កណ្តាល៖ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រី ក្រសួងសាធារណការ និងដឹកជញ្ជូន ថ្លែងក្នុងពិធីបញ្ចុះបឋម សិលាសាងសង់ ឃ្លាំងស្តុកទុកទំនិញត្រជាក់ នៅចំណតផែ កុងតឺន័រ LM17 ស្ថិតនៅភូមិកណ្ដាលលើ ឃុំបន្ទាយដែក ស្រុកកៀនស្វាយ ខេត្តកណ្ដាលថា ស្ថានីយនេះ នឹងគាំទ្រដល់ វិស័យនាំចេញ និងនាំចូល ដែលកំពុងកើនឡើងរបស់ប្រទេស កម្ពុជា តាមរយៈសេវាស្ថានីយផ្ទេរទំនិញ និងឃ្លាំងស្តុក ទំនិញ ត្រជាក់ស្តង់ដារអន្តរជាតិ ដែលមានទីតាំងស្ថិតនៅជិតកំពង់ ផែភ្នំពេញ និងផ្តល់នូវសេវាតម្លៃបន្ថែម ក្នុងគោលដៅជួយដល់ សហគ្រាសខ្នាតតូច និងមធ្យម ដើម្បីចូលទៅក្នុងទីផ្សារ ពាណិជ្ជកម្ម។

លោករដ្ឋមន្ត្រី បានបន្ថែមថា ឃ្លាំងស្តុកទឹកទំនិញត្រជាក់នេះ នឹងផ្ដល់ទីតាំងទំហំជាង៣៦.០០០ពម៉ែត្រគូបបន្ថែមទៀត ដែលបំពេញកង្វះខាតបច្ចុប្បន្ន បានចំនួនជាង២៥ភាគរយ ដើម្បីឲ្យស្របតាមកំណើននៃតម្រូវការទីផ្សារ ដែលបម្រើដល់ កសិករកម្ពុជា និងកសិករក្នុងតំបន់ ក្រុមហ៊ុនកសិពាណិជ្ជកម្ម ក្រុមហ៊ុនកែច្នៃអាហារ ក្រុមហ៊ុនឱសថ ក្រុមហ៊ុនលក់រាយ ក៏ដូចជាក្រុមហ៊ុនសណ្ឋាគារ និងភោជនីយដ្ឋានផងដែរ។

ក្នុងឱកាសនេះ ឯកឧត្តម ហ៊ឺ បាវី ប្រតិភូរាជរដ្ឋាភិបាល ទទួល បន្ទុកជាប្រធានអគ្គនាយកកំពង់ផែស្វយ័តភ្នំពេញ បាន បញ្ជាក់ ថា កំពង់ផែស្វយ័តភ្នំពេញ បានសម្រេចសហការ ជាមួយក្រុមហ៊ុន ខ្មែរ ខូល ឆេន ឯ.ក ក្នុងការសាងសង់ឃ្លាំង ស្តុកទំនិញត្រជាក់នេះឡើងដោយយល់ឃើញថាគម្រោងរបស់ក្រុមហ៊ុននឹងផ្ដល់អត្ថប្រយោជន៍ដល់កំពង់ផែស្វយ័តភ្នំពេញ ជាពិសេស ដល់កំណើនសេដ្ឋកិច្ចកម្ពុជា តាមរយៈការ ចូលរួមចំណែកលើកកម្ពស់ខ្សែសង្វាក់ នៃវិស័យភស្តុភារកម្ម ក្នុងប្រទេសកម្ពុជា។

លើសពីនេះ កំណើននៃចរាចរណ៍ទំនិញ ឆ្លងកាត់ ក៏មានសន្ទុះផងដែរ តាមរយៈការផ្ដល់សេវាកម្មរក្សា ទុកទំនិញត្រជាក់ ទាំងសម្ភារៈនាំចេញ និងនាំចូល ដូចជា ត្រី សាច់ កសិផល ឱសថ គ្រឿងសម្អាង និងទំនិញជាច្រើន ប្រភេទ ទៀត។ លោកបន្តថា គម្រោងខាងលើ ក៏នឹងជួយបង្កើតការងារ ធ្វើ បន្ថែម និងលើកស្ទួយកម្រិតជីវភាពរស់នៅ របស់ប្រជាពលរដ្ឋ នៅក្នុងតំបន់នេះផងដែរ។

ឯកឧត្តម ហ៊ឺ បាវី សង្ឃឹមជឿជាក់ថា គម្រោងវិនិយោគនេះ នឹងផ្ដល់អត្ថប្រយោជន៍ជាច្រើនទៀត ដល់វិនិយោគិន ពាណិជ្ជករ អាជីវករ ធុរជន និងសាធារណជនទូទៅ ដែល មានបំណងមកប្រើប្រាស់សេវាកម្ម របស់ក្រុមហ៊ុន ដើម្បី សម្រួលដល់ដំណើរការនាំចេញនាំចូលទំនិញ រវាងកម្ពុជា និងសកលលោក។

យោងតាមការសិក្សា អំពីតម្រូវការរបស់ទីផ្សារ, គម្រោងចាំ បាច់ ត្រូវការពង្រីកទីតាំងផ្ទេរ និងស្តុកទំហំ១៤ម៉ឺនម៉ែត្រ គូបបន្ថែមទៀត ដើម្បីបំពេញតាមតម្រូវការ ខ្សែច្រវាក់ ផ្គត់ផ្គង់របស់ខ្លួន នៅត្រឹមឆ្នាំ២០៣០៕
ដោយ៖ វណ្ណលុក