លោកជំទាវ ហោ ម៉ាលីន គូសបញ្ជាក់ថា ក្រោមការដឹកនាំប្រកប ដោយគតិបណ្ឌិតរបស់សម្តេច តេជោ ហ៊ុន សែន នៅតែចាត់ទុកវិស័យកសិកម្មគឺជាវិស័យអាទិភាពមួយនៅគ្រប់កាលទេសៈសម្រាប់កម្ពុជា និងជាកិច្ចការ ចាំបាច់មិនអាចខ្វះបាន
នៅអគ្គនាយកដ្ឋានសុខភាពសត្វ និងផលិតកម្មសត្វ នាព្រឹកថ្ងៃទី ២៦ ខែមករា ឆ្នំា២០២២ មានរៀបចំពិធីបើកកិច្ចប្រជុំបូកសរុបការងារសុខភាពសត្វ និងផលិតកម្មសត្វ ប្រចាំឆ្នាំ២០២១ និងទិសដៅការងារឆ្នាំ២០២២ រយៈពេលពីរថ្ងៃ គឺចាប់ពីថ្ងៃទី២៦ដល់២៧ ខែមករា ឆ្នំា២០២២ ក្រោមអធិបតីភាពលោកជំទាវ ហោ ម៉ាលីន រដ្ឋលេខាធិការ តំណាងឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ឯកឧត្តម តាន់ ផាន់ណារ៉ា ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយក នៃអគ្គនាយកដ្ឋានសុខភាពសត្វ និងផលិតកម្មសត្វ ដៃគូរពាក់ព័នជាតិ អន្តរជាតិ ចូលរួមផងដែរ។
ឯកឧត្តម តាន់ ផាន់ណារ៉ា បានបញ្ជាក់ថា បច្ចុប្បន្នអនុវិស័យសុខភាពសត្វ និងផលិតកម្មសត្វ កំពុងដើរតួនាទីយ៉ាងសំខាន់ក្នុងវិស័យកសិកម្មសម្រាប់ជួយទ្រទ្រង់ជីវភាពប្រជាកសិករ សេដ្ឋកិច្ចជាតិ តំបន់ និងសកលលោក។ សត្វពាហនៈ ដែលធ្លាប់ដើរតួនាទីជាមធ្យោបាយ ដ៏សំខាន់ប្រើប្រាស់ជាកម្លាំងអូសទាញ ភ្ជួររាស់ បាននឹងកំពុងវិវត្តទៅជាផលិតកម្មសម្រាប់សេដ្ឋកិច្ច។ បច្ចុប្បន្ន កសិករចិញ្ចឹមសត្វសម្រាប់ជាម្ហូបអាហារ និងពាណិជ្ជកម្មនាំចេញ។ ដូច្នេះអនុវិស័យនេះកំពុងតែចូលរួមចំណែកយ៉ាងសកម្មក្នុងការធានាសន្តិសុខស្បៀង និងលើកកម្ពស់សុវត្ថិភាពម្ហូបអាហារ ដែលផ្តល់ជាប្រភពប្រូតេអ៊ីនសម្រាប់ប្រជាជនកម្ពុជាទូទាំង ប្រទេស។
ការរៀបចំកិច្ចប្រជុំនេះមានគោលបំណងដើម្បីពិនិត្យមើលលើលទ្ធផលការងារសុខភាពសត្វ និងផលិតកម្មសត្វ ដែលសម្រេចបានក្នុងឆ្នាំ២០២១ កន្លងមក និងលើកទិសដៅការងារសម្រាប់ឆ្នាំ២០២២ ដើម្បីឆ្លើយតបបានទៅនឹងនិន្នាការសង្គម សេដ្ឋកិច្ចជាតិក្នុងតំបន់ និងអន្តរជាតិ ពាក់ព័ន្ធនិងផលិតកម្មសត្វ ការផ្ទុះជំងឺឆ្លងសត្វ បញ្ហាសុខភាពសត្វ និងសុខភាពសាធារណៈ ការប្រែប្រួលលអាកាសធាតុ ពាណិជ្ជកម្មសត្វ ដែលជះឥទ្ធិពលដល់សន្តិសុខសុវត្តិភាពស្បៀង សុខុមាលភាព សុខភាព និងសង្គម ក្នុងបរិបទនៃសាកលភាវូបនីយកម្ម។
លោកជំទាវ ហោ ម៉ាលីន មានប្រសាសន៍ថា ក្រោមការដឹកនាំប្រកបដោយគតិបណ្ឌិតរបស់សម្តេច តេជោ ហ៊ុន សែន នាយករដ្ឋមន្ត្រីនៃកម្ពុជា នៅតែចាត់ទុកវិស័យកសិកម្មគឺជាវិស័យអាទិភាពមួយនៅគ្រប់កាលទេសៈសម្រាប់កម្ពុជា និងជាកិច្ចការចាំបាច់មិនអាចខ្វះបាន ពីព្រោះថា វិសាលភាពនៃកិច្ចការនេះបានជួយបំពេញដល់ការបែងចែកផ្លែផ្កានៃកំណើនសេដ្ឋកិច្ច ការបង្កើនផលិតភាព ការបង្កើនការងារ ការប្រើអស់សក្ដានុពលនៃធនធាន និងលើកស្ទួយជីវភាពរស់នៅរបស់ប្រជាជន។ អ្នកសេដ្ឋកិច្ច និងស្ថាប័នអន្តរជាតិធំៗព្យាករណ៍ថា ឆ្នាំ២០២០ សេដ្ឋកិច្ចកម្ពុជាធ្លាក់ចុះក្នុងរង្វង់-១,៩ទៅ-២% ដោយសារឥទ្ធិពលជំងឺ Covid-19 គ្របដណ្តប់ទូទាំងសកលលោក និងកម្ពុជាផងដែរ ប៉ុន្តែទោះបីជាយ៉ាងណាផលិតកម្មសត្វនៅកម្ពុជាមានការកើនឡើង។ ក្នុងទស្សនៈនេះលោកជំទាវ នៅតែជឿជាក់ថា ភាពរីកលូតលាស់ នៃវិស័យកសិកម្មមិនត្រឹមតែជាយន្ដការស្នូលនៃកំណើនសេដ្ឋកិច្ចប៉ុណ្ណោះទេ ប៉ុន្ដែថែមទាំងលើកស្ទួយជីវភាពរស់នៅរបស់ប្រជាជនផង និងរក្សាបាននៅសុវត្ថិភាព និងសន្តិសុខស្បៀងផងដែរ។
ជាទីបញ្ចប់ ជាមួយនឹងការប្រកាសបើកកិច្ចប្រជុំបូកសរុបការងារសុខភាពសត្វ និងផលិតកម្មសត្វប្រចាំឆ្នាំ២០២១ និងលើកទិសដៅឆ្នាំ២០២២នេះ លោកជំទាវ ហោ ម៉ាលីន រដ្ឋលេខាធិការក្រសួងកសិកម្ម សង្ឃឹមនឹងជឿជាក់ថា ដំណើរការនៃអង្គសន្និបាតនឹងប្រព្រឹត្តទៅប្រកបដោយជោគជ័យតាមកម្មវិធីដែលបានគ្រោងទុក៕