ច្រកព្រំដែនកាណាដា-អាមេរិកបើកឡើងវិញ បន្ទាប់ពីប៉ូលិសដកអ្នកតវ៉ាចេញ
ផ្លូវពាណិជ្ជកម្មដ៏សំខាន់ដែលជាព្រំដែនកាណាដា-សហរដ្ឋអាមេរិក ត្រូវបានបើកឡើងវិញក្រោយប៉ូលីសចេញចំណាត់ការ បន្ទាប់ពីបិទអស់រយៈពេលមួយសប្ដាហ៍ដោយអ្នកបើកបរឡានដឹកទំនិញ និងអ្នកផ្សេងទៀត ដែលធ្វើបាតុកម្មតវ៉ាប្រឆាំងនឹងវិធានការកូវីដ។
ស្ពាន Ambassador ដែលជាច្រកឆ្លងកាត់ព្រំដែនដ៏មមាញឹកបំផុតនៅអាមេរិកខាងជើង តភ្ជាប់ទីក្រុង Windsor ខេត្ត Ontario របស់កាណាដា និងទីក្រុងដេត្រយនៃរដ្ឋមីឈីហ្គែន ត្រូវបានបិទដោយក្រុមអ្នកតវ៉ាប្រឆាំងនឹងកាតព្វកិច្ចវ៉ាក់សាំង។ ក្រុមហ៊ុន Detroit International Bridge Co ដែលជាម្ចាស់ស្ពាននិយាយកាលពីថ្ងៃអាទិត្យថា ខ្លួនបើកស្ពាន ដោយអនុញ្ញាតឱ្យមានលំហូរពាណិជ្ជកម្មដោយសេរីឡើងវិញ។
អភិបាលក្រុង Windsor លោក Drew Dilkens និយាយកាលពីថ្ងៃអាទិត្យមុនពេលបើកស្ពានថា៖ «ថ្ងៃនេះ វិបត្តិសេដ្ឋកិច្ចជាតិរបស់យើងនៅស្ពាន Ambassador បានដល់ទីបញ្ចប់។ ការឆ្លងកាត់ព្រំដែននឹងបើកឡើងវិញនៅពេលដែលវាមានសុវត្ថិភាព ហើយខ្ញុំសូមពន្យាពេលដល់ប៉ូលីស និងភ្នាក់ងារព្រំដែនដើម្បីធ្វើការសម្រេចចិត្តនោះ»។
បើតាមលោក Dilkens ដដែល ស្ពាន Ambassador ជាច្រកពាណិជ្ជកម្មដែលធ្វើការដឹកជញ្ជូនទំនិញច្រើនជាង ១/៤ រវាងកាណាដា និងសហរដ្ឋអាមេរិក ដែលស្មើនឹងជាង ៣៦០ លានដុល្លារនៃពាណិជ្ជកម្មប្រចាំថ្ងៃរវាងប្រទេសទាំងពីរ។
ទិន្នន័យរបស់ IHS Markit ដែលប៉ាន់ប្រមាណលើការខាតបង់ដែលគិតតាមលំហូរប្រចាំថ្ងៃឆ្នាំ ២០២១ នៅក្នុងយានជំនិះ និងគ្រឿងបន្លាស់មានចំនួន ១៤១,១ លានដុល្លារក្នុងមួយថ្ងៃបង្ហាញថា ការខាតបង់ពីការរាំងស្ទះដល់ឧស្សាហកម្មរថយន្តតែមួយខ្ពស់រហូតដល់ ៨៥០ លានដុល្លារ។
បាតុកម្មនៅកាណាដាចាប់ផ្តើមកាលពីចុងខែមុន ដោយដើមឡើយចេញពីអ្នកបើកឡានដឹកទំនិញ ដែលដង្ហែរក្បួនពីភាគខាងលិចទៅកាន់រដ្ឋធានីអូតាវ៉ា ដើម្បីតវ៉ានឹងច្បាប់ថ្មីដែលបង្ខំឱ្យអ្នកដឹកទំនិញឆ្លងកាត់ព្រំដែនអាមេរិក-កាណាដា ចាក់វ៉ាក់សាំងការពារកូវីដ ឬប្រឈមមុខនឹងចត្តាឡីស័ក១៤ថ្ងៃនៅពេលត្រឡប់ចូលកាណាដា។
ការតវ៉ានេះ ធ្វើឱ្យបាតុកម្មផ្ទុះឡើងទូទាំងប្រទេសប្រឆាំងនឹងវិធានការកូវីដផ្សេងទៀត រួមទាំងការរឹតបន្តឹងលើការជួបជុំ និងកាតព្វកិច្ចពាក់ម៉ាស់ជាពិសេសនៅក្នុងសាលារៀន ហើយលោកនាយករដ្ឋមន្ត្រី Justin Trudeau បានក្លាយទៅជាគោលដៅចម្បងនៃកំហឹងរបស់បាតុករ។ ក្រៅពីបិទស្ពាន Ambassador ក្រុមអ្នកតវ៉ាបានឡោមព័ទ្ធរដ្ឋធានីអូតាវ៉ា និងបានបិទចរាចរណ៍នៅច្រកព្រំដែន Coutts ក្នុងខេត្ត Alberta ។
លោក Dilkens អភិបាលក្រុង Windsor និយាយថា៖ «បាតុកម្មមិនមែនគ្រាន់តែប្រឆាំងនឹងកាតព្វកិច្ចវ៉ាក់សាំង និងតម្រូវឱ្យពាក់ម៉ាស់ប៉ុណ្ណោះទេ ប៉ុន្តែក៏ពាក់ព័ន្ធនឹងការតវ៉ាប្រឆាំងរដ្ឋាភិបាលកាន់តែច្រើន ហើយគ្មានអ្នកដឹកនាំនោះទេ»។
ការិយាល័យរបស់លោកនាយករដ្ឋមន្រ្តីនិយាយកាលពីថ្ងៃអាទិត្យថា ប៉ូលីស Royal Canadian Mounted Police បានបង្កើតមជ្ឈមណ្ឌលបញ្ជាការសម្របសម្រួលមួយ ជាមួយនឹងការអនុវត្តច្បាប់ខេត្ត និងក្រុង ដើម្បីដោះស្រាយជាមួយនឹងបាតុកម្ម ហើយព្រមានថា «ផលវិបាកនៃការបំពានច្បាប់នឹងកាន់តែធ្ងន់ធ្ងរទៅៗ»។
កាលពីថ្ងៃសុក្រសប្ដាហ៍មុន ចៅក្រមកាណាដាបានបញ្ជាឱ្យបញ្ចប់ការបិទផ្លូវ ខណៈដែលលោក Doug Ford អភិបាលខេត្ត Ontario ប្រកាសដាក់ខេត្តក្នុងភាពអាសន្ន ដោយគំរាមកំហែងអ្នកដែលបិទផ្លូវ និងស្ពានជាមួយនឹងការផាកពិន័យចំនួន ៧៩ ០០០ ដុល្លារអាមេរិក និងអាចជាប់គុករហូតដល់មួយឆ្នាំ ដោយទុកពេលឱ្យបាតុករត្រឹមល្ងាចថ្ងៃសុក្រ។
មន្ត្រីប៉ូលីសក្រុង Windsor ប្រាប់អ្នកយកព័ត៌មានថា មនុស្សពី ២០ ទៅ ៣០ ត្រូវបានចាប់ខ្លួន ហើយប៉ូលិសក៏បានរឹបអូសរថយន្តនៅក្នុងតំបន់បាតុកម្មផងដែរ។ ប៉ូលិសបង្កើនវត្តមានកាលពីថ្ងៃអាទិត្យ ខណៈដែលចំនួនអ្នកតវ៉ានៅលើស្ពានធ្លាក់ចុះមកនៅត្រឹមប្រហែល ៤៥ នាក់ ពីប្រហែល ១០០ នាក់កាលពីថ្ងៃសៅរ៍។
ការបិទស្ពានហៅថា Ambassador ជំរុញឱ្យមានការព្រួយបារម្ភពីសេតវិមានអំពីការរំខានដល់ខ្សែចង្វាក់ផ្គត់ផ្គង់ផ្សេងទៀតរវាងអាមេរិក និងកាណាដា។ កាលពីសប្តាហ៍មុន ប្រធានាធិបតីសហរដ្ឋអាមេរិក លោក Joe Biden ស្នើឱ្យប្រទេសកាណាដា ប្រើប្រាស់អំណាចសហព័ន្ធដើម្បីបញ្ចប់ការបិទផ្លូវ ប៉ុន្តែលោក Trudeau និយាយថា លោកមិនពិចារណាលើការដាក់ពង្រាយកងទ័ពនោះទេ។
រដ្ឋមន្ត្រីត្រៀមរៀបចំគ្រាអាសន្នលោក Bill Blair បានប្រាប់សារព័ត៌មាន CBC កាលពីថ្ងៃអាទិត្យថា រដ្ឋាភិបាលកាណាដាបានពិភាក្សាថាតើត្រូវអំពាវនាវឱ្យមានអំណាចក្នុងគ្រាអាសន្នពិសេសដើម្បីដោះស្រាយការតវ៉ានៅក្នុងរដ្ឋធានីនេះឬអត់។ លោក Blair និយាយថា កង្វះការអនុវត្តប៉ូលិសនៅរដ្ឋធានីអូតាវ៉ា ដែលពេលនេះបាតុកម្មនៅតែបន្ត គឺជាការមិនអាចបកស្រាយបាន។
