អាមេរិក ជប៉ុន និងកូរ៉េខាងត្បូងជួបពិភាក្សាត្រីភាគីដើម្បីដោះស្រាយ «បញ្ហាប្រឈមសំខាន់ៗក្នុងសតវត្សទី២១»
រដ្ឋមន្ត្រីការបរទេសសហរដ្ឋអាមេរិកលោក អាន់តូនី ប្លីងឃិន បានជួបជាមួយនឹងសមភាគីរបស់លោកគឺ លោក ហាយ៉ាស៊ី យ៉ូស៊ីម៉ាសា (Hayashi Yoshimasa) រដ្ឋមន្ត្រីការបរទេសជប៉ុន និងលោក ឈុង អឹយុង (Chung Eui-yong) រដ្ឋមន្ត្រីការបរទេសកូរ៉េខាងត្បូង កាលពីថ្ងៃសុក្រកន្លងទៅ នៅឯកោះហាវ៉ៃ សហរដ្ឋអាមេរិក។
ជំនួបរវាងរដ្ឋមន្ត្រីទាំង ៣រូបនេះបានចេញនូវសេចក្ដីថ្លែងការណ៍រួមមួយ ដោយក្នុងឯកសារនោះដែរបានឱ្យដឹងថា ប្រមុខការទូតនៃប្រទេសសម្ព័ន្ធមិត្តត្រីភាគីនេះពិភាក្សាស្វះស្វែងរកដំណោះស្រាយសម្រាប់ «បញ្ហាប្រឈមសំខាន់ៗនៅក្នុងសតវត្សទី២១» នេះ។
ក្នុងជំនួបនោះដែរ ប្រទេសទាំង ៣បានលើកយកពីបញ្ហានៃការបាញ់មីស៊ីលរបស់កូរ៉េខាងជើង បញ្ហានៅអ៊ុយក្រែន វិបត្តិនៅមីយ៉ាន់ម៉ា ព្រមទាំងបញ្ហាផ្សេងៗទៀតដូចជា ការរាតត្បាតនៃជំងឺកូវីដ-១៩ វិបត្តិអាកាសធាតុ បញ្ហាសេដ្ឋកិច្ចនានា ក៏ដូចជាបញ្ហាសិទ្ធិមនុស្ស និងប្រជាធិបតេយ្យ ជាដើម។
ទន្ទឹមនឹងនេះដែរ សម្ព័ន្ធមិត្តនេះបានបង្ហាញពីគោលជំហរណាប្រឆាំងនឹងសកម្មភាពឯកតោភាគីណាមួយ ដែលប៉ុនប៉ងផ្លាស់ប្ដូរបច្ចុប្បន្នភាព និងបង្កើនភាពតានតឹងនៅក្នុងតំបន់។ អស់លោកទាំង ៣ សង្កត់ធ្ងន់ពីសារៈសំខាន់នៃច្បាប់អន្តរជាតិ ក៏ដូចជាសន្តិភាពនៅតំបន់ច្រកសមុទ្រតៃវ៉ាន់។
ជាមួយគ្នានេះដែរ រដ្ឋមន្ត្រីទាំង ៣ ប្ដេជ្ញានឹងបន្តសហប្រតិបត្តិការលើគុណតម្លៃរួម និងការពារសន្តិភាព ស្ថិរភាព និងវិបុលភាពរបស់តំបន់ ហើយសន្យាថានឹងបន្តជួបគ្នាឱ្យបានទៀងទាត់ ដើម្បីពិគ្រោះយោបល់លើបញ្ហាប្រឈមសំខាន់ៗនៅក្នុងតំបន់ និងពិភពលោក៕