ការស្ទង់មតិថ្មីបង្ហាញថា អ្នកគាំទ្រទាំងពីរបក្សបែកខ្ញែកគ្នាជុំវិញវត្តមានលោក បៃដិន និងត្រាំក្នុងការបោះឆ្នោតឆ្នាំ ២០២៤
អ្នកបោះឆ្នោតគាំទ្រគណបក្សប្រជាធិបតេយ្យ និងសាធារណៈរដ្ឋបែកខ្ញែកគ្នា ជុំវិញវត្តមានរបស់លោកប្រធានាធិបតី ចូ បៃដិន ឬលោកអតីតប្រធានាធិបតី ដូណាល់ ត្រាំ ឈរឈ្មោះជាបេក្ខភាពក្នុងការបោះឆ្នោតឆ្នាំ ២០២៤ ខណៈដែលមានបេក្ខជនតិចតួចក្នុងចិត្តដែលអាចជំនួសអ្នកទាំងពីរ។ នេះបើយោងតាមការស្ទង់មតិរបស់ CNN ដែលចេញផ្សាយកាលពីថ្ងៃអាទិត្យ។
ការស្ទង់មតិដែលធ្វើឡើងនៅចន្លោះថ្ងៃទី ១០ ខែមករា ដល់ថ្ងៃទី ០៦ ខែកុម្ភៈ និងមានអ្នកចូលរួមឆ្លើយចំនួន ១ ៥២៧ នាក់ រកឃើញថា ៥១ ភាគរយនៃអ្នកបោះឆ្នោតគាំទ្រគណបក្សប្រជាធិបតេយ្យ ចង់បានអ្នកផ្សេងក្រៅពីលោក Biden ក្នុងឆ្នាំ ២០២៤ ខណៈដែល ៤៥ ភាគរយសង្ឃឹមថា លោកនឹងតែងតាំងឱ្យឈរឈ្មោះជាថ្មី។
ការស្ទង់មតិក៏រកឃើញផងដែរថា ៥០ ភាគរយនៃអ្នកបោះឆ្នោតគាំទ្រគណបក្សសាធារណរដ្ឋចង់ឱ្យលោកជាអ្នកឈរឈ្មោះ ខណៈដែល ៤៩ ភាគរយចង់ឱ្យបេក្ខជនផ្សេងទៀតចូលក្នុងការប្រកួតប្រជែង។
តាមការស្ទង់មតិដដែល ក្នុងចំណោមអ្នកប្រជាធិបតេយ្យដែលចូលចិត្តអ្នកផ្សេងក្រៅពីលោក Biden មាន ៣១ ភាគរយនិយាយថា ពួកគេមិនចង់ឱ្យលោកជាប់ឆ្នោតឡើងវិញ ខណៈ ៣៥ ភាគរយនិយាយថា ពួកគេមិនជឿថាលោក Biden អាចយកឈ្នះបេក្ខជននៃគណបក្សសាធារណរដ្ឋ ស្របពេលដែល ៣៤ ភាគរយផ្សេងទៀតលើកឡើងពីហេតុផលផ្សេងគ្នាដោយថាលោក Biden មានអាយុចាស់ពេក និងការចង់បានបេក្ខជនផ្សេង ឬប្រសើរជាងមុនជាដើម។
ចំពោះគណបក្សសាធារណរដ្ឋដែលប្រឆាំងនឹងលោក Trump មាន ៣៩ ភាគរយនិយាយថា ពួកគេគ្រាន់តែមិនចង់ឱ្យលោកធ្វើជាប្រធានាធិបតី ខណៈ ២២ ភាគរយគិតថា លោកមិនអាចយកឈ្នះគណបក្សប្រជាធិបតេយ្យ ហើយ ៣៨ ភាគរយទៀត លើកហេតុផលផ្សេងៗដោយថាលោកចាស់ និងមានទំនោរនយោបាយខុសពីគេ និងអ្នកផ្សេងល្អជាងជាដើម។