វៀតណាមនឹងដកបម្រាមកូវីដ-១៩ សម្រាប់អ្នកដំណើរពីក្រៅប្រទេស
វៀតណាមនឹងលុបចេញនូវបម្រាមកូវីដ-១៩ សម្រាប់ជើងហោះហើរអន្តរជាតិ ដោយមិនកំណត់ជើងហោះហើរចូលទៅក្នុងប្រទេសនេះ ចាប់ពីថ្ងៃទី១៥ ខែកុម្ភៈនេះតទៅ។ នេះបើតាមការចុះផ្សាយរបស់កាសែតរដ្ឋវៀតណាមតួយត្រេ (Tuoi Tre) ចុះផ្សាយកាលពីថ្ងៃសៅរ៍កន្លងទៅ។
ប្រទេសអាស៊ីអាគ្នេយ៍ដីគោកមួយនេះបានដាក់នូវវិធានការដ៏តឹងតែងមួយ ដើម្បីទប់ស្កាត់ការរាតត្បាតនៃជំងឺកូវីដ-១៩។ វៀតណាមរកឃើញមានអ្នកឆ្លងជំងឺកូវីដ-១៩ សរុប ២,៥លានករណី ហើយមានអ្នកស្លាប់សរុបក្បែរ ៤ម៉ឺននាក់។
នៅពេលនេះដែរ ប្រមាណ ៩៨% នៃប្រជាជន ៩៨លាននាក់នៅវៀតណាមទទួលបានការចាក់វ៉ាក់សាំងយ៉ាងតិច ២ដូស។
កាសែតតួយចេបានស្រង់យកសម្ដីលោក ឌិញ វៀត សឺន (Dinh Viet Son) នាយករងនៃរដ្ឋបាលអាកាសចរណ៍ស៊ីវិលវៀតណាមថា ចាប់ពីថ្ងៃទី១៥ ទៅវៀតណាមនឹងដកបម្រាមកូវីដ-១៩ លើអ្នកដំណើរពីក្រៅប្រទេសទាំងអស់ ហើយរំពឹងថា ជើងហោះហើរមកវៀតណាមនឹងមកនូវកម្រិតមុនពេលមានជំងឺរាតត្បាតសកល។
លោក សឺន ក៏បានលើកឡើងថា ខាងវៀតណាមបានជម្រាបប្រទេសជាដៃគូរួចរាល់អស់ហើយអំពីគោលនយោបាយថ្មីនេះ។ លោកបានបន្ថែមថា ចំណោមដៃគូទាំងអស់ មានតែខាងចិនទេ ដែលមិនទាន់ព្រមព្រៀងលើការស្ដារជើងហោះហើរពាណិជ្ជកម្មជាមួយវៀតណាម។
វៀតណាមចាប់ផ្ដើមបន្ធូរបន្ថយការធ្វើដំណើរចូលមកស្រុករបស់ខ្លួននៅក្នុងឆ្នាំ២០២២នេះ ដោយអ្នកដំណើរបរទេសណា ដែលចាក់វ៉ាក់សាំងរួចតម្រូវឱ្យធ្វើចត្តាឡីស័កចំនួន ៣ថ្ងៃតែប៉ុណ្ណោះ៕