ភ្នំពេញ ៖ រថយន្តដឹកខ្សាច់មួយគ្រឿង បានបើកឡើងសួនច្បារពុះចែកទ្រូងផ្លូវ បុកស្លាកប៉ាណូបាក់អស់មួយផ្ទាំងរលើងចេញពីដី បណ្តាលឱ្យរថយន្តរងការខាតយ៉ាងដំណំ តែសំណាងល្អ មិនបណ្ដាលឱ្យមានមនុស្សរងរបួសនោះទេ។ ហេតុការណ៍នេះ បានកើតឡើងកាលពីវេលាម៉ោង៣ និង១០នាទីរសៀល ថ្ងៃទី២៤ ខែមីនា ឆ្នាំ ២០២២ នៅលើកំណាត់ផ្លូវជាតិ៦ ចន្លោះស្ពានទី១និងទី២ ភូមិខ្ទរ សង្កាត់ព្រែកលៀប ខណ្ឌជ្រោយចង្វារ។

តាមប្រភពព័ត៌មាននៅកន្លែងកើតហេតុ បានប្រាប់បណ្ដាញព័ត៌មានអប្សរា (AMS) ឱ្យដឹងថា នៅមុនពេលកើតហេតុ គេបានឃើញរថយន្តមួយគ្រឿង ម៉ាកនីសសាន់ យូឌី ក្បាលពណ៌ស ពាក់ស្លាកលេខ កំពង់ចាម 3A-0703 បើកបរដោយបុរសម្នាក់ មិនស្គាល់អត្តសញ្ញាណ បានធ្វើដំណើរតាមបណ្តោយផ្លូវជាតិលេខ៦ ទិសដៅពីជើងទៅត្បូង ក្នុងល្បឿនលឿន ខណៈបើកបរឆ្លងស្ពានទី២ បានបន្តិច ក៏ស្រាប់តែរថយន្ត បានរ៉េចង្កូតមកខាងឆ្វេងដៃ បុកខឿនចែកទ្រូងផ្លូវ ហើយរថយន្តមិនទាន់អស់ល្បឿន បន្តបុកស្លាកប៉ាណូផ្សព្វផ្សាយពាណិជ្ជកម្មមួយផ្ទាំង រលើសចេញទាំងគល់ចេញពីដី ហើយរថយន្តបានបាក់ដាច់កង់មុខទាំង២ និងបណ្តាលឱ្យរងការខូចខាតកាប៊ីនមុខផ្នែកខាងឆ្វេងទាំងយ៉ាងដំណំ តែសំណាងល្អ មិនបណ្ដាលឱ្យមានមនុស្សរងរបួសនោះទេ។ បន្ទាប់មកភ្លាមៗនោះ អ្នកបើកបររថយន្តបង្ក ត្រូវសមត្ថកិច្ចឃាត់ផងដែរ។ ចំពោះករណីនេះ មិនបង្កគ្រោះថ្នាក់ដល់អ្នកដទៃនោះទេ។

ក្រោយពេលកើតហេតុ សមត្ថកិច្ចមូលដ្ឋាន បានចុះមកដល់ទីតាំងកន្លែងកើតហេតុ រួចក៏បានធ្វើការទំនាក់ទំនងទៅខាងសមត្ថកិច្ចជំនាញចរាចរណ៍ផ្លូវគោក ចុះទៅធ្វើការវាស់វែងយករថយន្តបង្ក យកទៅរក្សាទុកនៅការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំធ្វើការដោះស្រាយគ្នានៅពេលក្រោយ៕ ដោយ :ឆៃហួត