G7 ព្រមាន «ផលវិបាកដ៏ធំ» ប្រសិនបើរុស្ស៊ីវាយប្រហារប្រទេសអ៊ុយក្រែន
កាលពីថ្ងៃអាទិត្យ ទី១២ ធ្នូក្រុមប្រទេសអ្នកមាន G7 ព្រមានប្រទេសរុស្សីថាពួកគេអាចប្រឈមនឹង «ផលវិបាកដ៏ធំ» ប្រសិនបើពួកគេសម្រេចចិត្តវាយប្រហារឈ្លានពានប្រទេសអ៊ុយក្រែន នេះបើតាមការរាយការណ៍ដំបូងដោយសារព័ត៌មាន Reuters ផ្អែកទៅលើសេចក្ដីថ្លែងការណ៍ព្រាងមួយ។
ភ្នាក់ងារចារកម្មអាមេរិកបានវាយតម្លៃថារុស្សីអាចកំពុងរៀបចំផែនការធ្វើវាយលុកពហុសមរភូមិទៅលើប្រទេសអ៊ុយក្រែននៅដើមឆ្នាំក្រោយ ដែលអាចមានការចូលរួមទាហានរហូតទៅដល់ ១៧៥.០០០ នាក់។
រុស្សីបានច្រានចោលការចោទប្រកាន់នេះ ហើយនិយាយថាលោកខាងលិចគឺកំពុងមានបញ្ហាពីរើសអើងរុស្សី។ ទីក្រុងមូស្គូនិយាយថា ការពង្រីកអង្គការណាតូនៅអឺរ៉ុបខាងកើតបានគំរាមកំហែងដល់ប្រទេសរុស្សី និងបានបំពានលើការធានាដែលបានផ្ដល់ឱ្យពួកគេ ខណៈដែលសហភាពសូវៀតបានដួលរលំនៅឆ្នាំ ១៩៩១។
ប្រធានាធិបតីរុស្សីលោកវ្ល៉ាឌីមៀរ ពូទីនបានទាមទារឱ្យមានការធានាសន្តិសុខស្របច្បាប់ថា NATO នឹងមិនពង្រីកមកភាគខាងកើតបន្ថែមទៀត ឬដាក់អាវុធរបស់ខ្លួននៅជិតទឹកដីរុស្សីឡើយ។ ក្រុងវ៉ាស៊ីនតោនបាននិយាយម្ដងហើយម្ដងទៀតថា គ្មានប្រទេសណាអាចវេតូលើក្តីសង្ឃឹមរបស់អ៊ុយក្រែនដើម្បីចូលរួមអង្គការណាតូបានទេ។
យោងតាមសេចក្ដីថ្លែងការណ៍ខាងលើ គណៈប្រតិភូ G-7 ដែលកំពុងប្រជុំនៅទីក្រុងលីវ័រពូល របស់អង់គ្លេស បាននិយាយថា ពួកគេបានរួបរួមគ្នាក្នុងការថ្កោលទោសការប្រមូលផ្ដុំយោធារបស់រុស្ស៊ីនៅជិតអ៊ុយក្រែន ហើយពួកគេបានអំពាវនាវឱ្យទីក្រុងមូស្គូ កាត់បន្ថយភាពតានតឹង៕
ប្រភព៖ CNBC