អាមេរិកដាក់ទណ្ឌកម្មសិទ្ធិមនុស្សទ្រង់ទ្រាយធំលើចិន មីយ៉ាន់ម៉ា និងកូរ៉េខាងជើង
សហរដ្ឋអាមេរិកកាលពីថ្ងៃសុក្រសប្ដាហ៌មុន ដាក់ទណ្ឌកម្មយ៉ាងធ្ងន់ធ្ងទាក់ទងនឹងសិទ្ធិមនុស្សលើបុគ្គល និងអង្គភាពជាច្រើនដែលជាប់ពាក់ព័ន្ធជាមួយរដ្ឋាភិបាលចិន មីយ៉ាន់ម៉ា កូរ៉េខាងជើង និងបង់ក្លាដែស ហើយរួមបញ្ចូលក្រុមហ៊ុនបញ្ញាសិប្បនិមិត្តចិន SenseTime Group ទៅក្នុងបញ្ជីវិនិយោគខ្មៅ ដោយចោទប្រកាន់ពីការបង្កើតកម្មវិធីសម្គាល់មុខដែលអាចកំណត់មុខសញ្ញានៃក្រុមជនជាតិគោលដៅ។
អនុរដ្ឋលេខាធិការក្រសួងរតនាគារលោក Wally Adeyemo និយាយនៅក្នុងសេចក្តីថ្លែងការណ៍មួយថា៖ «សកម្មភាពរបស់យើងនៅថ្ងៃនេះ ជាពិសេសគឺភាពជាដៃគូជាមួយចក្រភពអង់គ្លេស និងកាណាដា គឺជាការផ្ញើសារថា លទ្ធិប្រជាធិបតេយ្យនៅជុំវិញពិភពលោកនឹងធ្វើសកម្មភាពប្រឆាំងនឹងអ្នកដែលបំពានអំណាចរបស់អាមេរិកដើម្បីដាក់ការគាបសង្កត់ និងធ្វើឱ្យឈឺចាប់»។
កាណាដា និងចក្រភពអង់គ្លេស ចូលរួមជាមួយសហរដ្ឋអាមេរិកក្នុងការដាក់ទណ្ឌកម្មពាក់ព័ន្ធនឹងការរំលោភសិទ្ធិមនុស្សក្នុងប្រទេសមីយ៉ាន់ម៉ា ខណៈពេលដែលទីក្រុងវ៉ាស៊ីនតោនដាក់ទណ្ឌកម្មថ្មីជាលើកដំបូងលើកូរ៉េខាងជើងក្រោមការគ្រប់គ្រងរបស់លោកប្រធានាធិបតី ចូ បៃដិន និងកំណត់គោលដៅលើអង្គភាពយោធាមីយ៉ាន់ម៉ា។
ស្ថានទូតចិនប្រចាំក្រុងវ៉ាស៊ីនតោនរិះគន់ទង្វើរបស់សហរដ្ឋអាមេរិកថាជា «ការជ្រៀតជ្រែកយ៉ាងធ្ងន់ធ្ងរនៅក្នុងកិច្ចការផ្ទៃក្នុងរបស់ចិន» និងជា «ការរំលោភយ៉ាងជ្រៅលើបទដ្ឋានជាមូលដ្ឋានដែលគ្រប់គ្រងទំនាក់ទំនងអន្តរជាតិ»។ អ្នកនាំពាក្យស្ថានទូតលោក Liu Pengyu និយាយថា វានឹងធ្វើឱ្យមានគ្រោះថ្នាក់យ៉ាងធ្ងន់ធ្ងរដល់ទំនាក់ទំនងចិន-អាមេរិក ហើយជំរុញឱ្យក្រុងវ៉ាស៊ីនតោនលុបចោលការសម្រេចចិត្តនេះ។
បេសកកម្មរបស់កូរ៉េខាងជើងនៅអង្គការសហប្រជាជាតិ និងស្ថានទូតមីយ៉ាន់ម៉ា និងបង់ក្លាដែសប្រចាំក្រុងវ៉ាស៊ីនតោនមិនទាន់ចេញប្រតិកម្មយ៉ាងណាទេ។ យ៉ាងណាមិញ ប្រទេសកូរ៉េខាងជើងស្វែងរកការដកទណ្ឌកម្មជុំវិញកម្មវិធីអាវុធនុយក្លេអ៊ែរពីសហរដ្ឋអាមេរិក និងទណ្ឌកម្មអន្តរជាតិជាយូរយារណាស់មកហើយ ប៉ុន្តែកន្លងមកបរិហារការរិះគន់របស់សហរដ្ឋអាមេរិកចំពោះកំណត់ត្រាសិទ្ធិមនុស្សរបស់ខ្លួនថា ជាភស្តុតាងនៃគោលនយោបាយអរិភាពប្រឆាំងនឹងក្រុងព្យុងយ៉ាង។
ចំណាត់ការថ្មីរបស់អាមេរិក គឺជាវិធានការចុងក្រោយបំផុតនៃការដាក់ទណ្ឌកម្មដែលកំណត់ពេលស្របពេលជាមួយនឹងកិច្ចប្រជុំកំពូលតាមប្រព័ន្ធវិឌីអូដើម្បីលទ្ធិប្រជាធិបតេយ្យរយៈពេលពីរថ្ងៃរបស់លោកបៃដិន ដែលលោកប្រកាសពីគំនិតផ្តួចផ្តើមដើម្បីជំរុញលទ្ធិប្រជាធិបតេយ្យនៅជុំវិញពិភពលោក។
លោកបៃដិននិយាយកាលពីថ្ងៃសុក្រថា ការប្តេជ្ញាចិត្តដែលធ្វើឡើងដោយមេដឹកនាំពិភពលោកជាង ១០០ មួយចំនួននៅក្នុងកិច្ចប្រជុំកំពូលនេះ នឹងជួយជំរុញការប្រឆាំងនឹងការកើនឡើងនូវរបបផ្ដាច់ការជុំវិញពិភពលោក ប្រយុទ្ធប្រឆាំងនឹងអំពើពុករលួយ និងលើកកម្ពស់សិទ្ធិមនុស្ស។
ប្រភព៖ NBC News