លីទុយអានីកំពុងរងទុក្ខបុកម្នេញពីចិនកាន់តែខ្លាំង ខណៈយុទ្ធសាស្ត្រពីសហភាពអឺរ៉ុបនៅស្រពេចស្រពិល
លីទុយអានីកាន់តែរងការធ្វើទុក្ខបុកម្នេញផ្នែកសេដ្ឋកិច្ចពីប្រទេសចិនកាន់តែខ្លាំង ក្រោយពេលដែលប្រទេសទ្វីបអឺរ៉ុបមួយនេះអនុញ្ញាតឱ្យដែនដីកោះតៃវ៉ាន់បើកការិយាល័យតំណាងសេដ្ឋកិច្ច និងវប្បធម៌របស់ខ្លួនក្រោមឈ្មោះថា «តៃវ៉ាន់» កាលឆ្នាំ២០២១កន្លងទៅ។
ពាក់ព័ន្ធនឹងរឿងតំណាងតៃវ៉ាន់នេះដែរ ប្រទេសអឺរ៉ុបនានា អនុញ្ញាតឱ្យបើកការិយាល័យតំណាងដែរ តែប្រើប្រាស់ឈ្មោះ «តៃប៉ិ»។
ចិនបានចាត់ទុកថា ទង្វើរបស់លីទុយអានីដូច្នេះប៉ះពាល់ដល់អធិបតេយ្យភាពរបស់ខ្លួន ជាពិសេសគឺប៉ះពាល់ដល់ «គោលនយោបាយចិនតែមួយ» ដោយចាត់ទុកថា តៃវ៉ាន់ជាខេត្តមួយប៉ុណ្ណោះរបស់ចិន។
រដ្ឋាភិបាលលីទុយអានី ដែលទើបតែឡើងកាន់អំណាចកាលពីឆ្នាំ២០២១ បានបញ្ជាក់ថា ការសម្រេចបែបនេះគឺធ្វើឡើងតាមគោលនយោបាយបែបគុណតម្លៃ ដែលគាំទ្រដល់សេរីភាព និងលទ្ធិប្រជាធិបតេយ្យលើសកលលោក។
លីទុយអានីមិនត្រឹមតែខ្វាយខ្វល់រឿងតៃវ៉ាន់តែមួយមុខនោះទេ ពោលគឺឈឺឆ្អាលតាំងពីរឿងនៅប្រទេសបេឡារូស ដែលកំពុងតែមានវិបត្តិនយោបាយក្នុងស្រុក និងរឿងនៅអ៊ុយក្រែនទៀតផង។ លុះដល់រឿងជាមួយចិនវិញ សភាលីទុយអានីថែមទាំងចេញសេចក្ដីសម្រេចមួយ ដែលចាត់ទុកទង្វើដែលចិនធ្វើចំពោះជនជាតិអ៊ុយហ្គ័រ ជា «អំពើប្រល័យពូជសាសន៍»។
ជាការឆ្លើយតបវិញ ចិនបានទម្លាក់កម្រិតទំនាក់ទំនងការទូតពីថ្នាក់ «ឯកអគ្គរដ្ឋទូត» មកត្រឹមថ្នាក់ «ភារធារី»។ បន្តបន្ទាប់មកទៀត ចិនសឹងតែមិនធ្វើពាណិជ្ជកម្មជាមួយលីទុយអានីទាំងស្រុងទៅហើយ ដោយសូម្បីតែផលិតផលនៅប្រទេសលីទុយអានី ដែលនាំចូលតាមក្រុមហ៊ុនប្រទេសនានាដូចជា ប្រទេសអាល្លឺម៉ង់ជាដើម ក៏ចិនមិនឱ្យនាំចូលដែរ។
ការធ្វើទុក្ខបុកម្នេញផ្នែកសេដ្ឋកិច្ចជាប្រព័ន្ធ និងទ្រង់ទ្រាយធំមួយនេះធ្វើឱ្យភាគីមួយចំនួនយល់ថា ចិនអាចនឹងដាក់ទណ្ឌកម្មផ្នែកសេដ្ឋកិច្ចដូច្នេះទៅនឹងប្រទេសណា ដែលមិនយល់ស្របនឹងគោលនយោបាយរបស់ចិន។
អ្នកស្រី Aušrinė Armonaitė រដ្ឋមន្ត្រីសេដ្ឋកិច្ចលីទុយអានីបានលើកឡើងថា៖ «ថ្ងៃនេះលីទុយអានី។ ថ្ងៃស្អែកប្រហែលជាប្រទេសផ្សេងម្ដង»។
នេះជាលើកទីមួយហើយ ដែលរដ្ឋាភិបាលចិនបញ្ចេញការគំរាមកំហែងផ្នែកសេដ្ឋកិច្ចដូច្នេះមកកាន់ប្រទេសដែលជាសមាជិកសហភាពអឺរ៉ុប។
កន្លងមកអឺរ៉ុបបានបង្ហាញពីការគាំទ្រផ្នែកនយោបាយទៅកាន់ប្រទេសលីទុយអានី ហើយថែមទាំងដាក់ពាក្យបណ្ដឹងទៅកាន់អង្គការពាណិជ្ជកម្មពិភពលោក (WTO) ទៀតផង។ កាលពីខែមករាកន្លងទៅ សហភាពអឺរ៉ុបបានប្ដឹងចិននៅ WTO ពីបទ «ការធ្វើពាណិជ្ជកម្មដោយមានការរើសអើង» ប្រឆាំងនឹងប្រទេសលីទុយអានី។
យ៉ាងណាមិញ មិនមែនសមាជិក សហភាពអ៊ឺរ៉ុប ទាំងអស់សប្បាយចិត្តនឹងលីទុយអានីប៉ុន្មាននោះទេ។
មន្ត្រីសហភាពអឺរ៉ុបម្នាក់ថែមទាំងជម្រេញលីទុយអានីថា៖ «ពួកគេមើលតែខ្លួនឯងដូចមេដឹកនាំលោកសេរីអញ្ចឹង»។ បន្ថែមពីនេះទៀត ស្របពេលដែលមានស្ថានការណ៍តានតឹងនៅអ៊ុយក្រែន មន្ត្រីនៃប្រទេសជាសមាជិក EU មួយបានប្រាប់សារព័ត៌មាន ជប៉ុនឌឹហ្វាយនិនស្សើថាមសន៍ថា គេមិនឃើញពីផលចំណេញពីការឈ្លោះគ្នាជាមួយចិន លើបញ្ហាដែលចិនស្កៀបរមាស់ខ្លាំងនោះទេ។
ជាមួយគ្នានេះដែរ ប្រធានក្រុមហ៊ុនអាល្លឺម៉ង់នៅតំបន់បាល់ទិក (ម្ដុំអឺរ៉ុបកណ្ដាល និងអឺរ៉ុបខាងកើត) យល់ថា សហភាពអឺរ៉ុបគួរតែមានយុទ្ធសាស្ត្រសមស្របណាមួយ ដើម្បីការពារសមាជិករបស់ខ្លួន តែចំពោះរឿងឈ្មោះតៃវ៉ាន់ដូចករណីលីទុយអានីនេះ ហាក់ដូចជាមិនសមស្របក្នុងការប្រឈមមុខនឹងចិនឡើយ។
«យើងមិនគួរប្រឈមមុខនឹងរឿងតូចតាចដូច្នេះទេ នៅពេលដែលយើងមានបញ្ហាធំជាងនេះ ១០០ដងឯណោះ»។ នេះជាការលើកឡើងរបស់លោកប្រាប់សារព័ត៌មានជប៉ុនឌឹហ្វាយនិនស្សើថាមសន៍។
សារព័ត៌មានខាងលើបានចុះផ្សាយថា ក្រុមហ៊ុនលីទុយអានីមួយចំនួនកំពុងត្រៀមខ្លួនរើចេញពីប្រទេសកំណើតរបស់ខ្លួនចេញទៅប្រទេសផ្សេងហើយ ដោយមិនរង់ចាំដំណោះស្រាយនៅ WTO នោះទេ។
ស្របពេលដែលចិនជាប្រទេសសេដ្ឋកិច្ចធំជាងគេទី២ នៅក្នុងពិភពលោក គេរំពឹងថាក្រុមហ៊ុនវិនិយោគនានាអាចនឹងបញ្ចៀសការវិនិយោគនៅប្រទេសលីទុយអានី ដើម្បីកុំឱ្យមានជម្លោះរកស៊ីជាមួយទីផ្សារក្នុងស្រុកចិន៕