បុរសរដ្ឋកាលីហ្វ័រញ៉ាដែលរងការចោទប្រកាន់ព្រហ្មទណ្ឌជុំវិញកុបកម្មនៅវិមានកាពីតូល ភៀសខ្លួនទៅបេឡារុស
រដ្ឋអាជ្ញាសហព័ន្ធនិយាយកាលពីថ្ងៃសុក្រថា បុរសម្នាក់មកពីកាលីហ្វ័រញ៉ាម្នាក់ដែលរងការចោទប្រកាន់ពីបទវាយដំប៉ូលីសក្នុងកុបកម្មកាលពីខែមករានៅវិមានកាពីតូលរបស់សហរដ្ឋអាមេរិក រត់ភៀសខ្លួនចេញពីសហរដ្ឋអាមេរិក ហើយត្រូវគេជឿថាទៅជ្រកកោននៅប្រទេសបេឡារុស។
លោក Evan Neumann ត្រូវបានចោទប្រកាន់កាលពីថ្ងៃសុក្រ លើការចោទប្រកាន់ឧក្រិដ្ឋកម្មចំនួន ១៤ ជុំវិញការវាយប្រហារវិមានកាពីតូរបស់អ្នកគាំទ្រអតីតប្រធានាធិបតី ដូណាល់ ត្រាំ បន្ថែមពីលើការចោទប្រកាន់ដែលមាននៅក្នុងពាក្យបណ្តឹងព្រហ្មទណ្ឌប្រឆាំងនឹងបុរសអាយុ ៤៩ ឆ្នាំរូបនេះកាលពីខែមីនា។
ការិយាល័យមេធាវីអាមេរិកប្រចាំសង្កាត់ Columbia និយាយក្នុងសេចក្តីថ្លែងការណ៍មួយថា លោក Neumann ដែលមិនទាន់បង្ហាញខ្លួននៅតុលាការក្នុងសំណុំរឿងនេះ បានភៀសខ្លួនពីសហរដ្ឋអាមេរិកកាលពីថ្ងៃទី ១៦ ខែកុម្ភៈ ហើយបច្ចុប្បន្នត្រូវបានគេជឿថាស្ថិតនៅក្នុងប្រទេសបេឡារុស។
លោក Neumann បានបង្ហាញកាលពីខែមុនក្នុងកម្មវិធីទូរទស្សន៍រដ្ឋបេឡារុសពិសេសមួយឈ្មោះថា «លាហើយអាមេរិច» ដោយរៀបរាប់ពីដំណើររបស់លោកទៅកាន់រដ្ឋធានីមីនស្ក៍។ លោកនិយាយនៅក្នុងកម្មវិធីថា លោកកំពុងស្វែងរកសិទ្ធិជ្រកកោននយោបាយនៅបេឡារុស ពីព្រោះតាមគំនិតរបស់លោក សហរដ្ឋអាមេរិក មិនមែនជាប្រទេសដែលមានច្បាប់ និងសណ្តាប់ធ្នាប់ទៀតទេ។ នេះបើតាមការចុះផ្សាយរបស់សារព័ត៌មាន Daily Beast។
លោក Neumann គឺជាបុគ្គលម្នាក់ក្នុងចំណោមបុគ្គលជាង ២២០ នាក់ ដែលរងការប្រកាន់ពីបទរំលោភបំពាន ឬបង្អាក់ការអនុវត្តច្បាប់ក្នុងអំឡុងពេលនៃការវាយប្រហារកាលពីថ្ងៃទី ០៦ ខែមករា លើវិមានកាពីតូល។ មនុស្ស ០៤ នាក់បានស្លាប់នៅថ្ងៃនៃកុបកម្ម ហើយមន្ត្រីប៉ូលីសកាពីតូលម្នាក់ស្លាប់នៅថ្ងៃបន្ទាប់ដោយសាររងរបួសក្នុងពេលប៉ះទង្គិចជាមួយក្រុមកុប្បករ។
ប្រភព៖ Reuters