ការចំណាយលើវិស័យសុខភិបាល ធ្វើឱ្យប្រជាជនជាងកន្លះពាន់លាននាក់ធ្លាក់ទៅក្នុងភាពក្រីក្រ
ប្រជាជនជាងកន្លះពាន់លាននាក់នៅទូទាំងពិភពលោក ធ្លាក់ចូលទៅក្នុងភាពក្រីក្រខ្លាំងកាលពីឆ្នាំមុន ដោយសារការចំណាយថ្លៃវិស័យសុខាភិបាលក្នុងអំឡុងពេលរីករាលដាលនៃជំងឺកូវីដ-១៩។ នេះបើយោងតាមអង្គការសុខភាពពិភពលោក និងធនាគារពិភពលោក។
សេចក្តីថ្លែងការណ៍រួមពីអង្គការទាំងពីរ ចេញផ្សាយកាលពីពីថ្ងៃអាទិត្យរៀបរាប់ថា ជំងឺរាតត្បាតបាននិងកំពុងប៉ះពាល់ដល់សេវាសុខភាពទូទាំងពិភពលោក និងបង្កឱ្យមានវិបត្តិសេដ្ឋកិច្ចដ៏អាក្រក់បំផុតចាប់តាំងពីទសវត្សរ៍ឆ្នាំ ១៩៣០ ដែលធ្វើឱ្យវាកាន់តែពិបាកសម្រាប់ប្រជាជនក្នុងការចំណាយលើការថែទាំសុខភាព។
អគ្គនាយកអង្គការសុខភាពពិភពលោក WHO លោក Tedros Adhanom Ghebreyesus បញ្ចាក់ថា៖ «រដ្ឋាភិបាលទាំងអស់ ត្រូវតែចាប់ផ្តើម និងពន្លឿនកិច្ចខិតខំប្រឹងប្រែងវិញលឿនៗ ដើម្បីធានាថា ប្រជាពលរដ្ឋម្នាក់ៗ អាចទទួលបានសេវាសុខភាព ដោយមិនភ័យខ្លាចពីផលវិបាកផ្នែកហិរញ្ញវត្ថុ»។
លោក Tedros បានជំរុញឱ្យរដ្ឋាភិបាលបង្កើនការយកចិត្តទុកដាក់របស់ពួកគេលើប្រព័ន្ធថែទាំសុខភាព និងបន្តឆ្ពោះទៅរកការគ្របដណ្តប់សុខភាពជាសកល ដែលអង្គការសុខភាពពិភពលោកបានកំណត់ ពោលគឺមនុស្សគ្រប់រូប ទទួលបានសេវាសុខភាព ដែលពួកគេត្រូវការ ដោយគ្មានការលំបាកផ្នែកហិរញ្ញវត្ថុ។
លោកបានបន្ថែមថា៖ «មុនការរាតត្បាតជំងឺរាតត្បាត ប្រទេសជាច្រើនមានការរីកចម្រើន។ ប៉ុន្តែវាមិនរឹងមាំគ្រប់គ្រាន់ទេ។ លើកនេះ យើងត្រូវតែកសាងប្រព័ន្ធសុខាភិបាលដែលរឹងមាំគ្រប់គ្រាន់ ដើម្បីទប់ទល់នឹងការប៉ះទង្គិចនានា ដូចជាជំងឺរាតត្បាតបន្ទាប់ ហើយបន្តដំណើរឆ្ពោះទៅរកការគ្របដណ្តប់សុខភាពជាសកល»។
ការថែទាំសុខភាព គឺជាបញ្ហានយោបាយដ៏សំខាន់នៅក្នុងសហរដ្ឋអាមេរិក ដែលជាប្រទេសមួយក្នុង ចំណោមប្រទេសឧស្សាហកម្មមួយចំនួន ដែលមិនមានការធានារ៉ាប់រងជាសកលសម្រាប់ពលរដ្ឋរបស់ខ្លួន។
នៅទូទាំងពិភពលោក ជំងឺរាតត្បាតបានធ្វើឱ្យអ្វីៗកាន់តែអាក្រក់ឡើង ហើយការចែកចាយវ៉ាក់សាំងបានធ្លាក់ចុះជាលើកដំបូងក្នុងរយៈពេល ១០ ឆ្នាំ ដោយចំនួនអ្នកស្លាប់ ដោយសារជំងឺរបេង និងគ្រុនចាញ់ក៏បានកើនឡើង។
លោក Juan Pablo Uribe នាយកសកលសម្រាប់សុខភាព អាហារូបត្ថម្ភ និងប្រជាជននៅធនាគារពិភពលោកបាននិយាយថា៖ «ខណៈពេលសារពើពន្ធមានកម្រិត រដ្ឋាភិបាលនឹងត្រូវធ្វើការជ្រើសរើសដ៏លំបាកដើម្បីការពារ និងបង្កើនថវិកាសុខភាព»។
លោកបានបន្តថា៖ «សូម្បីតែមុនពេលការរាតត្បាតនៃជំងឺកូវីដ-១៩ វិបត្តិនេះ បានវាយប្រហារមនុស្សជិត ១ ពាន់លាននាក់ កំពុងចំណាយច្រើនជាង ១០ ភាគរយនៃថវិកាគ្រួសាររបស់ពួកគេលើសុខភាព។ នេះមិនអាចទទួលយកបានទេ ជាពិសេសចាប់តាំងពីប្រជាជនក្រីក្របំផុតទទួលរងផលប៉ះពាល់ខ្លាំងបំផុត»។
ការសិក្សារបស់មជ្ឈមណ្ឌលស្រាវជ្រាវ PEW ប្រចាំទីក្រុងវ៉ាស៊ីនតោននៃសហរដ្ឋអាមេរិក ដែលបានចេញផ្សាយនៅក្នុងខែ មីនាឆ្នាំនេះថា ជំងឺរាតត្បាតកូវីដ បានជំរុញប្រជាជនឥណ្ឌាចំនួន ៣២ លាននាក់ចេញពីវណ្ណៈកណ្តាល ដែលត្រូវបានកំណត់ថា ជាអ្នក ដែលរកប្រាក់ចំណូលបានពី ១០ ទៅ ២០ ដុល្លារក្នុងមួយថ្ងៃ។
ប្រភពដដែល ក៏បានប៉ាន់ប្រមាណថាវិបត្តិនេះ បានបង្កើនចំនួនអ្នកក្រីក្ររបស់ប្រទេសឥណ្ឌា បង្កើនចំនួនអ្នក ដែលមានប្រាក់ចំណូល ២ ដុល្លារ ឬ តិចជាងនេះ ដល់ទៅ៧៥ លាននាក់។
ទន្ទឹមនឹងនេះដែរ របាយការណ៍ថ្មីមួយ ដែលបានចេញផ្សាយកាលពីថ្ងៃ ព្រហស្បតិ៍ ដោយទីភ្នាក់ងារកុមាររបស់អង្គការសហប្រជាជាតិ (UNICEF) បាននិយាយថា កុមារចំនួន ១០០ លាននាក់បន្ថែមទៀត ត្រូវបានគេប៉ាន់ប្រមាណថា កំពុងរស់នៅក្នុងភាពក្រីក្រពហុវិមាត្រ ដោយសារតែជំងឺរាតត្បាត ដែលជាការកើនឡើង ១០ ភាគរយចាប់តាំងពីឆ្នាំ ២០១៩។
លោក Henrietta Fore នាយកប្រតិបត្តិរបស់អង្គការ UNICEF បាននិយាយថា ផលប៉ះពាល់រីករាលដាលនៃកូវីដ កាន់តែបន្ដអាចបង្កើនភាពក្រីក្រ បង្កើនវិសមភាព និងការគំរាមកំហែងដល់សិទ្ធិរបស់កុមារ។
លោក បានបន្តថា៖ «ខណៈពេល ដែលចំនួនកុមារ ដែលស្រេកឃ្លាន ចេញពីសាលារៀន ត្រូវគេរំលោភបំពាន រស់នៅក្នុងភាពក្រីក្រ ឬបង្ខំឱ្យរៀបការមានការកើនឡើង ចំនួនកុមារ ដែលមានលទ្ធភាពទទួលបានការថែទាំសុខភាព វ៉ាក់សាំង អាហារគ្រប់គ្រាន់ និងសេវាសំខាន់ៗ កំពុងធ្លាក់ចុះផងដែរ»។
ប្រភព៖ Aljazeera
