ក្រុមរដ្ឋមន្ត្រីប្រទេស G-7 ស្វែងរកការរួបរួមគ្នា ចំពេលមានការព្រមានពីហានិភ័យនៃសង្គ្រាមជាមួយរុស្ស៊ី
រដ្ឋមន្ត្រីការបរទេសនៃក្រុមប្រទេសអ្នកមានទាំងប្រាំពីរ (G-៧) ជួបប្រជុំនៅក្រុង Liverpool របស់អង់គ្លេសព្យាយាមរកការបង្ហាញនៃការរួបរួមប្រឆាំងនឹងរុស្ស៊ី ដោយសម្តែងការព្រួយបារម្ភយ៉ាងខ្លាំងអំពីការដាក់ពង្រាយទាហានរបស់ប្រទេសនេះនៅតាមព្រំដែនអ៊ុយក្រែន។
ជំនួបនេះធ្វើឡើងប៉ុន្មានថ្ងៃប៉ុណ្ណោះ បន្ទាប់ពីប្រមុខកងកម្លាំងប្រដាប់អាវុធថ្មីរបស់អង់គ្លេសចេញការព្រមានយ៉ាងម៉ឺងម៉ាត់អំពីហានិភ័យនៃសង្គ្រាមជាមួយរុស្ស៊ី។ ប្រទេសនេះកំពុងស្វែងរកការយល់ស្របពីក្រុមប្រទេសអ្នកមាន ក្នុងការឆ្លើយតបទៅនឹងអ្វីដែលខ្លួនហៅថា «អាកប្បកិរិយាអាក្រក់» របស់រុស្ស៊ី និងជុំវិញភាពតានតឹងជាមួយចិន និងអ៊ីរ៉ង់។
រដ្ឋមន្ត្រីការបរទេសអង់គ្លេសអ្នកស្រី Liz Truss និយាយនៅពេលបើកកិច្ចប្រជុំរដ្ឋមន្ត្រីការបរទេសមកពីចក្រភពអង់គ្លេស សហរដ្ឋអាមេរិក កាណាដា បារាំង អាល្លឺម៉ង់ អ៊ីតាលី និងជប៉ុនថា៖ «យើងត្រូវការពារខ្លួនប្រឆាំងនឹងការគំរាមកំហែងដែលកំពុងកើនឡើងពីតួអង្គអរិភាព។ ហើយយើងត្រូវរួមគ្នាយ៉ាងខ្លាំងដើម្បីក្រោកឈរឡើងចំពោះអ្នកឈ្លានពានដែលព្យាយាមដាក់ដែនកំណត់សេរីភាព និងលទ្ធិប្រជាធិបតេយ្យ»។
សហរដ្ឋអាមេរិក និងសម្ព័ន្ធមិត្តណាតូ មានការព្រួយបារម្ភថា ការចល័តទ័ពជាង ៩០ ០០០ នាក់ និងសព្វាវុធរបស់រុស្ស៊ីទៅកាន់តំបន់ព្រំដែនជាមួយអ៊ុយក្រែន អាចជាការឈានទៅរកការលុកលុយ ហើយនិយាយថា ពួកគេនឹងដាក់ទណ្ឌកម្មធ្ងន់ធ្ងរលើសេដ្ឋកិច្ចរបស់រុស្ស៊ីប្រសិនបើរឿងនេះកើតឡើង។
យ៉ាងណាមិញ ក្រុងម៉ូស្គូរបស់លោក វ្ល៉ាឌីមៀ ពូទីន បដិសេធផែនការវាយប្រហារអ៊ុយក្រែន ហើយចោទប្រកាន់ទីក្រុងកៀវពីភាពគឃ្លើនរបស់រដ្ឋាភិបាលនៃប្រទេសនេះ។ វិមានក្រឹមឡាំងនិយាយថា ខ្លួនមានការព្រួយបារម្ភចំពោះការជំរុញ របស់លោកខាងលិច ដើម្បីផ្គត់ផ្គង់ដល់អ៊ុយក្រែននូវអាវុធបច្ចេកវិទ្យាខ្ពស់ ដែលខ្លួនអះអាងថាក្រុងកៀវកំពុងប្រើដើម្បីបង្ករឿងដល់ទីក្រុងម៉ូស្គូ។
ក្រសួងការបរទេសសហរដ្ឋអាមេរិកឯណោះវិញនិយាយថា អ្នកស្រី Truss និងរដ្ឋមន្ត្រីការបរទេសអាមេរិកលោក Antony Blinken បានពិភាក្សាគ្នាអំពីរបៀបរារាំងប្រទេសរុស្ស៊ីពីភាពគឃ្លើនប្រឆាំងនឹងអ៊ុយក្រែនក្នុងកិច្ចប្រជុំមួយទល់នឹងមួយ។ ចក្រភពអង់គ្លេសនិយាយថា រដ្ឋមន្ត្រីទាំងពីរព្រមានថាការលុកលុយរបស់រុស្ស៊ី នឹងក្លាយជាកំហុសយុទ្ធសាស្ត្រដែលនឹងមានផលវិបាកធ្ងន់ធ្ងរ។
តាមការរាយការណ៍របស់សារព័ត៌មាន Al Jazeera ក្នុងចំណោមបញ្ហា និងការគម្រាមកំហែងទាំងអស់ដែលគណៈប្រតិភូបានពិភាក្សារួមមាន ប្រទេសចិន មហិច្ឆតានុយក្លេអ៊ែររបស់អ៊ីរ៉ង់ និងកូវីដ-១៩ ប៉ុន្តែបញ្ហាជាមួយប្រទេសរុស្ស៊ីត្រូវបានគេលើកមកនិយាយច្រើនជាងគេ។
ក្រសួងការបរទេសប្រកាសកាលពីថ្ងៃសៅរ៍ថា អ្នកការទូតកំពូលអាមេរិកប្រចាំទ្វីបអឺរ៉ុបអ្នកស្រី Karen Donfried នឹងធ្វើទស្សនកិច្ចទាំងនៅទីក្រុងកៀវ និងទីក្រុងម៉ូស្គូនៅសប្តាហ៍ក្រោយ ដើម្បីពង្រឹងការប្តេជ្ញាចិត្តរបស់សហរដ្ឋអាមេរិកចំពោះអធិបតេយ្យភាព ឯករាជ្យ និងបូរណភាពទឹកដីរបស់អ៊ុយក្រែន និងដើម្បីស្វែងរកដំណោះស្រាយការទូតចំពោះវិបត្តិ។ ហើយបន្ទាប់ពីនោះ អ្នកស្រីនឹងបន្តដំណើរទៅទីក្រុងប្រ៊ុចសែលដើម្បីពិភាក្សាជាមួយអង្គការណាតូ និងសម្ព័ន្ធមិត្តសហភាពអឺរ៉ុប។
ដោយព្យាយាមប្រមូលផ្តុំការរួបរួមក្នុងចំណោមប្រទេស G-៧ អ្នកស្រី Truss និយាយថា៖ «ប្រទេសប្រជាធិបតេយ្យសេរី ត្រូវតែផ្តាច់ខ្លួនចេញពីឧស្ម័ននិងលុយរបស់រុស្ស៊ី ដើម្បីការពារឯករាជ្យភាពរបស់ខ្លួនឯង»។ រដ្ឋមន្រ្តីរូបនេះបន្តថា អ្នកស្រីចង់ធ្វើការជាមួយប្រទេសផ្សេងទៀតដើម្បីធ្វើឱ្យប្រាកដថា ប្រជាជាតិប្រជាធិបតេយ្យសេរីអាចមានជម្រើសជំនួសការផ្គត់ផ្គង់ឧស្ម័នរបស់រុស្ស៊ី។
ចក្រភពអង់គ្លេសដែលមិនពឹងផ្អែកលើឧស្ម័នរបស់រុស្ស៊ី រិះគន់គម្រោងបំពង់បង្ហូរហ្គាសកាត់អឺរ៉ុប Nord Stream 2 របស់ប្រទេសនេះ។ ប៉ុន្តែសង្កាត់ហិរញ្ញវត្ថុ និងទីផ្សារអចលនទ្រព្យរបស់ក្រុងឡុងដ៍ គឺជាមជ្ឈមណ្ឌលដ៏សំខាន់សម្រាប់រូបិយប័ណ្ណរុស្ស៊ី ហើយអាជ្ញាធរចក្រភពអង់គ្លេសរងការចោទប្រកាន់ជាយូរមកហើយថាបិទភ្នែកមិនមើលមូលនិធិខុសច្បាប់ដែលហូរពីជុំវិញពិភពលោក។
ក្នុងជំនួបនាំក្រុង Liverpool កាលពីថ្ងៃសៅរ៍នេះ អ្នកស្រី Truss ក៏បានអញ្ជើញរដ្ឋមន្ត្រីមកពីសមាគមប្រជាជាតិអាស៊ីអាគ្នេយ៍ផងដែរ ប៉ុន្តែដោយសារតែកូវីដ១៩ អ្នកទាំងនោះត្រូវចូលរួមតាមប្រព័ន្ធវិឌីអូវិញ។ អ្នកស្រីប្រាប់សមភាគី G-៧ ថា លទ្ធិប្រជាធិបតេយ្យត្រូវការដើម្បីប្រយុទ្ធប្រឆាំងនឹងសេដ្ឋកិច្ចបង្ខិតបង្ខំ និងសមរភូមិនៃបច្ចេកវិទ្យារបស់ចិន។
ប្រទេសសេដ្ឋកិច្ចខ្ពស់ទាំង G-៧ ចាប់ផ្តើមគម្រោងគំនិតផ្តួចផ្តើម «កសាងពិភពលោកឱ្យប្រសើរឡើងវិញ» ឬ «Build Back Better World» ដើម្បីផ្តល់មូលនិធិដល់ប្រទេសកំពុងអភិវឌ្ឍសម្រាប់គម្រោងហេដ្ឋារចនាសម្ព័ន្ធធំៗ ដែលជាជម្រើសជំនួសលុយពីប្រទេសចិន។
![](https://asset.ams.com.kh/central/media/2021-12-11T113708Z_675425826_RC2BCR9LBJU5_RTRMADP_3_BRITAIN-G7.webp)
ប្រភព៖ Aljazeera