ដំណើររដ្ឋមន្ត្រីការបរទេសអាមេរិកនៅអាស៊ីអាគ្នេយ៍ វិស័យសន្តិសុខស្ថិតក្នុងចំណោមរបៀបវារៈសំខាន់
រដ្ឋមន្ត្រីការបរទេសសហរដ្ឋអាមេរិកលោក អង់តូនី ប្លីងខិន នឹងធ្វើដំណើរទស្សនកិច្ចទៅកាន់តំបន់អាស៊ីអាគ្នេយ៍ជាលើកដំបូងក្នុងតំណែងជារដ្ឋមន្ត្រី។ លោកនឹងទៅកាន់ឥណ្ឌូនេស៊ី ម៉ាឡេស៊ី និងប្រទេសថៃ។ នេះបើតាមការលើកឡើងរបស់លោក ណេដ ប្រាយស៍ (Ned Price) អ្នកនាំពាក្យក្រសួងការបរទេសអាមេរិកកាលពីថ្ងៃពុធសប្ដាហ៍មុន។
ដំណើរទស្សនកិច្ចទៅកាន់ប្រទេសអាស៊ានទាំង ៣នេះ ជាផ្នែកមួយនៃដំណើរទស្សនកិច្ចជុំវិញពិភពលោករបស់លោក ប្លីងខិន ដោយចាប់ផ្ដើមពីថ្ងៃសុក្រនេះ លោកចេញដំណើរទៅប្រជុំរដ្ឋមន្ត្រីការបរទេសប្រទេសជឿនលឿនទាំង ៧ ឬ ប្រទេស G-7 នៅប្រទេសអង់គ្លេស។ បន្ទាប់ពីទៅអង់គ្លេស លោកនឹងហោះទៅប្រទេសឥណ្ឌូនេស៊ី ម៉ាឡេស៊ី និងប្រទេសថៃ មុននឹងចេញទៅហាវ៉ៃនៅថ្ងៃទី១៧ ខែធ្នូ។
អំឡុងពេលទស្សនកិច្ចនៅអាស៊ីអាគ្នេយ៍ លោក ប្លីងខិន នឹងពិភាក្សាអំពីវិស័យចំនួន ៤សំខាន់ៗរួមមាន សន្តិសុខ សុខភាពសាធារណៈ សេដ្ឋកិច្ច និងទំនាក់ទំនងរវាងប្រជាជន នឹងប្រជាជន។ នេះបើតាមការលើកឡើងរបស់ លោក ដានីញ៉ែល គ្រីធិនប្រ៊ីង (Daniel Kritenbrink) ឧបការីរដ្ឋមន្ត្រីទទួលបន្ទុកកិច្ចការអាស៊ីបូព៌ា។
ឧបការីរដ្ឋមន្ត្រីអាមេរិកបានសង្ខេបប្រាប់អ្នកសារព័ត៌មានកាលពីសប្ដាហ៍មុនថា ក្រៅពីវិស័យ ៤សំខាន់ៗនេះ រដ្ឋមន្ត្រីការបរទេសអាមេរិកក៏នឹងលើករឿងវិបត្តិអាកាសធាតុ បញ្ហាសិទ្ធិមនុស្ស និងប្រជាធិបតេយ្យ ហើយជាពិសេសទៅទៀតនេះគឺ វិបត្តិនៅប្រទេសមីយ៉ាន់ម៉ា។
ពាក់ព័ន្ធនឹងវិស័យសន្តិសុខ លោក គ្រីធិនប្រ៊ីង បានលើកឡើងថា លោករដ្ឋមន្ត្រីនឹងពិភាក្សាជាមួយប្រទេសអាស៊ីអាគ្នេយ៍ទាំង ៣នេះ អំពីសកម្មភាពរបស់ចិននៅសមុទ្រចិនខាងត្បូង និងនៅតាមដងទន្លេមេគង្គ។
នៅសមុទ្រចិនខាងត្បូង ខាងអាមេរិកជារឿយៗតែងតែអះអាងពីជំហររបស់ខ្លួនថា ខ្លួនឈរជាមួយអាស៊ានជានិច្ច នៅពេលណាដែលចិនបង្កជាការគំរាមកំហែងក្រោមរូបភាពនានា។ បន្ថែមពីនេះទៅទៀត អាមេរិកក៏បានលើកឡើងជាច្រើនដងថា ខ្លួនគាំទ្រទៅដល់ការអនុវត្តគោលការណ៍ «សេរីភាពនាវាចរណ៍ និងសេរីភាពផ្នែកហោះហើរលើដែនអាកាស»។
ចំណែកឯបញ្ហាមេគង្គវិញ ជាករណីថ្មីមួយ ដោយអ្នកតាមដានមួយចំនួនយល់ថា ករណីនេះអាចនឹងក្លាយជាមុខព្រួញមួយនៃការប្រកួតប្រជែងរវាងអាមេរិក និងចិន។ ជារឿយៗអាមេរិកតែងតែចោទចិនថា ប្រទេសមហាអំណាចអាស៊ីមួយនេះកំពុងតែបំផ្លាញបរិស្ថានទន្លេមេគង្គ តាមរយៈការសាងសង់ទំនប់វារីអគ្គិសនីនៅផ្នែកខាងលើទន្លេមេគង្គ ដែលចិនហៅថា ទន្លេឡានឆាង។
ពាក់ព័ន្ធនឹងវិស័យសេដ្ឋកិច្ចវិញ បើតាមលោក គ្រីតធិនប្រ៊ីង រដ្ឋមន្ត្រីការបរទេសអាមេរិកនឹងពិភាក្សាជាមួយសមភាគីអំពីលទ្ធភាពក្នុងការពង្រឹងកិច្ចសហប្រតិបត្តិការសេដ្ឋកិច្ចជាមួយប្រទេសអាស៊ានតាមរយៈក្របខ័ណ្ឌសេដ្ឋកិច្ចតំបន់ឥណ្ឌូ-ប៉ាស៊ីហ្វិករបស់សហរដ្ឋអាមេរិក។
លើវិស័យសុខាភិបាល អាមេរិកនឹងបង្ហាញការប្ដេជ្ញាចិត្តក្នុងការជួយប្រទេសអាស៊ីអាគ្នេយ៍ក្នុងការស្ដារពីជំងឺឆ្លងសកលកូវីដ-១៩ ចំណែកឯទំនាក់ទំនងរវាងប្រជាជន នឹងប្រជាជន អាមេរិកនឹងពង្រីកដល់ការផ្លាស់ប្ដូរយុវជនរវាងសហរដ្ឋអាមេរិក និងប្រទេសអាស៊ីអាគ្នេយ៍បន្ថែមទៀត។
ជាមួយគ្នានេះដែរ លោក គ្រីធិនប្រ៊ីង បានសង្កត់ធ្ងន់ផងដែរថា រដ្ឋមន្ត្រីការបរទេសអាមេរិក «នឹងជំរុញឱ្យសមភាគីរបស់លោកពង្រឹងស្ថាប័នប្រជាធិបតេយ្យ និងការការពារប្រជាធិបតេយ្យ»។
ដំណើរទស្សនកិច្ចរបស់លោក ប្លីងខិន បានធ្វើឡើងក្រោយពេលដែល អាមេរិកបង្វែរចំណាប់អារម្មណ៍របស់ខ្លួនមកលើតំបន់អាស៊ីអាគ្នេយ៍។ ក្រោយពេលដែលលោក ចូ បៃដិន ប្រធានាធិបតីសហរដ្ឋអាមេរិកឡើងកាន់តំណែង គេតែងតែសង្កេតឃើញថា មន្ត្រីកំពូលៗ និងមន្ត្រីជាន់ខ្ពស់របស់អាមេរិកមកធ្វើដំណើរទស្សនកិច្ចនៅតំបន់នេះ។
បន្ថែមពីនេះទៅទៀត លោក បៃដិនផ្ទាល់ក៏បានចូលរួមនៅក្នុងកិច្ចប្រជុំកំពូលអាស៊ាន-អាមេរិក និងកិច្ចប្រជុំពាក់ព័ន្ធដទៃៗទៀតដូចជា កិច្ចប្រជុំអាស៊ីបូព៌ាជាដើម។ សកម្មភាពនេះគឺខុសពីរដ្ឋាបាលរបស់លោក ដូណាល់ ត្រាំ ដែលមិនសូវជាប្រាស្រ័យទាក់ទងជាមួយអាស៊ីអាគ្នេយ៍ប៉ុន្មាននោះទេ។
ប្រភព៖ CNA
