ចំនួនឆ្លងវ៉ារ៉្យង់អូមីក្រុងកើនឡើង ធ្វើឱ្យអឺរ៉ុបមានភាពច្របូកច្របល់
ករណីចំនួនឆ្លង វ៉ារ្យ៉ង់អូមីក្រុង កើនឡើងខ្លាំងនៅក្នុងប្រទេសអង់គ្លេស និងដាណឺម៉ាក កាលពីថ្ងៃអាទិត្យ ខណៈអ្នកវិទ្យាសាស្ត្រ មានភាពភ័យខ្លាច ដោយសារតែវ៉ារ៉្យង់នេះកាន់តែរីករាលដាលទូលំទូលាយរួចទៅហើយ បើទោះបីជាមានការហាមឃាត់ការធ្វើដំណើរហើយក្ដី។
វ៉ារ្យ៉ង់នេះ ត្រូវបានគេរកឃើញនៅក្នុងប្រទេសយ៉ាងហោចណាស់ចំនួន ៤៥ នៅទូទាំងពិភពលោក ដោយសហរដ្ឋអាមេរិក និងប្រទេសនៅទ្វីបអឺរ៉ុបភាគច្រើន បានរាយការណ៍អំពីករណីថ្មីមួយចំនួនក្នុងរយៈពេលប៉ុន្មានថ្ងៃថ្មីៗនេះ។
កាលពីថ្ងៃអាទិត្យកន្លងទៅ ទីភ្នាក់ងារសន្តិសុខសុខភាពរបស់ចក្រភពអង់គ្លេស បានបញ្ជាក់ថាថ្មីៗនេះខ្លួនបានរកឃើញករណីឆ្លងវីរុសនេះចំនួន ២៤៦ ករណី ពោលគឺមានចំនួនជិត ២ ដងនៃចំនួនករណីសរុបដែលបានរាយការណ៍កាលពីថ្ងៃសុក្រសប្ដាហ៌មុន។
ដោយឡែក នៅប្រទេសដាណឺម៉ាក អាជ្ញាធរសុខាភិបាលក្នុងតំបន់ បានបញ្ជាក់ថា អាជ្ញាធរបានរកឃើញករណីឆ្លងចំនួន ១៨៣ ករណី ឬ មានច្រើនជាង ៣ ដងនៃចំនួនករណីសរុប ដែលបានរាយការណ៍កាលពីថ្ងៃ សុក្រ ដែលតួរលេខនេះ ត្រូវបានគេចាត់ទុកថា ច្រើនខ្លាំងគួរបារម្ភ។
តួលេខនេះ បង្កឱ្យមានការភ្ញាក់ផ្អើល ដោយហេតុតែប្រទេសទាំងពីរត្រូវបាន ត្រូវបានគេទទួលស្គាល់ទូលំទូលាយថាជាប្រទេស នាំមុខគេក្នុងការធ្វើចំណាត់ថ្នាក់ហ្សែន និងការធ្វើតេស្ត។ ក្នុងប្រទេសអង់គ្លេស អ្នកវិទ្យាសាស្ត្រកំពុងផ្តោតលើការចាត់ថ្នាក់ហ្សែនរបស់ពួកគេលើអ្នកដំណើរអន្តរជាតិ និងទំនាក់ទំនងរបស់អ្នក ដែលបានឆ្លងវ៉ារ្យ៉ង់អូមីក្រុងរួចហើយ ។
យ៉ាងណាមិញ មានការលើកជាមន្ទិលជាច្រើនអំពីវ៉ារ្យ៉ង់ រួមទាំង សំណួរ ដែលថា តើវ៉ារ៉្យង់ឆ្លងបានកម្រិតណា តើវ៉ាក់សាំងនឹងទប់ទល់វ៉ារ៉្យង់បានល្អប៉ុណ្ណា និងថាតើវាទំនងជាបង្កជំងឺធ្ងន់ធ្ងរប៉ុណ្ណា។ ទោះយ៉ាងណា គេឃើញមានសញ្ញាដំបូងមួយចំនួន ដែលថាវ៉ារ៉្យង់អូមីក្រុនអាចបណ្តាលឱ្យមានជំងឺស្រាលប៉ុណ្ណោះ ទោះបីជាការសង្កេតនោះផ្អែកលើករណីភាគច្រើននៅអាហ្វ្រិកខាងត្បូងក្នុងចំណោមមនុស្សវ័យក្មេង ដែលទំនងជាមិនសូវឈឺធ្ងន់ធ្ងរពីកូវីដក៏ដោយ។
មកដល់ពេលនេះ អ្នកវិទ្យាសាស្ត្រ និយាយថាគេមិនទាន់រកឃើញហេតុផល ដើម្បីជឿថាវ៉ារ៉្យង់អូមីក្រុងមានឥទ្ធិពលជាងវ៉ាក់សាំងដែលមានស្រាប់នោះទេ ទោះបីជា គេនៅមិនទាន់រកឃើញពីប្រសិទ្ធិភាពវ៉ាក់សាំងទៅលើវ៉ារ៉្យង់ ដែលមិនទាន់ស្គាល់ពិតប្រាកដឡើយ។
លោកវេជ្ជបណ្ឌិត Michael Osterholm នាយកមជ្ឈមណ្ឌលស្រាវជ្រាវ និងគោលនយោបាយជំងឺឆ្លងនៅសាកលវិទ្យាល័យ Minnesota បាននិយាយថា៖ «យើងនឹងឃើញករណីឆ្លងក្នុងចំនួនធំក្នុងរយៈពេលប៉ុន្មានសប្តាហ៍ខាងមុខនេះ នៅក្នុងប្រទេសនានាជុំវិញពិភពលោក។ វាមិនមែនជារឿងគួរឱ្យភ្ញាក់ផ្អើលទេ។ មេរោគនេះ គ្រាន់តែដើរតួដូចជាមេរោគផ្លូវដង្ហើម ដែលអាចចម្លងបានខ្ពស់ប៉ុណ្ណោះ»។
យោងតាម ការផ្តោតលើការពិសោធន៍ឡាស៊ែរថ្មីរបស់មន្ត្រីសុខាភិបាលសាធារណៈ វ៉ារ៉្យង់ ដែលបណ្ដាលឱ្យមានការកើនឡើងចំនួនឆ្លង អាចជាភស្តុតាងដំបូងបង្ហាញថាអាចរីករាលដាលលឿនជាងវ៉ារ្យ៉ង់ដែលតា ដែលជាវ៉ារ៉្យង់កាចសាហាវបំផុតកន្លងមក។
លោកវេជ្ជបណ្ឌិត Osterholm បាននិយាយថា៖ «នៅពេល ដែលអ្នករកឃើញនរណាម្នាក់ ដែលឆ្លងមេរោគ ហើយអ្នកចាប់ផ្តើមមើលទំនាក់ទំនងរបស់ពួកគេ ឬ បរិយាកាស ដែលពួកគេកំពុងនៅក្នុងនោះ អ្នកនឹងរកឃើញច្រើនទៀត»។
លោកវេជ្ជបណ្ឌិត Peter J. Hotez ព្រឹទ្ធបុរសនៃសាលាជាតិវេជ្ជសាស្ត្រត្រូពិចនៃមហាវិទ្យាល័យវេជ្ជសាស្ត្រ Baylor បាននិយាយថា៖ «ករណីឆ្លងអូមីក្រុង មានតិចតួចណាស់នៅពេលនេះ ដែលវាពិបាកក្នុងការដឹងថា តើការកើនឡើងប៉ុន្មានក្នុងប្រទេសអង់គ្លេស និងនៅដាណឺម៉ាក។ ២-៣ រយករណី នៅតែជា ចំនួនតូចបើប្រៀបនឹងចំនួនករណីឆ្លងប្រហែល ៤៤,០០០ ករណីជាមធ្យមនៅចក្រភពអង់គ្លេសរៀងរាល់ថ្ងៃ»។
ប៉ុន្តែ បើទោះបីជាការរកឃើញនៃវ៉ារ្យ៉ង់ថ្មីនេះស្ថិតនៅក្នុងភាពមិនប្រាកដប្រជាក្ដី អ្នកជំនាញផ្នែកសុខភាពសាធារណៈមួយចំនួន កំពុងបង្កើនការជូនដំណឹងថា ការរឹតបន្តឹងការធ្វើដំណើរ ដែលមាននៅក្នុងភាគច្រើននៃទ្វីបអឺរ៉ុប ដើម្បីប្រឆាំងនឹងវ៉ារ៉្យង់នេះ នៅតែមិនគ្រប់គ្រាន់ ដើម្បីទប់ស្កាត់ការកើនឡើងនៃករណីឆ្លងមេរោគ ដែលបានកើតឡើងរួចហើយ។
លោក Jeremy Farrar នាយកនៃវិទ្យាសា្ថន Wellcome Trust និងជាអតីតសមាជិកនៃស្ថាប័នប្រឹក្សាវិទ្យាសាស្ត្ររបស់រដ្ឋាភិបាលអង់គ្លេស បានសរសេរនៅក្នុងគេហទំព័រ The Observer ថា ការកើនឡើងនៃអូមីក្រុនគឺជា សញ្ញាមួយ ដែលថា អូមីក្រុន កំពុងមានវឌ្ឍនភាពដ៏គួរឱ្យភ្ញាក់ផ្អើល។ យ៉ាងណាមិញ វ៉ារ្យ៉ង់នេះរំឭកយើងទាំងអស់គ្នាថា យើងនៅតែខិតទៅជិតការចាប់ផ្តើមនៃជំងឺរាតត្បាតជាជាងចុងបញ្ចប់»។
