ក្រុមចម្រុះដឹកនាំដោយអារ៉ាប៊ីសាអូឌីត បដិសេធថាការវាយប្រហាររបស់ខ្លួនមិនបានផ្តោតលើមណ្ឌលឃុំឃាំងយេម៉ែនទេ
ក្រុមចម្រុះដឹកនាំដោយអារ៉ាប៊ីសាអូឌីតដែលកំពុងប្រយុទ្ធក្នុងប្រទេសយេម៉ែនបដិសេធថា ខ្លួនមិនបានកំណត់គោលដៅដោយចេតនាលើមជ្ឈមណ្ឌលឃុំឃាំង ក្នុងការវាយប្រហារតាមអាកាសកាលពីថ្ងៃសុក្រដែលសម្លាប់មនុស្សរាប់សិបនាក់ និងបណ្តាលឱ្យដាច់អ៊ិនធឺណិតទូទាំងប្រទេសនោះទេ។
ក្រុមសកម្មប្រយុទ្ធ Houthi គាំទ្រដោយអ៊ីរ៉ង់ ដែលគ្រប់គ្រងភាគច្រើននៃប្រទេសយេម៉ែន ធ្វើការស្តីបន្ទោសលើក្រុមចម្រុះដឹកនាំដោយអារ៉ាប៊ីសាអូឌីត ចំពោះការវាយប្រហារលើមន្ទីរឃុំឃាំងនៅទីក្រុង Sa’ada ភាគខាងជើង។ ប៉ុន្តែកាលពីថ្ងៃសៅរ៍ អ្នកនាំពាក្យនៃក្រុមចម្រុះ លោកឧត្តមសេនីយ៍ទោ Turki Al-Maliki ហៅការអះអាងទាំងនោះថា «គ្មានមូលដ្ឋាន»។
លោក Al-Maliki និយាយថា ពន្ធនាគារនោះមិនត្រូវបានដាក់ក្នុង «បញ្ជីដែលមិនត្រូវវាយប្រហារ» ស្របតាមយន្តការដែលបានព្រមព្រៀងជាមួយការិយាល័យកិច្ចការមនុស្សធម៌របស់អង្គការសហប្រជាជាតិនៅយេម៉ែននោះទេ។
យោងតាមរដ្ឋមន្ត្រីសុខាភិបាល Houthi លោក Taha Al-Mitwakel និយាយថា មនុស្សយ៉ាងហោចណាស់ ៨២ នាក់បានស្លាប់ និង ២៦៦ នាក់បានរងរបួសនៅក្នុងការវាយប្រហារ ដែលភាគច្រើននៃពួកគេស្ថិតក្នុងស្ថានភាពធ្ងន់ធ្ងរ។ ក្រុមវេជ្ជបណ្ឌិតគ្មានព្រំដែន (MSF) មុននោះនិយាយថាមនុស្ស ៧០ នាក់ស្លាប់ និង ១៣០ នាក់រងរបួស។
ការវាយប្រហារតាមផ្លូវអាកាសមួយផ្សេងទៀតកាលពីព្រឹកថ្ងៃសុក្រ ធ្វើឡើងលើអគារទូរគមនាគមន៍នៅក្នុងទីក្រុងកំពង់ផែយុទ្ធសាស្ត្រ Hodeidah ដែលបណ្តាលឱ្យដាច់អ៊ិនធឺណិតទូទាំងប្រទេស។ នេះបើយោងតាម NetBlocks ដែលជាអង្គការតាមដានការរំខានបណ្តាញ។ អ្នកនាំពាក្យអង្គការ Save the Children លោក Amjad Yamin និយាយថា ក្មេងយ៉ាងហោចណាស់ ៤ នាក់បានស្លាប់ និង ១៧ នាក់រងរបួសក្នុងការវាយប្រហារនោះ។
ទីភ្នាក់ងារជំនួយចំនួន៨ដែលកំពុងធ្វើប្រតិបត្តិការនៅយេម៉ែនលើកឡើងតាមរយៈសេចក្តីថ្លែងការណ៍រួមថា ខ្លួនមានការរន្ធត់ចិត្តចំពោះព័ត៌មានដែលថាមនុស្សជាង ៧០ នាក់ រួមទាំងជនចំណាកស្រុក ស្ត្រី និងកុមារត្រូវបានសម្លាប់នៅក្នុងការមិនយកចិត្តទុកដាក់ចំពោះជីវិតជនស៊ីវិល។ ក្រុមដដែលនិយាយថា ពន្ធនាគារនៅក្រុង Saada ត្រូវបានប្រើជាមណ្ឌលឃុំឃាំងសម្រាប់ជនចំណាកស្រុក។
ក្រុមចម្រុះចាប់ផ្តើមការវាយលុកនៅក្នុងឆ្នាំ ២០១៥ ដើម្បីស្ដាររដ្ឋាភិបាលដែលមានការទទួលស្គាល់ជាអន្តរជាតិរបស់យេម៉ែន បន្ទាប់ពីពួកសកម្មប្រយុទ្ធ Houthi ដេញរដ្ឋាភិបាលនេះចេញ។ ក្រុមនេះបង្កើនការវាយប្រហាររបស់ខ្លួន បន្ទាប់ពី Houthi ធ្វើការវាយប្រហារដោយដ្រូនលើរាជធានី Abu Dhabi របស់អារ៉ាប់រួមកាលពីដើមសប្ដាហ៍មុន។
ប្រភព៖ CNN
