ភ្នំពេញ៖ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានមានប្រសាសន៍ប្រាប់ AMS ថា ការចាក់វ៉ាក់សាំងដូសជំរុញ ឬដូសទី៣ និងដូសទី៤ ដល់កងទ័ព គឺបានដំណើរការទៅដោយរលូន មិនមានបញ្ហាអ្វីកើតឡើងនោះទេ ដោយចាក់ជូនដល់កងទ័ជារៀងរាល់ថ្ងៃ នឹងពង្រីកទៅតាមតំបន់ដែលនៅឆ្ងាយៗ តាមលទ្ធភាពដែលយើងមានឧបករណ៍ទុកដាក់យ៉ាងពេញលេញ។

ប្រមុខការពារជាតិ សម្តេចពិជ័យសេនា ទៀ បាញ់ បានបញ្ជាក់ថា “ការចាក់វ៉ាក់សាំងជូនដល់កងទ័ពអត់មានបញ្ហាអីទេ ជាម្ចាស់ការពេញលេញហើយ ទាំងដូសជំរុញទី៣ និងទី៤ និងកំពុងចាក់ជូនកងទ័ពជារៀងរាល់ថ្ងៃ”។

យោងតាមរបាយការណ៍អ្នកដែលបានចាក់វ៉ាក់សាំងបង្ការជំងឺកូវីដ-១៩ ទូទាំងប្រទេស (រួមទាំងក្រសួងការពារជាតិ) ពីថ្ងៃទី១០ ខែកុម្ភៈ ឆ្នាំ២០២១ ដល់ត្រឹមថ្ងៃទី១៣ ខែកុម្ភៈ ឆ្នាំ២០២២ បានបង្ហាញឱ្យឃើញថា កំណើនអាត្រាចាក់វ៉ាក់សាំងកូវីដ-១៩ នៅកម្ពុជា គិតត្រឹមថ្ងៃទី១៣ ខែកុម្ភៈ ឆ្នាំ២០២២ រួមមាន៖
-លើប្រជាជនអាយុពី១៨ឆ្នាំឡើង មាន១០២,១៥% ធៀបជាមួយចំនួនប្រជាជនគោលដៅ១០លាននាក់
-លើកុមារ-យុវវ័យអាយុពី១២ឆ្នាំ ទៅក្រោម ១៨ឆ្នាំ មាន៩៩,៦៥% ធៀបជាមួយចំនួនប្រជាជនគោលដៅ១,៨២៧,៣៤៨នាក់
-លើកុមារអាយុពី០៦ឆ្នាំ ដល់ក្រោម១២ឆ្នាំ មាន ១០៦,១៣% ធៀបជាមួយនឹងប្រជាជនគោលដៅ១,៨៩៧, ៣៨២នាក់
-លើកុមារអាយុ០៥ឆ្នាំ មាន១០៧,៥៩% ធៀបជាមួយនឹងប្រជាជនគោលដៅ ៣០៤,៣១៧នាក់
-លទ្ធផលចាក់វ៉ាក់សាំងធៀបនឹងចំនួនប្រជាជនសរុប១៦លាននាក់ មាន៨៩,៨៦%៕
ដោយៈពលជ័យ