កូនស្រីលោកកឹម សុខា ៖ សម រង្ស៊ី ជាអ្នកនយោបាយឡឺកឺ ទាំងការនិយាយស្តីនិងទង្វើត្រឡប់ត្រឡិន
ភ្នំពេញ ៖ កញ្ញា កឹម មនោវិទ្យា កូនស្រីលោក កឹម សុខា បានបន្តទៅទណ្ឌិត សម រង្ស៊ី និងបានហៅសម រង្ស៊ី ថាជាអ្នកនយោបាយឡឺកឺ ដែលការនិយាយស្តីនិងទង្វើត្រឡប់ត្រឡិន។ ការឃោសនាសម រង្ស៊ី និងបក្ខពួកមកលើឪពុកខ្លួនតាំងពី២០០៧ មកដល់ពេលនេះជាអំពើទុច្ចរិត មួលបង្កាច់។
នៅលើបណ្តាញសង្គមហ្វេសប៊ុកនៅថ្ងៃទី៥ ខែធ្នូនេះ កញ្ញា កឹម មនោវិទ្យា បានចោទជាសំណួរមួយចំនួន។
-តាំងពីឆ្នាំ២០០៧ មកលោក សម រង្សី និងក្រុមគាត់តែងលើកឡើងថា លោក កឹម សុខា ជាអាយ៉ងបក្សកាន់អំណាច ឬជាគិញយួនតែម្តង។
-ក្រោយការបោះឆ្នោតឆ្នាំ២០០៨ ពួកគេបន្តការចោទប្រកាន់ទាំងនេះ និងបន្ថែមថា បក្សសិទ្ធិមនុស្សប្រៀបដូចជា “កូនដើមឈើតូចមួយសម្រាប់ឆ្កែនោមដាក់” ។ នេះជាសំដីថ្នាក់ដឹកនាំកំពូលដ៏ខ្ពង់ខ្ពស់គឺលោក សម រង្ស៊ី។
-ក្នុងការបោះឆ្នោតឃុំ/សង្កាត់ឆ្នាំ២០១២ បក្ស សម រង្ស៊ី ត្រូវបានបាត់បង់កៅអី មេឃុំ ៦ និងក្រុមប្រឹក្សាឃុំចំនួន ៥០៥ រូប។
-ក្រោយមក ក្នុងឆ្នាំ២០១២ដដែល បក្ស សម រង្ស៊ី និងបក្សសិទ្ធិមនុស្ស រួមគ្នាបង្កើតគណបក្សសង្គ្រោះជាតិ។
-ឆ្នាំ២០១៣ គណបក្សសង្គ្រោះជាតិ បានធ្វើមហាយុទ្ធនាការឃោសនាទូទាំងប្រទេសដែលទទួលការគាំទ្រលើសលប់ដែលពុំធ្លាប់មានក្នុងប្រវត្តិសាស្ត្រក្រុមប្រឆាំងពីមុន។ ពេលនោះលោក សម រង្ស៊ី បានកំពុងរស់នៅដោយក្តីអស់សង្ឃឹមនៅក្រុងប៉ារីស។ ប្រហែលមួយអាទិត្យមុនពេលបោះឆ្នោត លោក សម រង្ស៊ី បានអង្វរសុំទោសមេបក្សកាន់អំណាច គេក៏ឱ្យចូលស្រុកវិញ។ សន្ទុះដ៍៏មហិមានៃមហាយុទ្ធនាការឃោសនាគណបក្សសង្គ្រោះជាតិដែលបាននិងកំពុងរីករាលដែលមួយខែមកហើយ បានផ្សព្វផ្សាយរៀបចំផ្តល់មហាកិត្តិយសក្នុងការទទួលលោក សម រង្ស៊ី ដែលយុវជនភាគច្រើនមិនដែលស្គាល់ពីមុនមក។
-ថ្ងៃ២៧ វិច្ឆិកា ២០២១ ភាគីលោក សម រង្ស៊ី ធ្វើសមាជបក្ស 🕯 ជាផ្លូវការនៃយុទ្ធនាការដ៏មោទនភាពមួយដែលគេហៅថា “តោះយើងត្រឡប់ទៅផ្ទះចាស់វិញ”។
-ថ្ងៃ២៨ វិច្ឆិកា ២០២១ គេចោទផង គំរាមផង ថាលោក កឹម សុខា បែកពីសង្គ្រោះជាតិ និងប្រើឃោសនាការដដែលៗដែលគេប្រើតាំងពីឆ្នាំ២០០៧ ដូចជាថា គាត់បម្រើបក្សកាន់អំណាច គាត់ខ្លាចបក្សកាន់អំណាច (ទោះជាគាត់ហ៊ានជាប់ពន្ធនាគាពីរដងហើយក៏ដោយ) គាត់គ្មានប្រជាប្រិយភាពទេ សរុប គឺគាត់មិនមានតម្លៃទេ។
សំណួរ៖
ហេតុអ្វីលោក សម រង្ស៊ី និងក្រុម រួបរួមជាមួយអាយ៉ងបក្សកាន់អំណាចរូបនេះ តាំងពី២០១២ម្ល៉េះ?
ហេតុអ្វីលោក សម រង្ស៊ី និងក្រុម កំពុងដេកព្រួយជំនួសលោក កឹម សុខា ថាគាត់នឹងធ្លាក់ប្រជាប្រិយភាពបើគ្មាន សម រង្ស៊ី?
ហេតុអ្វីលោក សម រង្ស៊ី និងក្រុម មិនព្រលែងមនុស្សម្នាក់ដែលគ្មានប្រជាប្រិយ គ្មានសមត្ថភាព និងគ្មានតម្លៃចោលទៅ?
តើនេះ មានន័យថា ការឃោសនាលោក សម រង្ស៊ី និងក្រុមធ្វើមកលើ លោក កឹម សុខា តាំងពី២០០៧ មកដល់ពេលនេះជាអំពើទុច្ចរិត មួលបង្កាច់ ក្នុងបំណងបំបាក់លោក កឹម សុខា ដោយភាពច្រណែនរបស់លោក សម រង្ស៊ី?
ឬក៏មានន័យថា លោក សម រង្ស៊ី ជាអ្នកនយោបាយ ឡឺកឺ ដែលការនិយាយស្តីនិងទង្វើត្រឡប់ត្រឡិនមិនស៊ីសង្វាក់គ្នា? ទុច្ចរិត ឬ ឡឺកឺ?៕
ដោយ:ពលជ័យ