ពាក្យសំដីដ៏កាចរបស់លោកបៃដិនអំពីលោកពូទីន ធ្វើឱ្យមានការភ្ញាក់ផ្អើលយ៉ាងខ្លាំង
វាគឺជាប្រយោគចុងក្រោយក្នុងការថ្លែងសុន្ទរកថាចុងក្រោយរបស់ប្រធានាធិបតីអាមេរិកលោកចូ បៃដិនមុននឹងលោកឡើងយន្តហោះដើម្បីធ្វើដំណើរចេញពីទ្វីបអឺរ៉ុបត្រឡប់ទៅអាមេរិកវិញ ជាការតិះដៀលប្រធានាធិបតីរុស្ស៊ីលោកវ្លាឌីមៀរ ពូទីនជុំវិញភាពឃោរឃៅនៃការលុកលុយប្រទេសអ៊ុយក្រែន។
នៅចុងសប្ដាហ៍ប្រធានាធិបតីអាមេរិករូបនេះនិយាយថា៖ «សម្រាប់ប្រយោជន៍របស់ព្រះ បុរសនេះមិនអាចបន្តកាន់អំណាចទេ»។
ពាក្យសំដីនេះ គឺនៅចុងសុន្ទរកថាដ៏កាចមួយ នៅក្រុងវ៉ាសូវី នៅចុងបញ្ចប់នៃដំណើរទស្សនកិច្ចរយៈពេលបីថ្ងៃ រៀបចំយ៉ាងប្រញាប់ប្រញាល់ទៅកាន់ប្រទេសប៉ូឡូញ និងបែលហ្ស៊ិក ក្នុងបំណងរក្សាឱ្យសម្ព័ន្ធមិត្តលោកខាងលិចឱ្យរួបរួមគ្នាប្រឆាំងនឹងប្រទេសរុស្ស៊ី។
ប៉ុន្តែត្រឹមព្រឹកថ្ងៃអាទិត្យរដ្ឋមន្ត្រីការបរទេសអាមេរិកលោកអាន់តូនី ប្លីនខែន ដែលកំពុងធ្វើដំណើរទស្សនកិច្ចទៅកាន់អ៊ីស្រាអែល បានព្យាយាមទប់ទល់ផលប៉ះពាល់នៃការលើកឡើងរបស់លោកបៃដិនរួចទៅហើយ។
លោកប្លីនខែន បានបដិសេធថាអាមេរិកមិនកំពុងជំរុញជាផ្លូវការដើម្បីទម្លាក់លោកពូទីនពីអំណាចទេ។ អ្នកវិភាគជាច្រើននិយាយថាប្រសិនបើមិនមានធ្វើការបដិសេធបែបនេះទេ វិមានក្រឹមឡាំងអាចកាន់តែមានកំហឹង ហើយប្រធានាធិបតីរុស្ស៊ី អាចថយក្រោយវិញពីការចរចាសន្ដិភាព ឬមិនកាត់បន្ថយគោលដៅរបស់ខ្លួននៅក្នុងប្រទេសអ៊ុយក្រែន។
លោកប្លីនខែន និយាយថា៖ «ដូចដែលអ្នកបានដឹង ហើយដូចដែលអ្នកបានឮយើងនិយាយម្ដងហើយម្ដងទៀត យើងមិនមានយុទ្ធសាស្ត្រនៃការផ្លាស់ប្ដូររបបនៅក្នុងប្រទេសរុស្ស៊ី ឬកន្លែងផ្សេងទៀតទេ»។
ភ្លាមៗបន្ទាប់ពីលោកបៃដិនលើកឡើងបែបនេះ សេតវិមានបានព្យាយាមធ្វើការបំភ្លឺរួចទៅហើយ។ អ្នកនាំពាក្យសេតវិមានមួយរូប និយាយថាលោកបៃដិនមិនមានបំណងធ្វើការផ្លាស់ប្ដូររបបនៅរុស្ស៊ីទេ ប៉ុន្តែគ្រាន់តែជាការសង្កត់ធ្ងន់ថាលោកពូទីនមិនបាន «អនុញ្ញាតឱ្យប្រើប្រាស់អំណាចលើប្រទេសជិតខាងទេ។
ការលើកឡើងរបស់លោកបៃដិនបែបនេះគឺហាក់ដូចជាផ្នែកមួយនៃការប្រើប្រាស់ពាក្យសំដីកាន់កាចរបស់លោកបៃដិនចំពោះលោកពូទី៏ន ដោយកាលពីប៉ុន្មានម៉ោងមុនលោកបៃដិនបាននិយាយថាលោកពូទីនជា «អ្នកកាប់សាច់» ក្នុងអំឡុងពេលនៃការជួបសំណេះសំណាលជាមួយជនភៀសខ្លួនអ៊ុយក្រែន ហើយនៅខែនេះលោកនិយាយថាលោកពូទីនគឺជា «ឧក្រិដ្ឋជនសង្គ្រាម»។
ការផ្លាស់ប្ដូរភាសាបែបនេះ បានធ្វើឱ្យមានភាពច្របូកច្របល់ និងបង្កើតការយល់ឃើញអំពីការផ្លាស់ប្ដូរដោយក្រុងវ៉ាស៊ីនតោនក្នុងការបង្កើនការប្រឈមមុខដាក់គ្នាជាមួយនៅក្នុងរយៈពេលខ្លី និងអូសបន្លាយភាពតានតឹងខណៈពេលដែលលោកពូទីនបន្តកាន់អំណាចនៅវិមានក្រឹមឡាំង។ ភាពមិនសូវស្រួល និងតានតឹងបានលេចឡើងក្នុងចំណោមប្រទេសអឺរ៉ុប។ ប្រធានាធិបតីបារាំងលោកអេម៉ានូអែល ម៉ាក្រុងបាននិយាយថាមិនគួរមាន «ការបង្កើនភាពតានតឹងនៃពាក្យសំដី ឬសកម្មភាពទេ» ហើយមន្ត្រីអង់គ្លេសមួយចំនួនបាននិយាយអំពីសារៈសំខាន់នៃការរក្សា «ច្រកចេញ» សម្រាប់លោកពូទីនបញ្ចប់សង្គ្រាមនេះ»។
មិនថាវាបានគ្រោងទុក ឬទេ ការលើកឡើងរបស់លោកបៃដិនបានធ្វើឱ្យមានការព្រួយបារម្ភថាក្រុងវ៉ាស៊ីនតោនគឺកំពុងបាត់បង់ការគ្រប់គ្រងសាររបស់ខ្លួនអំពីសង្គ្រាមនេះ។ អ្នកវិភាគមួយចំនួននិយាយថាការលើកឡើងរបស់លោកបៃដិន និងការបំភ្លឺក្រោយមកដោយមន្ត្រីក្រោមឱវាទរបស់លោក នឹងធ្វើឱ្យលោកពូទីនមានហេតុផលប្រើវាជាការបញ្ជាក់ថាសហរដ្ឋអាមេរិកពិតជាមានគោលបំណងប្រឆាំងលោក និងរុស្ស៊ីពិតមែន។ ពួកគេនិយាយថាលោកពូទីនអាចប្រើប្រាស់ការលើកឡើងនេះជាលេសអូសបន្លាយសង្គ្រាមនៅអ៊ុយក្រែន ឬប្រើប្រាស់យុទ្ធសាស្ត្រកាចសាហាវជាងមុន។
យ៉ាងណាមិញគោលដៅចម្បងរបស់លោកបៃដិន ក្នុងអំឡុងពេលធ្វើដំណើរទៅកាន់អឺរ៉ុបគឺដើម្បីពង្រឹងទំនាក់ទំនង និងសម្របសម្រួលយុទ្ធសាស្ត្រជាមួយសម្ព័ន្ធមិត្តណាតូ មុនពេលការសម្រេចចិត្តដ៏លំបាកជាងនេះទៅទៀត ប្រសិនបើលោក ពូទីន បង្កើនសង្គ្រាម រួមទាំងតាមរយៈការប្រើប្រាស់អាវុធប្រល័យលោក។ ដោយធ្វើដំណើរទៅកាន់ចំណតចុងក្រោយក្នុងទីក្រុងវ៉ាសូវី មន្ត្រីរដ្ឋបាលខ្ពស់ៗរបស់លោកបៃដិន ជឿជាក់ថា ប្រធានាធិបតីបានសម្រេចនូវអ្វីដែលលោកគ្រោងធ្វើក្នុងដំណើរទៅកាន់អឺរ៉ុប មុននឹងលោកធ្វើការលើកឡើងបែបនេះ។
ប្រធានាធិបតីអាយុ ៧៩ ឆ្នាំនេះគឺហាក់ដូចជាកាន់តែក្លាហានជាងមុនក្នុងប្រើប្រាស់ពាក្យសំដី ដោយសារការប្រែប្រួលស្ថានភាពនៃសមរភូមិនៅអ៊ុយក្រែន ខណៈពេលដែលកងទ័ពរុស្ស៊ីប្រកាសដកថយមកផ្ដោតលើការកាន់កាប់តំបន់ដុនបាសវិញ។
បើទោះបីជាមានការជឿជាក់បែបនេះក៏ដោយ ក៏នៅតែមានភាពមិនប្រាកដប្រជាអំពីដំណើរនៃសង្គ្រាម គោលបំណងរបស់លោកពូទីន និងសមត្ថភាពរបស់ប្រទេសអឺរ៉ុបក្នុងការទ្រទ្រង់ការដាក់ទណ្ឌកម្មសេដ្ឋកិច្ចលើរុស្ស៊ី។ ក្នុងអំឡុងពេលនៃដំណើរទស្សនកិច្ចនេះ សហរដ្ឋអាមេរិកបាននិយាយថា ខ្លួនបានត្រៀមរួចជាស្រេចក្នុងការដាក់ទណ្ឌកម្មលើប្រទេសទីបី ដែលជួយសម្រួលដល់ការឈ្លានពានរបស់រុស្ស៊ី ដែលអាចពង្រីកការដាក់ទណ្ឌកម្មហិរញ្ញវត្ថុដល់បុគ្គលក្នុងប្រទេសដែលមានសេដ្ឋកិច្ចធំៗដូចជាចិន និងឥណ្ឌា ប៉ុន្តែវាមិនច្បាស់ទេថាតើអឺរ៉ុបនឹងទៅជាមួយដែរ ឬទេ៕
Source: https://www.ft.com/content/3d9dc3a9-752c-4456-8c23-cf33f483f6ae
