កាន់តែច្បាស់! ហេតុផលនៃការនិយាយមួលបង្កាច់ បំភ្លៃការពិត ជេរប្រមាថរបស់ក្រុមសកម្មជន គឺដើម្បីបានសិទ្ធិទៅរស់នៅប្រទេសទី៣
ភ្នំពេញ ៖ នៅថ្ងៃទី១៣ ខែធ្នូ ឆ្នាំ២០២១នេះ វិទ្យុបរទេសជាខេមរភាសាបានផ្សព្វផ្សាយអំពីព័ត៌មានដែលថា អតីតសង្ឃ បូរ បេត កាលពីយប់រំលងអធ្រាត្រថ្ងៃទី១២ ខែធ្នូ ឆ្នាំ២០២១ ម្សិលមិញ បានចាកចេញពីប្រទេសថៃដោយសុវត្ថិភាពក្នុងដំណើរឆ្ពោះទៅកាន់ប្រទេសស្វីស (Switzerland) ជាទឹកដីដែល បូរ បេត ទទួលបានសិទ្ធិជ្រកកោនផ្នែកនយោបាយ។
លោក បូរ បេត បានអួតប្រាប់វិទ្យុនោះថា នៅពេលលោកទៅដល់ទឹកដីនៃប្រទេសស្វីស លោកនឹងនិមន្តទៅគង់នៅវត្តជាមួយព្រះតេជព្រះគុណ លួន សុវ៉ាត។ សង្ឃ លួន សុវ៉ាត បានគេចចេញពីកម្ពុជា ពីព្រោះតែរឿងបំផ្លាញព្រះពុទ្ធសាសនាដោយប្រព្រឹត្តនូវសកម្មភាព មានស្រីញី។ ប៉ុន្តែនៅពេលផ្ទុះរឿងអាស្រូវបំផ្លាញវិស័យសាសនា សង្ឃនេះ បានភៀសព្រះកាយក្រោមហេតុផលថាអាជ្ញាធរតាមរករឿងខ្លួន ព្រោះតែខ្លួននិយាយរិះគន់រដ្ឋាភិបាលរឿងព្រៃឈើ។
តើ បូរ បេត ជានរណា? សង្ឃ បូរ បេត បានភៀសព្រះកាយមកគង់នៅប្រទេសថៃកាលពីខែវិច្ឆិកា ឆ្នាំ២០២០។ ការគេចនៅពេលនោះត្រូវបានសង្ឃនេះ និយាយទាំងបំពាន និងធ្វើជាភ័យស្លន់ស្លោរថា គឺដើម្បីគេចខ្លួពីការតាមចាប់របស់អាជ្ញាធរកម្ពុជា ក្រោយពេលព្រះអង្គបានចូលរួមតវ៉ាដោយសន្តិវិធីទាមទារឱ្យដោះលែងមេដឹកនាំសហជីពលោក រ៉ុង ឈុន។ ក្នុងពេលគង់នៅប្រទេសថៃ ព្រះអង្គតែងតែបង្ហោះសាររិះគន់រដ្ឋាភិបាល ក្នុងរឿងរំលោភសិទ្ធិមនុស្ស និងបំផ្លាញប្រជាធិបតេយ្យ ព្រមទាំងបំផ្លិចបំផ្លាញធនធានធម្មជាតិជាដើម។ សង្ឃ បូរ បេត ត្រូវបានអាជ្ញាធរថៃចាប់ខ្លួន និងផ្សឹកកាលពីថ្ងៃទី១ ខែធ្នូ ឆ្នាំ២០២១ តែត្រូវបានដោះលែងឱ្យមានសេរីភាពវិញនៅថ្ងៃទី៣ ខែធ្នូ បន្ទាប់ពីអន្តរាគមន៍ជាច្រើនពីអង្គការអន្តរជាតិ ដែលជួយរៀបចំគម្រោងឱ្យចាកចេញនេះផង។
ទន្ទឹមនឹងការផ្សព្វផ្សាយព័ត៌មានទាក់ទងនឹង បូរ បេត នេះ ភ្លាមៗនោះ ក៏មានអ្នកចូលទៅខមមិនជាច្រើនក្នុងបណ្ដាញសង្គមរបស់វិទ្យុនេះ។ ការបញ្ចេញយោបល់ភាគច្រើនរបស់មហាជនគឺ រិះគន់ចំពោះសកម្មភាពដ៏គួរឱ្យស្អប់ខ្ពើមនៃសង្ឃ បូរ បេត។
អ្នកបញ្ចេញយោបល់ខ្លះបានលើកឡើងថា ខ្លួនកាន់សីល១០ មិនវៀរចាកនូវការឈឺឆ្អាលរឿងនយោបាយ រឿងតិទៀន។ គ្មានខំអានព្រះធម៌។ មតិខ្លះថា ចឹងបានជាខំណាស់ ព្រោះអាងបានសិទ្ធិជ្រកកោននយោបាយដេកស៊ីប្រាក់ខែគេចិញ្ចឹម។ ជនលក់ខួរ ខំតែអារឿងអុចអាលកម្ពុជា ផ្សាយតែរឿងមិនពិត។ ឱ្យបរទេសបង្វិលក្បាល!។
មតិខ្លះថា យកលេសបួស ខំប្រឹងជេរប្រមាថមួលបង្កាច់គេសោះ ដើម្បីបានសិទ្ធិទៅនៅក្រៅប្រទេសចាំតែដេកស៊ីប្រាក់គេចិញ្ចឹម សង្ឃម៉ាកៗនេះធ្វើឱ្យខូចដល់សាសនា។ មតិខ្លះថា អ៊ីចឹងបានជាគេចូលចិត្តជេរប្រមាថផ្សព្វផ្សាយព័ត៌មានមិនពិតពីកម្ពុជា ព្រោះក្រោយជេរប្រមាថហើយ បានសិទ្ធិជ្រកកោននយោបាយនៅក្រៅប្រទេស មិនហត់ធ្វើការលំបាកលំបិន។ មតិខ្លះថា សង្ឃអត់សីលខ្ជិលខំប្រឹងធ្វើការ។ បួសធ្វើនយោបាយជេរប្រមាថមួលបង្កាច់ដើម្បីបានសិទ្ធិបាន ទៅនៅក្រៅប្រទេសឱ្យគេចិញ្ចឹម។ ខ្លះថា អ៊ីចឹងតើបានគេចូលចិត្តជេរប្រព័ន្ធផ្សព្វផ្សាយនៅកម្ពុជា …។ ការពិតចឹងសោះ ចឹងបានជាចូលចិត្តជេរប្រមាថ ផ្សព្វផ្សាយញុះញង់ ដែលជាព័ត៌មានមិនពិតពីកម្ពុជាសោះ ដោយសារតែជេរប្រមាថទៅ ដើម្បីបានសិទ្ធិជ្រកកោណនយោបាយនៅក្រៅប្រទេសសោះ។ មតិខ្លះក៏បានចំអកឱ្យថា “បានដូចបំណងហើយ អាត្រងោលកូនប៉ា”…។ល។និង។ល។
ការពិតរាល់ការបញ្ចេញមតិខាងលើ មិនមែនជាការច្រណែនលើបុគ្គល បូរ បេត ទេ។ ប៉ុន្តែអ្វីដែលគួរតែលាតត្រដាងឱ្យឃើញពីគំនិតទុច្ចរិតរបស់ពួកគេគឺ សកម្មភាពទាំងឡាយដែល បូរ បេត បាននិយាយ បានធ្វើមិនមែនព្រោះតែស្នេហាជាតិដូច បូរ បេត និយាយនោះឡើយ។
អ្នកវិភាគឯករាជ្យមួយរូបបានបញ្ចេញយោបល់ថា សកម្មជនទាំងឡាយដែលតែងតែពើងទ្រូងអួតអាងថាខ្លួនជាអ្នកសេ្នហា ហើយនិយាយកាច់មួលបំភ្លៃការពិត ជេរប្រមាថមកលើថា្នក់ដឹកនាំ ផ្សព្វផ្សាយព័ត៌មានមិនពិតពីកម្ពុជា និយាយញុះញង់បំបែកបំបាក់ ការប្រើវោហាសាស្ត្រដោយគ្មានពិត និងគ្មានការទទួលខុសត្រូវរបស់ក្រុមពួកសកម្មជននេះ គឺដើម្បីបានទទួលទៅរស់ប្រទេសទីបីតែប៉ុណ្ណោះ។ គេធ្វើសកម្មភាពបែបនេះ ដើម្បីបំពេញចិត្តជនបរទេសដែលនៅពីក្រោយខ្នងដែលរៀបចំឈុតឆាកឱ្យពួកគេសម្ដែង។
អ្នកវិភាគបានបន្តថា គ្មានអ្វីដែលជាការពិតឡើយនៅរាល់ការលើកឡើងដែលពួកគេបានធ្វើ កំពុងធ្វើ និងបន្តធ្វើ់ ព្រោះពួកគេមានគោលដៅច្បាស់លាស់ គឺជេរប្រមាថ បំភ្លៃ បង្កភាពវឹកវរ ដល់សង្គមជាតិ ឱ្យមានបញ្ហាលើផ្លូវច្បាប់
ហើយគេយកលេសនេះ ដើម្បីចាកចេញទៅក្រៅប្រទេសទៅរស់នៅប្រទេសទីបី។ គេជាអ្នកស្នេហាក្លែងក្លាយ!។ ជាជនដែលគិតតែពីប្រយោជន៍ផ្ទាល់ខ្លួន ហើយយកមុខមាត់ប្រទេស យកការពិតមកជាន់ឈ្លីតែប៉ុណ្ណោះ។ តើយើងគួរជឿលើសម្ដីក្រុមនេះតទៅទៀតទេ?៕
ដោយៈជម្ពូនុទ