ក្រុមកសិករឥណ្ឌាត្រឡប់ទៅផ្ទះសំបែងវិញ បន្ទាប់ពីធ្វើការតវ៉ាអស់រយៈពេលជាងមួយឆ្នាំ
ញូវដេលី៖ កសិករឥណ្ឌារាប់ពាន់នាក់វេចអីវ៉ាន់របស់ខ្លួន និងរុះរើតង់នៅជាយក្រុងញូវដេលីត្រឡប់ទៅផ្ទះវិញកាលពីថ្ងៃសៅរ៍ចុងសប្ដាហ៍មុន បន្ទាប់ពីធ្វើការតវ៉ាអស់រយៈពេលមួយឆ្នាំ ប្រឆាំងនឹងគោលនយោបាយកសិកម្មរបស់រដ្ឋាភិបាលឥណ្ឌា។
ការដកថយនេះធ្វើឡើង បន្ទាប់ពីលោកនាយករដ្ឋមន្រ្តី ណារិនដ្រា មូឌី (Narendra Modi) កាលពីខែមុន ប្រកាសឱ្យសភាលុបចោលច្បាប់កសិកម្មដ៏ចម្រូងចម្រាសចំនួនបី ដែលកសិករជាបាតុករអះអាងថានឹងអនុញ្ញាតឱ្យក្រុមហ៊ុនឯកជនគ្រប់គ្រងវិស័យកសិកម្មរបស់ប្រទេសនេះ។
កសិករឥណ្ឌាបោះតង់ធ្វើការតវ៉ាចាប់តាំងពីខែវិច្ឆិកា ឆ្នាំ ២០២០ ដើម្បីតវ៉ាប្រឆាំងនឹងច្បាប់កសិកម្មថ្មី ដែលវាជាបញ្ហាប្រឈមធំបំផុតមួយចំពោះរដ្ឋាភិបាលរបស់លោក Modi ចាប់តាំងពីឡើងកាន់អំណាចក្នុងឆ្នាំ ២០១៤ ។
លោក Sativinder Singh ដែលជាអ្នកចូលរួមតវ៉ាមួយរូប ប្រាប់ទីភ្នាក់ងារព័ត៌មាន AFP ថា៖ «យើងបានប្ដេជ្ញាថានឹងតវ៉ាឲ្យតែមានចំណាត់ការ។ ប៉ុន្តែយើងទាំងអស់គ្នាសប្បាយចិត្តដែលរដ្ឋាភិបាលទទួលយកការទាមទាររបស់យើង ហើយយើងនឹងត្រឡប់ទៅផ្ទះរបស់យើងវិញ»។
ដំបូងឡើយ ក្រុមបាតុករបដិសេធមិនព្រមចាកចេញពីកន្លែងបោះតង់ បើទោះបីជាមានការលុបចោលច្បាប់ ហើយធ្វើការទាមទារផ្សេងទៀត រួមទាំងការធានាផ្នែកច្បាប់សម្រាប់អត្រាគោលអប្បបរមាសម្រាប់ផលិតផលកសិកម្មរបស់ពួកគេ។
រដ្ឋាភិបាលនិយាយថា ខ្លួននឹងបង្កើតគណៈកម្មាការមួយស្តីពីការកំណត់តម្លៃអប្បបរមាសម្រាប់ដំណាំ និងសន្យាថានឹងបញ្ឈប់ការកាត់ទោសកសិករចំពោះការដុតបំផ្លាញដំណាំ ដែលគេចោទថាជាប្រភពនៃការបំពុលខ្យល់អាកាសដល់រដ្ឋធានីដេលីរាល់រដូវរងា។
ជាមួយគ្នានោះ រដ្ឋាភិបាលក៏បានយល់ព្រមបង់ប្រាក់សំណងដល់គ្រួសារកសិករជាង ៧០០ នាក់ដែលស្លាប់ក្នុងអំឡុងបាតុកម្ម និងដកសំណុំរឿងព្រហ្មទណ្ឌដែលដាក់ប្តឹងអ្នកតវ៉ា។
ប្រភព៖ Aljazeera
