ប្រេសិតសហភាពអឺរ៉ុបធ្វើទស្សនកិច្ចនៅតេអេរ៉ង់ ចំពេលមានក្តីសង្ឃឹមពីការស្ដារកិច្ចព្រមព្រៀងនុយក្លេអ៊ែរអ៊ីរ៉ង់ឡើងវិញ 
ប្រព័ន្ធផ្សព្វផ្សាយរដ្ឋអ៊ីរ៉ង់រាយការណ៍ថា ប្រេសិតសហភាពអឺរ៉ុបជាន់ខ្ពស់លោក Enrique Mora បានជួបពិភាក្សាគ្នានៅទីក្រុងតេហេរ៉ង់ជាមួយក្រុមមន្ត្រីរដ្ឋាភិបាលអ៊ីរ៉ង់កាលពីថ្ងៃអាទិត្យ ចំពេលមានក្ដីសង្ឃឹមពីការស្ដារឡើងវិញនៃកិច្ចព្រមព្រៀងនុយក្លេអ៊ែរ ដែលហែកហួរទំនាក់ទំនងអ៊ីរ៉ង់ និងមហាអំណាចពិភពលោក។
ការរាយការណ៍ស្ដីពីកិច្ចចរចានេះ មិនបានផ្ដល់ព័ត៌មានច្រើននោះទេ ដោយគ្រាន់តែនិយាយថា អ្នកការទូតបានពិភាក្សាអំពីកិច្ចព្រមព្រៀងដ៏ចម្រូងចម្រាស ដោយអ្នកចរចានុយក្លេអ៊ែរកំពូលរបស់អ៊ីរ៉ង់លោក Ali Bagheri Kani និយាយម្ដងទៀតថា អ៊ីរ៉ង់ជឿថា កិច្ចព្រមព្រៀងមួយអាចសម្រេចបាន ប្រសិនបើអាមេរិក«ប្រាកដប្រជា»ធ្វើតាមការទាមទាររបស់ខ្លួន។ ហើយពីបន្ទាប់ជំនួប រដ្ឋមន្ត្រីការបរទេសអ៊ីរ៉ង់លោក Hossein Amirabdollahian ក៏បានស្ដីបន្ទោសសហរដ្ឋអាមេរិកផងដែរ ចំពោះការពន្យារពេលក្នុងការឈានដល់កិច្ចព្រមព្រៀងមួយ។
កិច្ចព្រមព្រៀងនុយក្លេអ៊ែរអ៊ីរ៉ង់ត្រូវជាប់គាំង ក្រោយអតីតប្រធានាធិបតីសហរដ្ឋអាមេរិកលោក ដូណាល់ ត្រាំ ដកសមាជិកភាពរបស់អាមេរិកចេញក្នុងឆ្នាំ ២០១៨ ហើយដាក់ទណ្ឌកម្មលើអ៊ីរ៉ង់ឡើងវិញ ដែលជាហេតុមួយឱ្យប្រទេសនេះរំលោភលើកិច្ចព្រមព្រៀងជាបណ្ដើរៗដោយពង្រីកការងារនុយក្លេអ៊ែរដ៏ធំរបស់ខ្លួន។
ការចរចានុយក្លេអ៊ែរត្រូវបានផ្អាកកាលពីដើមខែ ក្នុងកិច្ចប្រជុំចុងក្រោយទីក្រុងវីយែន ដែលរួមផ្សំនឹងការលុកលុយរបស់រុស្ស៊ីលើអ៊ុយក្រែន និងទណ្ឌកម្មហិរញ្ញវត្ថុដែលលោកខាងលិចដាក់លើទីក្រុងម៉ូស្គូ។ ប៉ុន្តែហាក់មានសញ្ញាវិជ្ជមានឡើយវិញ ពេលរុស្ស៊ីហាក់បន្ថយសំឡេងទាមទារចម្រូងចម្រាសរបស់ខ្លួន ដែលថាពាណិជ្ជកម្មរុស្ស៊ី-អ៊ីរ៉ង់ ត្រូវតែលើកលែងពីទណ្ឌកម្មរបស់លោកខាងលិច។
នេះជាលើកដំបូងហើយ ដែលអ្នកការទូតកំពូលរបស់អ៊ីរ៉ង់កាលពីថ្ងៃសៅរ៍ បង្ហាញជាសាធារណៈនូវភាពបត់បែនជុំវិញការទាមទាររបស់ទីក្រុងតេហេរ៉ង់ដែលសុំឱ្យ ទីក្រុងវ៉ាស៊ីនតោនដកឆ្មាំបដិវត្តន៍អ៊ិស្លាមអ៊ីរ៉ង់(IRGC) ដែលជាកងកម្លាំងប្រដាប់អាវុធដ៏មានឥទ្ធិពលរបស់ប្រទេស ចេញពីបញ្ជីនៃអង្គការភេរវករបរទេស។
ការរំពឹងទុកនៃការលុបចោលនូវការកំណត់នេះ ធ្វើឱ្យសម្ព័ន្ធមិត្តមជ្ឈិមបូព៌ារបស់អាមេរិកមានការព្រួយបារម្ភ ជាពិសេសអ៊ីស្រាអែល ដែលប្រកែកថា ការបន្ធូរបន្ថយទណ្ឌកម្មលើ(IRGC) នឹងជំរុញក្រុមសកម្មប្រយុទ្ធដែលគាំទ្រដោយអ៊ីរ៉ង់ដូចជាក្រុមហេប៊ូឡារបស់លីបង់ និងក្រុមហ៊ូធីរបស់យេម៉ែនជាដើម។
ប្រភព៖ EU envoy in Tehran amid hopes to restore nuclear agreement
