ឥណ្ឌូនេស៊ីបានបញ្ជាក់ថា អាមេរិកពិតជាបញ្ចុះបញ្ចូលឱ្យខ្លួនទទួលស្គាល់អ៊ីស្រាអែល
ក្រសួងការបរទេសឥណ្ឌូនេស៊ីបានចេញមុខមកបញ្ជាក់ថា សហរដ្ឋអាមេរិកពិតជាបានបញ្ចុះបញ្ចូលខ្លួនឱ្យមានទំនាក់ទំនងការទូតជាមួយប្រទេសអ៊ីស្រាអែលមែន អំឡុងពេលដែលលោកអាន់តូនី ប្លីនកែន រដ្ឋមន្ត្រីការបរទេសអាមេរិកធ្វើដំណើរទស្សនកិច្ចមកកាន់រដ្ឋធានីហ្សាការតាកាលពីខែធ្នូកន្លងទៅ។
លោក Teuku Faizasyah អ្នកនាំពាក្យក្រសួងការបរទេសឥណ្ឌូនេស៊ីបានប្រាប់សារព័ត៌មាននីកេ (Nikkei Asian Review) ថា បញ្ហាទំនាក់ទំនងឥណ្ឌូនេស៊ី និងអ៊ីស្រាអែលពិតជាស្ថិតក្នុងប្រធានបទនៃកិច្ចពិភាក្សារវាងលោក ប្លីនកែន និងអ្នកស្រីរដ្ឋមន្ត្រីការបរទេស រ៉េតណូ ម៉ារស៊ូឌី មែន។
យ៉ាងណាមិញ លោកបានសង្កត់ធ្ងន់ថា ជំហររបស់ឥណ្ឌូនេស៊ីគឺនៅតែដដែលពោលគឺ «ឥណ្ឌូនេស៊ីនឹងបន្តជួយប្រជាជនប៉ាឡេស្ទីន ដើម្បីតស៊ូស្វែងរកយុត្តិធម៌ និងឯករាជ្យ»។
ដំណឹងនេះត្រូវបានបែកធ្លាយដំបូងនៅសារព័ត៌មានអាមេរិក Axios។
ឥណ្ឌូនេស៊ីជាប្រទេសអាស៊ីអាគ្នេយ៍មួយ ដែលមិនមានទំនាក់ទំនងការទូតផ្លូវការជាមួយអ៊ីស្រាអែលនោះទេ ដោយសារតែខ្លួនប្រកាសគាំទ្រអធិបតេយ្យភាពប៉ាឡេស្ទីន។ នេះក៏ព្រោះតែមហាជនភាគច្រើននៅឥណ្ឌូនេស៊ីជាឥស្លាមសាសនិក៕
ប្រភព៖ Nikkie Asia
