ក្រុមហ៊ុន Ant Group របស់ ជេក ម៉ា អាចជាប់ពាក់ព័ន្ធនឹងករណីពុករលួយនៅចិន
ក្រុមហ៊ុន Ant Group របស់មហាសេដ្ឋីចិន ជេក ម៉ា ប្រឈមនឹងការជាប់ពាក់ព័ន្ធនឹងករណីរឿងអាស្រូវអំពើពុករលួយរបស់អតីតលេខាគណបក្សកុម្មុយនិស្តចិននៅទីក្រុងហង់ចូវ (Hangzhou)។ នេះបើតាមការចុះផ្សាយរបស់សារព័ត៌មាន Financial Times ដោយផ្អែកលើកំណត់ត្រាសាធារណៈ និងតាមប្រភពមួយចំនួន។
បើយោងតាមប្រភពខាងលើ ក្រុមហ៊ុនបុត្រសម្ព័ន្ធរបស់ក្រុមហ៊ុន Ant Group បានទិញដីចំនួន ២ឡូតិ៍នៅទីក្រុងហង់ចូវ កាលពីឆ្នាំ២០១៩ ជាមួយនឹងការចុះតម្លៃ ក្រោយពេលដែលចូលភាគហ៊ុនជាមួយប្រព័ន្ធបង់ប្រាក់តាមទូរស័ព្ទចំនួន២ ដែលកាន់កាប់ដោយប្អូនប្រុសរបស់អតីតលេខាបក្សនៃទីក្រុងនេះគឺ លោក Zhou Jiangyong។ លោក Zhou ត្រូវបានគេចាប់ខ្លួននៅខែសីហា ឆ្នាំមុន។
ទូរទស្សន៍រដ្ឋចិនបានចាក់ផ្សាយភាពយន្តឯកសារមួយស្ដីពីការបង្ក្រាបអំពើពុករលួយកាលពីថ្ងៃពុធ ដោយបានបង្ហាញថា ប្រព័ន្ធបង់ប្រាក់ទាំងពីរខាងលើជាប់ពាក់ព័ន្ធនឹងរឿងអាស្រូវពុករលួយរបស់លោក Zhou។
ភាពយន្តឯកសារដែលផលិតដោយគណៈកម្មាធិការមជ្ឈិមសម្រាប់អធិការកិច្ចវិន័យ បានផ្សាយថា ក្រុមហ៊ុនឯកជនមួយចំនួន ត្រូវបានអតីតលេខាបក្ស Zhou ជួយទិញដីថោកៗ និងទទួលបានផលប្រយោជន៍តាមរយៈគោលនយោបាយអំណោយផលដល់ខ្លួន។ យ៉ាងណាក៏ដោយ ភាពយន្តឯកសារនោះមិនបាននិយាយចំៗថា ក្រុមហ៊ុន Ant Group ពាក់ព័ន្ធនឹងរឿងនេះទេ។
ក្រុមហ៊ុនរបស់លោក ជេក ម៉ា រួមទាំងលោក Zhou នៅមិនទាន់ឆ្លើយតបភ្លាមៗឡើយ។
សារព័ត៌មាន Financial Times ចុះផ្សាយថា ក្រុមហ៊ុនរបស់ជេក ម៉ាកំពុងតែរងសម្ពាធនយោបាយដោយរដ្ឋាភិបាលចិន ក្រោយពេលលោក ស៊ី ជីនភីង ប្រធានាធិបតីចិនកំពុងតែអនុវត្តនូវទស្សនៈ «វិបុលភាពរួម» ដែលរុកកួនដល់ក្រុមហ៊ុនឯកជនមួយចំនួនទៀតផង៕
ប្រភព៖ Reuters