បង់ក្លាដេសសម្ដែងការមិនពេញចិត្តលើការដាក់ទណ្ឌកម្មរបស់អាមេរិកទៅលើមន្ត្រីរបស់ខ្លួនចំនួន ៧រូប
ក្រសួងការបរទេសបង់ក្លាដេសបានកោះហៅឯកអគ្គរដ្ឋទូតអាមេរិកកាលពីថ្ងៃសៅរ៍កន្លងទៅ ដើម្បីបញ្ជូន «សារមិនសប្បាយចិត្ត» ទៅកាន់អាមេរិក ក្រោយពេលដែលមហាអំណាចមួយនេះបានដាក់ទណ្ឌកម្មទៅលើអតីតមន្ត្រី និងមន្ត្រីកំពុងកាន់តំណែងនៃកងវរសេនាតូចសកម្មភាពរហ័ស (RAB) ចំនួន ៧រូប។
កាលពីសប្ដាហ៍មុន អាមេរិកបានដាក់ទណ្ឌកម្មលើបុគ្គលលើប្រទេសមួយចំនួនរួមមានកូរ៉េខាងជើង និងបង់ក្លាដេស។ ចំពោះករណីបង់ក្លាដេស អាមេរិកបានដាក់ទណ្ឌកម្មទៅលើកងកម្លាំង RAB ដោយចោទប្រកាន់ថាកងកម្លាំងនេះជាអ្នកទទួលខុសត្រូវលើការបាត់ខ្លួនមនុស្សរាប់រយនាក់ និងការសម្លាប់មនុស្សចំនួន ៦០០នាក់ក្រៅផ្លូវតុលាការចាប់តាំងពីឆ្នាំ២០១៨។
មន្ត្រីទាំង ៧នាក់នោះរួមមានលោក Benazir Ahmed អតីតមេទ័ពនៃកងកម្លាំងនេះ ហើយបច្ចុប្បន្នជាមេប៉ូលិសជាតិបង់ក្លាដេស។
ក្រោយពីដាក់ទណ្ឌកម្មលើមន្ត្រីបង់ក្លាដេស រដ្ឋមន្ត្រីការបរទេសបង់ក្លាដេសលោក Masud Bin Momen បានលើកឡើងក្នុងសេចក្ដីថ្លែងការណ៍មួយថា លោក «មានការសោកស្ដាយដែលអាមេរិកសម្រេចក្នុងការបំពារបំពានដល់អង្គភាពមួយរបស់រដ្ឋាភិបាល ដែលស្ថិតនៅជួរមុខក្នុងការប្រយុទ្ធប្រឆាំងនឹងអំពើភេរវកម្ម ការជួញដូរគ្រឿងញៀន និងឧក្រិដ្ឋកម្មឆ្លងដែនជាច្រើនទៀត ដែលចាត់ទុកថាជាអាទិភាពរួមសម្រាប់រដ្ឋាភិបាលគ្រប់រដ្ឋបាលនានារបស់សហរដ្ឋអាមេរិក»។
កងកម្លាំង RAB ត្រូវបានបង្កើតឡើងកាលពីឆ្នាំ២០០៤ ដើម្បីប្រឆាំងនឹងជនជ្រុលនិយម និងឧក្រិដ្ឋកម្មធ្ងន់ធ្ងរ។ យ៉ាងណាមិញ កងកម្លាំងនេះក៏រងនូវការចោទប្រកាន់មួយចំនួនក្នុងការរំលោភសិទ្ធិមនុស្ស ដែលរាប់បញ្ចូលទាំងការបាញ់ប្រហារទៅលើបុគ្គលដែលត្រូវបានចោទថាជាឧក្រិដ្ឋជនផងដែរ៕
![](https://asset.ams.com.kh/central/media/bangladesh-protests-us-sanctions-of-its-security-chiefs-1639232535-4391.jpg)
ប្រភព៖ The Straits Times