុក ផល្លា ទទួលមរណភាព៕ដោយ/ពលជ័យ
