ទីបំផុត! អូមីក្រុងបង្ខំចិត្តឲ្យថៃ ផ្អាកទទួលទេសចរថ្មីៗសិន
ទីភ្នាក់ងារសារព័ត៌មាន Thai PBS News បានចេញផ្សាយ នាថ្ងៃទី២២ ធ្នូនេះថា ប្រទេសថៃបានប្រកាសឈប់ទទួលភ្ញៀវទេសចរថ្មីចូលក្នុងប្រទេស ចាប់ពីថ្ងៃទី២២ ធ្នូ ២០២១នេះ រហូតដល់ថ្ងៃទី៤ មករា ២០២២ ដោយសារតែវីរុសកូវីដ១៩បំប្លែងខ្លួនថ្មីអូមីក្រុងវាយលុកខ្លាំងពេក។
គួរបញ្ជាក់ដែរថា ថៃមានករណី អូមីក្រុង រាប់សិបនាក់ហើយ ដែលរឃើញជាបន្តបន្ទាប់។
លោកនាយករដ្ឋមន្ត្រី ប្រាយុទ្ធ ចាន់អ៊ូចា បានប្រកាសផ្អាកទទួលភ្ញៀសទេចរចំណូលថ្មីឲ្យចូលប្រទេស ជាពិសេសគឺរំសាយចោលនូវកម្មវិធី Test & Go នៃការទទួលភ្ញៀវទេសចរ។ ប៉ុន្តែ ភ្ញៀវទេសចរដែលបានចុះឈ្មោះចូលមកក្នុងប្រទេសថៃរួចហើយ ប្រមាណ២០០,០០០នាក់នោះ ពេលនេះចូលមកប្រទេសថៃបានជាង១០០,០០០នាក់ហើយ នៅសល់ ប្រមាណ៩០,០០០នាក់ទៀត ដែលនឹងត្រូវចូលមកប្រទេសថៃ ខាងក្រសួងសុខាភិបាលថៃនឹងពិនិត្យយ៉ាងតឹងរឹងមិនដូចពេលមុនទៀតនោះឡើយ។
នាព្រឹកថ្ងៃទី២២ ធ្នូ ២០២១នេះ អាជ្ញាធរថៃក៏បានរកឃើញអ្នកឆ្លងជំងឺកូវីដ១៩ថ្មី ជាង២ពាន់នាក់ ស្លាប់៣១នាក់ទៀត ក្នុងពេល២៤ម៉ោងចុងក្រោយមកនេះ។ ប្រទេសថៃមានអ្នកឆ្លងជំងឺកូវីដ១៩សរុប រហូតទៅដល់២,១៧០,១៩៨នាក់ ជាសះស្បើយពីជំងឺមានចំនួន ២,១១១,៩៦២នាក់ កំពុងសម្រាកព្យាបាលជំងឺមានចំនួន៣៨,២០២នាក់ ខណ:អ្នកដែលបានបាត់បង់ជីវិតព្រោះជំងឺនេះ កើនដល់២១,៤៦៩នាក់ហើយ៕
