ប៉ូលិសជប៉ុន៖ ការវាយប្រហារតាមអ៊ីនធឺណិតលើភ្នាក់ងារអវកាស ពាក់ព័ន្ធនឹងយោធាចិន
កាលពីថ្ងៃអង្គារ ទី២៨ ធ្នូ ប៉ូលិសជប៉ុនបានទទួលដីកាចាប់ខ្លួនបុរសជនជាតិចិនមួយរូប ពាក់ព័ន្ធនឹង ការវាយប្រហារតាមអ៊ីនធឺណិតលើទីភ្នាក់ងារអវកាស JAXA របស់ខ្លួន ដែលជាការវាយប្រហារមួយគេជឿជាក់ថាមានទំនាក់ទំនងជាមួយយោធាចិន។
ប៉ូលិសជប៉ុននឹងព្យាយាមដាក់ជនជាប់ចោទជាអតីតនិស្សិតអន្តរជាតិរូបឈ្មោះវ៉ាង ជៀនប៊ីន ដែលបានចាកចេញពីប្រទេសជប៉ុនរួចទៅហើយ ទៅក្នុងបញ្ជីចាប់ខ្លួនរបស់អង្គការ Interpol។
ប៉ូលិសបាននិយាយថាជនជាប់ចោទបានធ្វើសកម្មភាពក្រោមការណែនាំពីពីភរិយារបស់សមាជិកនៃអង្គភាពសង្គ្រាមតាមអ៊ីនធឺណិតលេខ 61419 របស់កងទ័ពរំដោះប្រជាជនចិន ធ្វើឱ្យករណីនេះមាន «តម្រុយយ៉ាងខ្លាំងអំពីការចូលរួមរបស់យោធា»។
នៅក្នុងខែវិច្ឆិកា ឆ្នាំ ២០១៦ លោកវ៉ាងបានព្យាយាមទិញកម្មវិធីសន្តិសុខមួយ ខណៈច្បាប់កំណត់ឱ្យលក់ឱ្យតែក្រុមហ៊ុនជប៉ុនប៉ុណ្ណោះ។ ប៉ូលិសជប៉ុននិយាយថាលោកបានប្រើប្រាស់ឈ្មោះ និងក្រុមហ៊ុនក្លែងក្លាយដើម្បីចរចាការទិញកម្មវិធីនេះ។
ប៉ុន្តែចុងក្រោយក្រុមហ៊ុនលក់កម្មវិធីបញ្ឈប់ការលក់នេះ ដោយលើកឡើងអំពីភាពមិនប្រក្រតីក្នុងសំណើរបស់លោកវ៉ាង។ ប៉ូលិសជប៉ុនសង្ស័យថាយោធាចិនចង់បានកម្មវិធីដើម្បីស្វែងរកចំណុចខ្សោយ សម្រាប់ធ្វើការវាយប្រហារនៅពេលអនាគត។
លោកវ៉ាងក៏បានទទួលការណែនាំឱ្យជួលបណ្ដាញកុំព្យូទ័រមេនៅជប៉ុន ហើយផ្ដល់ការគ្រប់គ្រងនេះទៅឱ្យចិន។ ប៉ូលិសសង្ស័យថាបណ្ដាញកុំព្យូទ័រមេនេះត្រូវបានប្រើប្រាស់ក្នុងការវាយប្រហាររវាងឆ្នាំ ២០១៦ និង ២០១៧ ទៅលើគោលដៅជាង ២០០ ដែលរួមមានភ្នាក់ងារសិក្សាអវកាសជប៉ុន (JAXA) និងក្រុមហ៊ុនអវកាសជប៉ុនជាច្រើន៕
ប្រភព៖ Nikkie Asia
