បណ្តាប្រទេសសហភាពអឺរ៉ុប (EU) បានយល់ព្រមរួមគ្នាទិញ និងរក្សាទុកឧស្ម័ន អ៊ីដ្រូសែន និងឧស្ម័នធម្មជាតិរាវ ដើម្បីដោះស្រាយបញ្ហាប្រឈមនៃការកាត់បន្ថយការពឹងផ្អែកថាមពលលើប្រទេសរុស្ស៊ី ហើយក៏ជាវិធានការជួយប្រជាជនអឺរ៉ុប ពីការចំណាយ លើថ្លៃថាមពលកើនឡើង។

មេដឹកនាំអឺរ៉ុបបានប្រកាសពីការសម្រេចចិត្ត កាលពីថ្ងៃសុក្រ ទី២៥ មីនា បន្ទាប់ពីកិច្ចប្រជុំកំពូលជាប្រវត្តិសាស្ត្រមួយ កាលពីថ្ងៃព្រហស្បតិ៍ ខណៈដែលពួកគេបានជួបជាមួយណាតូ (អង្គការសន្ធិសញ្ញាអាត្លង់ទិកខាងជើង) និងក្រុមប្រទេសឧស្សាហកម្មចំនួន ៧ ក៏មានការចូលរួមពីប្រធានាធិបតីអាមេរិក Joe Biden ជាមួយនឹងចេតនាប្រមូលផ្តុំសម្ព័ន្ធមិត្ត ប្រឆាំងនឹងរុស្ស៊ី។

សមាជិកសហភាពអឺរ៉ុបដែលមានឆន្ទៈអាចធ្វើការរួមគ្នា និងចរចាទិញឧស្ម័នរួមគ្នា ដោយបង្កើនអំណាចចរចារបស់ពួកគេ ជាមួយនឹងក្តីសង្ឃឹមនៃឥទ្ធិពលលើតម្លៃថាមពល។ អ៊ុយក្រែន ហ្សកហ្ស៊ី និងម៉ុលដូវ៉ា ក៏ដូចជាបណ្តាប្រទេសនៅតំបន់បាល់កង់ភាគខាងលិច អាចនឹងចូលរួមក្នុងការទិញឧស្ម័នរួមនេះដែរ៕ ប្រភពពីបាងកកប៉ុស្តិ៍ (សារ៉ាត)