អាល្លឺម៉ង់និយាយថា ពេលវេលាជិតអស់ហើយសម្រាប់កិច្ចព្រមព្រៀងនុយក្លេអ៊ែរអ៊ីរ៉ង់
កាលពីថ្ងៃសៅរ៍នេះ រដ្ឋមន្ត្រីក្រសួងការបរទេសអាល្លឺម៉ង់ព្រមានថាពេលវេលាសម្រាប់ការចរចាស្វែងរកដំណោះស្រាយដើម្បីស្ដារកិច្ចព្រមព្រៀងនុយក្លេអ៊ែររវាងអ៊ីរ៉ង់ និងមហាអំណាចពិភពលោកគឺកំពុងជិតអស់ហើយ។
ការចរចាដើម្បីស្ដារកិច្ចព្រមព្រៀងនុយក្លេអ៊ែរអ៊ីរ៉ង់បានចាប់ផ្ដើមឡើងវិញនៅទីក្រុងវីយ៉ែន ប្រទេសអូទ្រីស ដោយភាគីទាំងអស់ព្យាយាមវាស់វែងលទ្ធភាពជោគជ័យ ខណៈពេលដែលមានការកើនឡើងភាពតានតឹងជុំវិញការទាមទាររបស់អ៊ីរ៉ង់។
រដ្ឋមន្ត្រីក្រសួងការបរទេសអាល្លឺម៉ង់អ្នកស្រីអាណាលេណា បៀរបូក ប្រាប់សារពត៌មានបន្ទាប់ពីកិច្ចប្រជុំ G7 នៅក្រុងលីវ៉ឺភូលចក្រភពអង់គ្លេសថា អ៊ីរ៉ង់បានចាប់ផ្ដើមការចរចាឡើងវិញជាមួយជំហរ ដែលធ្វើឱ្យការចរចាដើរថយក្រោយវិញយ៉ាងណាស់ ៦ ខែ។ ការចរចាបច្ចុប្បន្នបានចាប់ផ្ដើមក្រោយការផ្អាករយៈពេល ៥ ខែបន្ទាប់ពីការជាប់ឆ្នោតរបស់ប្រធានាធិបតីអភិរក្សនិយម និងប្រឆាំងលោកខាងលិចគឺលោកអ៊ីប្រាហ៊ីម រ៉ៃស៊ី។
អ៊ីរ៉ង់បានបង្ហាញថាគេមិនផ្លាស់ប្ដូរជំហរតឹងរ៉ឹងរបស់ពួកគេទេ។
មន្ត្រីការទូតជាន់ខ្ពស់អាមេរិកមួយរូបបាននិយាយថាបណ្ដាប្រទេស G7គឺកំពុងធ្វើកិច្ចពិភាក្សា «យ៉ាងខ្លាំង» ដើម្បីស្វែងរកជំហររួមលើកិច្ចចរចានុយក្លេអ៊ែរ។ មន្ត្រីរូបនេះបានប្រាប់ក្រុមអ្នកសារព័ត៌មាន ក្នុងលក្ខខណ្ឌមិនបញ្ចេញអត្តសញ្ញាណថា៖ «សេចក្តីថ្លែងការណ៍នេះក៏នឹងមានភាពរឹងមាំផងដែរលើសារៈសំខាន់នៃការធ្វើឱ្យអ៊ីរ៉ង់ត្រឡប់ទៅតុវិញ ហើយថាវាអាចទៅរួចក្នុងការបញ្ចប់កិច្ចព្រមព្រៀងមួយ ប៉ុន្តែពេលវេលាកំពុងខើច ដូច្នេះយើងត្រូវរួបរួមគ្នានៅក្នុងនោះ»៕
ប្រភព៖ Reuters
