រដ្ឋមន្ត្រីការបរទេសអារ៉ាប់ចំនួន ៤ ចូលរួមកិច្ចប្រជុំកំពូល Negev នៅអ៊ីស្រាអែល
រដ្ឋមន្ត្រីការបរទេសបារ៉ែន អេមីរ៉ាតអារ៉ាប់រួម ម៉ារ៉ុក និងអេហ្ស៊ីប ធ្វើដំណើរទៅដល់អ៊ីស្រាអែលកាលពីល្ងាចថ្ងៃអាទិត្យ មុនពេលកិច្ចប្រជុំកំពូលថ្ងៃចន្ទ ក្នុងតំបន់វាលខ្សាច់ភាគខាងត្បូង Negev ដែលជាកន្លែងក្រុមមន្រ្តីជួបប្រជុំគ្នាជាមួយសមភាគីអ៊ីស្រាអែលលោករដ្ឋមន្រ្តី Yair Lapid ។
មន្ត្រីស្និទ្ធនឹងលោក Lapid ប្រាប់អ្នកសារព័ត៌មានថា អ្នកការទូតកំពូលរបស់អ៊ីស្រាអែល និងរដ្ឋមន្រ្តីអារ៉ាប់ទាំង៤រូបរួមមានរដ្ឋមន្រ្តីអារ៉ាប់រួមលោក Abdullah bin Zayed Al Nahyan រដ្ឋមន្រ្តីបារ៉ែនលោក Abdullatif bin Rashid Al-Zayani រដ្ឋមន្រ្តីម៉ារ៉ុកលោក Nasser Bourita និងរដ្ឋមន្រ្តីអេហ្ស៊ីបលោក Sameh Shoukry នឹងជួបពិភាក្សាគ្នាអំពី «ការជំរុញស្ថាបត្យកម្មសន្តិសុខក្នុងតំបន់»។
កិច្ចប្រជុំកំពូល នឹងផ្តោតលើការគំរាមកំហែង បញ្ហាប្រឈម និងឱកាសផ្សេងៗក្នុងតំបន់។ ក្នុងចំណោមបញ្ហាដែលគេរំពឹងថានឹងក្លាយជាចំណុចកណ្តាលនៃកិច្ចប្រជុំនោះ គឺការចរចានុយក្លេអ៊ែរអ៊ីរ៉ង់នៅក្រុងវីយែន និងសង្រ្គាមរុស្ស៊ី-អ៊ុយក្រែន។
មន្ត្រីដដែលនិយាយថា សម្ព័ន្ធភាពនឹងដោះស្រាយការគំរាមកំហែងដោយ «ផ្លូវអាកាស សមុទ្រ និងការលួចប្លន់តាមសមុទ្រ» ហើយរហូតមកទល់ពេលនេះ កិច្ចប្រជុំមានភាព «កក់ក្ដៅខ្លាំងណាស់ រួមទាំងការឱបក្រសោប និងការសន្ទនាជាមិត្ត»។
មុនពេលមកដល់នៃមន្រ្តីការបរទេសអារ៉ាប់ទាំង៤ ទូរទស្សន៍អ៊ីស្រាអែល Kan រាយការណ៍ថា អ៊ីស្រាអែលបានបង្កើនការត្រៀមលក្ខណៈការពាររបស់ខ្លួននៅភាគខាងត្បូងនៃប្រទេស ចំពេលមានការព្រួយបារម្ភពីការគំរាមកំហែងពីលើអាកាសក្នុងអំឡុងពេលកិច្ចប្រជុំកំពូល។
ជាមួយគ្នានោះ កិច្ចប្រជុំ Negev ក៏មានការចូលរួមពីរដ្ឋមន្ត្រីការបរទេសអាមេរិក លោក អង់តូនី ប្ល៊ីងខិន (Antony Blinken) ផងដែរ ក្រោយដែលទូរទស្សន៍ក្នុងស្រុកអ៊ីស្រាអែល Channel 13 ផ្សាយកាលពីថ្ងៃសៅរ៍ថា អ្នកការទូតក្នុងតំបន់ត្រូវបានគេរំពឹងថានឹងសុំឱ្យសហរដ្ឋអាមេរិកដាក់ពង្រាយកម្លាំងឆ្ពោះទៅអ៊ីរ៉ង់ ទាំងលើបញ្ហានុយក្លេអ៊ែរ និងការពង្រីកខ្លួន និងសកម្មភាពបំបាត់អស្ថិរភាពរបស់អាមេរិកក្នុងតំបន់។
ប្រភព៖ Foreign ministers of Bahrain, UAE, Morocco and Egypt arrive for Negev Summit https://www.timesofisrael.com/foreign-ministers-of-bahrain-uae-morocco-and-egypt-arrive-for-negev-summit/
